Dili ako relihiyuso nga pagkatao. Dili ako “man of prayers.” Dili instant ang akong pangurus kon dunay kilat. Instant hinuon ang akong pagkaigking. Wa kini magpasabot nga isug ko o wa akoy kahadluk. Ug usahay maghunahuna usab akog ginuo ug unsa gyuy tumong ning atong pag occupy ning kalibutan.
Kon kabahin sa institutionalized faith, matawag mo akong katoliko. (Ka tulo mo liko?) KBL nga Katoliko. Kasal, bunyag ug lubong mo simba.
Daghan hinuon ako og mga higala nga relihiyoso. Ug bilib ako sa ilang didikasyon. Bow ako sa ilang consistency sa ilang devotion ug sa ilang katakus sa pagpadayon sa mga tradisyon. Usa sa akong mga suod nga relihiyusong higala mao si Louie Nacorda. Tulo ka santos ang iyang gidibusyunan—San Antonio, San Vicente ug San Juan Bautista.
Matud pa ni Louie nga niadto kunong nag career shift siya gikulbaan siya ug iya na lang gisalig kang San Juan ang tanan. Ug kay nagmalampuson man siya gi-career na usab niya ang ang pag atiman sa mga kalihukan sa patron sa Parian nga si San Juan.
Basta financial kuno ang iyang worries ari siya sa igagaw ni Kristo magpalaban. Ug tingali nakasabot si Louie nga bisan sa akong pagka irihis interesado gihapon ako sa mga tradisyon ug ingon man sa mga kinabuhi sa mga santos mao nga gitagaan niya akog kopya sa Triduum to Saint John de Baptist sa Cofradia de San Juan Bautista Cebu, Filipinas.
Nakahibawo kita sa political dimension sa iyang kamatayon kon diin gipaputol ang iyang liog sa kabit sa hari tungod sa iyang pagsibya batok sa ilang relasyon. Apan ang pagprisentar sa iyang kinabuhi ning gamay nga prayer book daw makaingon kita nga siya ang gaunang crusader sa social justice.
Ang page 7 ning maong prayer book nagkanayon: “His ministry consisted of calling people back to God by mending their crooked ways and by doing penance for their sins. He taught the rich to share their food and clothing with the poor: taught the tax collector not to collect more than what is legal; and taught the soldiers not to use violence, nor intimidation on anyone. He also taught them to be content with their pay. Well, aware perhaps that greed for money is the root of all evils.”
Kon basahon mo kini in context sa “Occupy Movement” batok sa mga financial institution movements makaingon ka nga alyado si San Juan Bautista ning mga bag-ong hippie. Tinuod walay klarong lakang nga giplano kining mga bagang panun sa mga lainlaing dagkung dakbayan sa tibuok kalibutan. Apan sama kang San Juan dili poltical ang ilang agenda. Dili regime change ang ilang gipangayao. Usa ka lifestyle awareness ang ilang gipangita ug gikampanya. Ilang gisibya ang pangutana kon mahimo bang mabuhi nga dili maghinakug o mag dinawuo.
Sa wa lang sila mahibawo apan si San Juan maoy patron sa ilang Kawsa. Ug ang tanan nilang mga yangungu gi-sum up lang sa second paragaraph ning gamay nga prayer book.