You can run but you can’t hide

Titles bridge and telescope. Atong suwayan pagsumpay ang mga maduguong gidangatan sa duha ka binuhat karong semanaha. Ang usa, asawa nga nanarbaho sa banko ug ang usa diktador sa usa ka nasud. Puros sila namatay sa bala karong semanaha.

Kay tambukikoy man ko sukad pagka bata mao nga wa gyud koy interest sa dagan kay dali kong madagma ug dali rang mapilo akong tiil. Ug dayon tagutlo ka semana nga magtikaang ko. Ug mao nga sa dihang mipahungaw sa ilang midlife crises ang akong mga higala sa media pinaagi sa pagdagan, wa lang ko magpa tintal kay dugay na ra ba maayo ang piang sa tiguwang. Pero surprisingly ang akong amigong maniniyot nga si James Go nagmalampuson man sa iyang pagdagan-dagan.

Alang sa akong mga higala nga runner usa ka inspirational figure si Melinda Ponce. Usa siya ka asawa, inahan ug trabahante sa usa ka banko. Sa pangidaron nga 53 anyos, miagi si Melinda og operasyon nga mitangtang sa iyang uterus ug miagi na usab siya og stroke. Tungod tingali ning maong mga sakit naningkamot siya nga mabaskog ug miintra siya niining mga pundok nga managanay. Ug nahimong usa ka malampuson nga runner si Melinda diin nalupigan niya sa dagan ang pipila ka entrante nga mas bata pa kaayo kaniya. Na first place si Melinda sa 53k ug 60k nga lumba. Nangandam na gani siya para sa usa ka 102k nga lumba sunod buwan.

Tingali ang pagdagan maoy panangtang sa stress ni Melinda. Stress sa trabaho ug stress sa panimalay diin nanimuyo ang iyang kapikas nga tungod nalisuan na sa pangisip kusog manakit ug mamun-og kaniya ug sa iyang mga anak. Gani ang mga anak niyang mga babae nangandam naman og sundang (sa ilawum sa ilang katre) ingkaso og atakihon sila sa ilang amahan. Tingali nakahibawo na si Emmanuel Ponce nga duna silay sundang ug maong migamit kini og pusil. Niadtong Domingo, gipusil ni Emmanuel si Melinda, ang ilang duha ka anak nga dalaga (puros na nurse), anak nga ulitawo ug ang ilang katabang sa panimalay sa wala pa niya pusila ang iyang kaugalingon. Ang iya lang 13 anyos nga anak nga babaye maoy gipaikyas ni Emmanuel. May miingon nga namatay si Melinda nga gasul-ob pa sa iyang running shoes.

Kon naka inspire man si Melinda sa healthy running lifestyle sa buhi pa siya, maayo untag makatabang ang iyang kamatayon ug ang kamatayon sa iyang banay pagpaamgo sa atong katilingban sa mga suliran sa pangisip ug sa pagpamun-og sa mga asawa ug bata.

Ang laing midagan ug gipatay sa bala mao ang diktador sa Libya nga si Moammar Gadhafi. Ayaw lag katinga sa spelling sa iyang ngan kay daghan kini og spelling. Mga duha na tingai ka buwan nga ga “life on the run” si Gadhafi human kuhaa ang iyang gobyerno ug gingharian sa Libya sa mga rebelde. Hinuon tinabangan, o ingnon ta lang gi-awhag, sa mga Western nation ang maong pagsaka batok sa dikador sa usa ka nasud nga adunahan sa lana.

Si Gadhafi nga suod sa mga Marcos misaka sa gahum pinaagi usab sa usa ka rebolusyon. Gani iya mang gimintinar ang iyang titulo nga Colonel dihang siya nay nangulo sa ilang nasud.

Si Moammar Gadhafi nga nanag-iya og pipila ka palasyo ug mansion nakit-an sa mga rebelde nga gatagu sulod sa usa ka hugaw kaayo nga imburnal. Giguroy nila kini gikan sa imburnal ngadto sa kadalanan. May misinggit og, “Ayaw una siyag patya!”—para tingali ipakita siya sa tanang galagut kaniya. Apan diha gyuy wa kapugong nga mipusil kaniya sa ulo.