Beauty market now

Diha kami gi-interview nga batan-ong medical student nga lalake nga daghan nag nadaug nga bangga sa kaambungan. Miingon siya nga wa kuno siyay uyab karon kay naa sa pagtuon, pag supervise sa iyang mga igsuon ug sa pag intra sa mga male pageants maoy iyang giatiman.

Murag medyo kimaw kini nga paminawon gikan sa usa ka lalake kay naanad man gud kita nga babaye ang kasagaran mosulti niani—“studies muna.” Apan basig times have changed og nga nahimo na nga seryoso nga pursuit ang beauty pageant sa mga lalake. Ug sa gay lingo pa, “gi career na.”

Sa ’60s gasugod ang pag market sa mga lalake isip objects of desire. Ug daw nanalingsing kini ning atong milinyo karon. Ug basig apil tingali sa marketing ang di pagpanguyab para daghan ang magdahum nga maka score ning mga desired targets.

Sa mao gihapong interview amo siyang gipangutana—agig padugang sa pusta—kon unsay klase sa babaye ang iyang gusto mauyab. Mitubag siyag “beauty queen.” Wala kami malipay sa iyang tubag kay murag wa kini lami. Wa kini lami sa ingon nga hapit tanang tao nag pantasya man nga maka score og beauty queen. Gatuo kami nga may “twist” o kalahian iyang tubag kay beauty titlist man usab siya og insider siya sa mga pageants. Naghuwat kamig insight sa insider.

Apan iya kaming gipasabut sa iyang tubag. Ganahan siya og beauty queen kay alang kaniya disiplinado kini. Tagdugay kuno kini matulog kay magsiguig practice sa entablado. Kasab-an kuno kinig masipyat apan dili kini ma discourage. Sa iyang pag-intra sa mga conest na sinati niya ang kalisud sa perparations. Kanunay kang igmat ug mapahiubsanon sa director. Magpuwaw ka unya mo eskwela pagka buntag. Alang kaniya ang kahago ug kalisud nga agian sa mga beauty contestant makatabang nila pag palig-on sa ilang personalidad. Makapaandam kini kanila sa pagsagubang sa kalisud sa kinabuhi.

Murag bag-o kini nga insight alang kanako nga ang beauty pageant ma-isip diay nga disciplinary school.

* * *

Tulo ka beauty queen nga akong kaila—Sian Maynard, Ana Igpit ug Karla Henry, ang gatukod karon og usa ka events organization.

Ang natumbangan nako nilang event mao ang 15th anniversary sa Coffee Dream nga mao say launching sa Banawa branch niani. Nagmalampuson sila ning maong proyekto. Kay puros man sila niagi og daghang pageant nga matawag nato og events dili na lisud kanila ang pag-organize og event. Ang ako lang pangutana kon makakuha ba kaha silag proyekto kada semana o bisan kada buwan na lang para sa tibuok tuig nga booking.

Usa sa ilang baraha nga naka palampus sa ilang Coffee Dream project mao ang ilang special guest nga beauty queen usab sama kanila— Shamcey Supsup.

* * *

Ang pagka cerebral (o mautok) ni Supsup medyo simang usab sa pageant circuit. Deretsu siyang motubag, maayong muhan-ay sa iyang mga pulong ug dili ma-PR sama sa kasagaran. Polite siya apan dili pa cute.

Sa among pakighinabi niya miingon siya nga dili niya damgo ang mahimong beauty queen. Iya lang kunong gipauyonan ang iyang inahan (usa ka engineer nga nanarbaho sa gawas) nga gasige’g hangyo kaniya nga paintrahon siyag beauty contest sukad pagka bata pa niya.

Wala siya pageant experience before sa Binibining Pilipinas.

Daw wala sa plano ni Shamcey nga ma object of desire sa taas nga panahon kay wa man niya gitago sa tanan nga duna siyay uyab. Ang iyang damgo karon mao nga makatabaho isip architect nga maoy iyang gitun-an sa UP.

Medyo complex pud diay og gamay ang dynamics sa beauty pageants.