Unsay damlag sa 13 anyos?
Kining garbo sa tawo mao gyuy nag-unang hinungdan kun nganong mabungkag ang kaminyoon ug maoy makapaguba sa relasyon sa mga sakop sa pamilya.
Sa tinuod lang, kun di taas ang pasensya sa magtiayon, akong tan-aw wa nay relasyon nga magmalungtaron.
Ang sekreto ra gyud sa magtiayon mao ang pagpainatay sa pagpailob gawas nga ibutang sa tunga ang langitnong Amahan.
Apan kun wa na gyuy tsansa nga magkauli, pa mas maayong magbuwag na lang og tarong nung kang mosampot sa dugoong panghitabo.
With all due respect, di ko mobasol sa asawa nga si Melinda apan di sab nako mabasol ang bana nga si Emmanuel Ponce nga mihimo sa linoog kaayong krimen niadtong Domingo sa buntag ngadto sa iyang asawa ug mga anak ug sa ilang katabang.
Kun wa putla ang komunikasyon sa asawa ngadto sa iyang bana ug nagpabilin pa siyang martyr taliwa nga nakasala iyang bana pakigrelasyon og laing babaye kaniadto dihang aktibo pa kini sa pagpanakay og barko sa gawas, mahitabo kaha ang krimen?
Sama sa akong gibalik-balik nga bisag dili makiangayon sa mga asawa nga nangaliwa ang bana, kinahanglang dawaton gihapon sa tumang pagpaubos sa mga asawa kay di man gud tinuyoan ang tanang illicit affair sa bana.
Inay sabton ug painaton ni Melinda ang iyang pasensya human nainutil iyang bana ug misumbalik ang butang sa pagkaseloso wa na hinuon niya kini hatagi og dakung gibug-aton.
Natural nga makamugna gyud og mga insecurities ngadto sa bana nga baldado na ang pag-undang ni Melinda sa pagpakita og maayong tinagdan ug ang kagustuhan niini nga moputol sa ilang talikala sa kaminyoon.
Ang pagkaseloso ni Emmanuel nga bisag wa na sa lugar nindot unta kaayong panahon nga sudlan ni Melinda ang pagpaambit sa iyang dakung gugma.
Si Emmanuel sa akong tan-aw sabtonon gyud og kahimtang human sa iyang brain injury sa pagpanakay. Sa akong tan-aw, mubo na kaayo ang panglantaw ug pinsada sa mga butang ngadto sa iyang pamilya.
Sa huna-huna ni Emmanuel nga abi naman tuod nga baldado na siya ug nakasala sa pakigrelasyon, gipakadautan na siya sa pamilya taliwa sa daku niyang sakripisyo nga sila nakapondar.
Sa mga anak nga napatay nga pulos dagku na og edad, akong nakita nga duna silay pagkuwang sa ilang amahan.
Niadtong ilang makatarunganon nga paghapak sa ilang amahan kay mition og kutsilyo sa ilang inahan, milampos ba sila pagpangayog pasaylo ug mipasabot sa panghitabo?
Wa ba nila putla ang ilang pakig-communicate sa ilang amahan human niadtong insidente?
Sa akong basa ngadto ni Emmanuel, dili grabe ang iyang pagka-deperensya sa pangisip kay iyang gibilin nga buhi ang kinamanghuran.
Sa sitwasyon ni Emmanuel, ang mas importanteng butang nga iyang gipangayo mao nga siya sabton sa tibuok banay. Unya ang pamilya nga iyang gi-ugmad magpabilin nga iyang kasandigan sa mapait niyang kahimtang.
Ngadto sa mga kadugo, silingan, mga kauban sa trabaho ug sa simbahan nga nasayod sa krisis sa pamilyang Ponce, duna bay nangahas kanila nga nanginlabot paghilot sa relasyon sa magtiayon?
* * *
Pagka-unfair gyud ning ubang mga tawo nga magpasagad dayon sa pagpagawas ug huna-huna nga giilogan sa pamilya ang kustodiya sa lone survivor nga kinamanghuran nga si Ember Ponce tungod kay dunay daghang kabtangan.
Mao ning klase sa mga iresponsableng huna-huna. In fairness sa habig sa pamilya sa iyang amahan ug sa side sa iyang inahan pulos namahayag nga ang kabubut-on sa bata maoy ilang respetohon nga maoy biktima ug makaluluoy sa maong trahedya.
Sa tinuod lang, di baya lalim ang responsibilidad kun kinsa ang mamahimong makagiya ug maoy mo-asumir nga ginikanan niining bataa.
Mag-ampo lang ko nga magpabilin siyang lig-on ug di siya mosagop sama sa gihimo sa iyang amahan nga nagtubok pagkahuman ug himo sa krimen.
Gani bantayanan kaayo ning bataa sa mga mosunod nga mga adlaw kay simbako kun di gyud niya kaya nga karon nailo na siya sa pamilya.
