Inutil gyud ni’ng gilusad nga “all-out justice” ni Presidente Noynoy Aquino batok sa mga kidnapper nga mga sakop sa Moro Islamic Liberation Front (MILF).
Wa gyud ko malipay sa iyang pagkatalawan kay bisag daghan na’ng gipang-ihaw sa pagka-salbahis niining grupoha apan wa gyud siya modeklarar ug “all-out war.”
Kini’ng mga klasiha sa mga tawo dili na mo-ila ug hustisya. Kay kun buot pa kaniadtu pa unta ni sila nagbaton ug respeto sa ilang isig-ka Pilipino.
With all due respect, daku ko’g pagsalig sa Presidente kay dili siya kurakot apan na-ibanan akong pagsalig niya niining pag-alkontra sa mga sakop sa MILF.
Wa pa ba masayod ang Presidente nga kakonsabo ang MILF sa tanang mga terroristic activities sa Abu Sayyaf?
Alang nako, kining klasiha sa mga tawo hutdon ni’g ihaw.
Ang angay’ng himoon sa gobyerno ni P-noy mao ang pagpa-mass evacuation alang niadtong mga mahigugmaon sa kalinaw sa mga critical area sa Mindanao ug mohatag ug insaktong panahon nga makabakwit.
Tan-aw nga limpiyo na sa mga tawo nga mahimuslan, sugdan na ang massive offensive military operations. Siyaro’g dili maka-angkon ug kalinaw ang Mindanao niining paagiha.
* * *
Ang pagpangasaba ni RTC Judge Ester Veloso sa mga abogado ni Bella Ruby Santos niadtong Lunes bahin sa isyu sa pagpa-dismiss sa kaso ni Ian Charles Griffiths bisag wa pa madakpi, nagpasabot nga estrikto ang huwes sa proseso ug duna siya’y baruganan isip usa ka mahistrado.
Sama sa akong giingon kaniadto nga wa’y legal personality ang mga abogado ni Bella pagpa-quash sa information hangtud nga dili nila i-submit si Bella sa jurisdiction sa korte.
Karon nga ila na’ng gipa-arraign si Bella, kini maoy insaktong higayon nga ilang pangayoon ang kutob sa ilang gusto pag-protihir sa mga katungod sa ilang kliyente.
Apan ang tanan anaa ra sa diskresyon sa huwes ilabina ang hangyo nga katugtan siya’ng makapiyansa.
Kun tugtan nga makapiyansa si Bella pila may tukmang kantidad? Kun huyang man ang ebedensiya mas maayo sab tingali nga dili mosogot ang korte nga ipa-agi ug surety bond.
Kay sa nahitabo ni PBMA Supreme Master Ruben Ecleo nga gipa-agi ug surety bond mora’g way epekto ni Ecleo.
Kun gipa-cash bond pa to ug P1 million si Ecleo unya dili na mopakita automatic nga imbargohon sa gobyerno ang usa ka milyon.
* * *
Maayo kay nakakuha na ug abogado si Lyndon Horandoy kadtong triggerman sa pag-ambush patay ni piskal Patrick Osorio.
Ngan nga iyang gikuha si abogado Daryll Roque Amante Jr. duna siya’y salig ug kompiyansa sa maong abogado nga makadepensa sa iyang katungod.
Maglaum sab ko nga makapadayon na ang korte ug husay nga di na mabalda aron maklaro kun unsay resulta nilang duha ni Allan Sinogat nga maoy gipangtaral sa pag-ambush patay sa piskal.
Kumusta naman ang giingong mastermind sa krimen kadtong babaye nga hangtud karon wa pa gyud pasaka-i ug kaso sa atong kapolisan?
Wa pa toy klaro?
* * *
Karong Sabado sa gabii Oct. 29, 2011, magkita-kita kami’ng mga kanhi trabahante sa among gi-alagaran nga sibya-anan kaniadtu nga mao ang dyMF Bombo Radyo.
Alang namo’ng anaa pa karon nanarbaho sa industriya sa panibya wa maglisud sa pagpakisayod niining maong kalihukan apan na-problema ang core group sa maong reunion pag-contact sa uban namo’ng mga kaubanan.
Ang uban nga anaa sa lagyo nasayod nala’ng pinaagi sa Facdebook sa Internet ug ang uban nasayod pinaagi sa mga sibya sa radyo.
Maglaum ko nga daghan ang makatambong bisag dunay contribution nga tag P350. Kadto interesado pwede motawag ni Ma’am Elena Pelobello sa GMA-7 Cebu, telephone number 2314820.
Akong napanglantawan nga sadya ug puno kini sa hudyaka diha sa Sudlon sa may Ecotech Center tungod kay dugay na’ng katuigan nga wa na gyud mi magkatapok tungod sa ka busy sa trabaho.
Alang nako mas maayo man gyud nga dunay ingon ani nga kalihukan aron anaa gihapon ang pagkahi-usa sa grupo bisan kasamtangang nagkabuwag-buwag ug lain-laing radio, TV ug newspaper networks.
Kita-kita kits nalang ta didto.