Unsa ka tinuod kining pasangil nga dunay policeman ug policewoman nga pulos nadestino sa Naga police station nga gipang-imbestigahan kay dunay relasyon?
Duna koy pangan sa duha apan ako ning pugngan kay minyo ra ba kining lalaki ug lisud kaayo nga maapektahan ang pamilya niini samtang dalaga pa ang babayeng pulis.
Ang duha nasakpan sa usa ka sibilyan nga nagkarinyohay sud sa police station samtang ang sibilyan paingon nga magpa-blotter tungod kay biktima sa pagpanglogos iyang pag-umangkon.
Gawas niining nahitabo sa Naga, duna say policewoman nga taga Sibonga nga bodyguard ug usa ka dakung politiko nga gireklamo kay nakigrelasyon og usa ka minyo nga lalaki nga iyang silingan.
Kun tinuod man gani kini, wa gyuy ayo ang ilang mga binuhatan.
Pagkadaghang ulitawo diha nganong minyo gyud maoy tuyo-an. Pagtarong intawon mo, mga inday!
Tinuod, personal ning maong isyu apan kinahanglang magkinto sila kay anaa sila sa sensitibo nga katungdanan.
* * *
Makaingon kog mirisi ang nahitabo ni PO2 Antonio Icalina kun tinuod man nga mogamit og shabu ug protector pa gyud sa drug lord diha sa dakbayan sa Naga.
Baldado na gyud siya kay maayong pagkatusak-tusak sa mga bala ang iyang duha ka mga tuhod kinsa giingong gitabangan og pusil sa lima ka wa ilhing mga lalaki niadtong Sabado sa buntag nga may kalagot kaniya.
Leksyon kini sa tanang kapulisan.
Kwestyonable kaayo ang iyang presensya didto sa Langtad, Naga, nga maoy giila nga “barangay Ermita” ning siudad nga daghan kaayog shabu.
Gibalhin si PO2 Icalina sa Tudela, Camotes, police station niadtong panahon pa ni kanhi Cebu Provincial Police Director Senior Supt. Erson Digal tungod sa mga negatibong reports batok ning maong pulis.
Bisan ang atong mga operatiba sa kapulisan mireklamo na niining Icalina kay mag-anhaan gyud sa Langtad, Naga, nga maoy hinungdan nga ma-inutil ilang mga operasyon.
Gitumbok usab kini sa duha ka mga vendors og chicharon nga mibawi sa ilang baligya nga wa i-turnover sa police station.
* * *
Midangop sa akoa niadtong Sabado sa gabii ang mga vendors nga namaligya og kandila diha sa may Basilica Minore del Sto. Niño habig sa may Magellan’s Cross kay matud pa gipang-harass sila sa taga Speed sa Cebu City Hall.
Matud pa sa mga nangreklamo nga abusado kaayo ang taga Speed kay pang-patiran sila kun maghigda-higda diha sa may gangha-an nga bahin sa Basilica.
Ang nangreklamo mga tiguwang na nga mga babaye og mipasangil nga naka-inom ang taga Speed.
Usa sa ilang gipadayag nga mihinay ilang kita karon kay wa na sila tugti nga makabutang og dagkutanan sa mga kandila diha sa may Magellan’s Cross kay di gustog samok ug hugaw ang mga nagdumala sa may Plaza Sugbu.
Ilang giawhag si City Mayor Michael Rama nga mosabot sa ilang panginabuhi ug mipasalig usab sila nga way hugaw sa kandila nga mahabilin sa lugar.
* * *
Mibahag ang ikog ni Talisay City Mayor Socrates Fernandez pakig-atubang sa mga vendors sa Tabunok Public Market niadtong Sabado sa hapon atol sa among programa’ng “Dialogue on the Air” sa dySS Super Radyo.
Didto nagmanukad ang among sibya.
Si Konsehal Val Ylanan maoy nasugamak pagpanubag sa mga pangutana sa mga vendors ug mga drivers nga supak nga ibalhin sila sa bag-ong merkado nga gitawag og “Macapagal-Gullas Public Market” nga anaa nahimutang sa barangay Lagtang.
Ang mga importanteng punto sa ilang pagsupak mao kining mosunod:
Una, gamay ra ang bag-ong merkado. Diha sa Tabunok maka-accommodate og libo kapin ka mga vendors apan sa bag-o dili kaabot og 400.
Ikaduha, risgo sila panahon nga mosaka ang tubig sa sapa kay kilid kini sa Mananga Bridge ug gani matud pa ang meat ug fish section anaa gyud sa riverbed nahimutang kaniadto.
Ikatulo, nga mag-doble na og sakay ang mga mangomprahay.
Ikaupat, dili kini makasulbad sa dagan sa trapiko kay kun adto sa Lagtang makamugna gihapon kini og traffic kay way parking area.
Ikalima, sayon kaayo sila mabiktima sa kawat og tulis didto sa Lagtang.
Samtang namasangil sila nga nagbugal-bugal si Mayor Fernandez ngadto kanila kay gipundohan og mga lungon ang bag-ong merkado nga medyo nagtunglo kanila sa lugar nga peligro.
Apan in fairness nila ni Mayor Soc nindot ang bag-ong merkado ug desente kaayong tan-awon.
Gani sa akong tan-aw mora kini og usa ka plaza apan kuwang lang gyud sa parking area ug kuwang ra kaayo sa mga stalls.
Samtang kabahin sa pasangil nga dunay mga gipundong lungon, wa koy nakitang lungon didto apan miangkon ang mga gwardya nga dunay mga lungon kaniadto samtang gipadayon ang pag-construct.
Sama sa akong giingon nga mas maayo gyud nga mag-dialogue og tarong sila si Mayor Soc ug mga vendors aron way maalkanse ug alang sa kaayuhan sa tanan.
Basta ang akong concern nga di na gyud mag-traffic diha sa national highway.