Kinsa man ang informant sa NBI?

Congratulations nila ni manalalaban Rennan Oliva sa National Bureau of Investigation in Central Visayas (NBI-7) ug kang NBI Special Investigator Arnel Pura. Tungod  sa ilang pagtinabangay, milampos sila pagdakop kang Bella Ruby Santos.

Magpasalamat ko sa informant nga maoy naghatag og insaktong impormasyon sa whereabouts ni Bella niadtong Biyernes.

Pagkahayahay niya kay sigurado siyang modawat sa 300 mil pesos gikan ni Gov. Gwendolyn Garcia ug ingon man sa gitampo-tampo sa kapulisan.

Kumusta man tuod ang laing akusado sa pagdagit ug pagpatay ni Ellah Joy Pique nga si Ian Charles Griffiths nga uyab ni Bella?

Makaya ba nga dakpon si Griffiths sa taga-NBI ug sa kapulisan bisan way extradition treaty ang Pilipinas ug Britanya?

Daku ning hagit sa gobyerno sa Pilipinas kun di mopakita og kooperasyon ang gobyerno sa Britanya.

With all due respect, dili ko konbinsido sa punto nga adto ra pwedeng itaral si Griffiths sa ilang nasud sa kasong pagdagit ug pagpatay ni Ellah Joy kay jurisdictional baya ang kasong criminal. Buot ipasabot, kun asa nahimo ang krimen, adto bistahon ang akusado.

Usa pa sab, unsaon pagtaral ni Griffiths didto sa ilang nasud nga anaa man diri sa ato ang entire records sa ilang kaso? Buot ipasabot nga atong paadtoon ang mga testigo didto sa Britanya?

Ako naglaum nga ang nasud sa Britanya may courtesy sa Pilipinas ug andam nilang ipadala si Griffiths aron atubangon kining seryosong kaso.

Way plano ang Philippine National Police hierarchy ug ang taga NBI nga manghangyo sa taga-United Kingdom Police nga maoy padakpon ni Griffiths?

* * *

Samtang na-busy og dakop niadtong Biyernes sa hapon si Pura kang Bella Ruby Santos didto sa SM Megamall sa Mandaluyong City, Metro Manila, na-busy sab kaming mga tigbalita dinhi sa Sugbu pagsunod-sunod pag-serve sa warrant of arrest batok kang Prison Guard Antonieto “Tonying” Babor  kawani sa Kapitolyo nga giingong maoy nagkawat sa 35 ka sakong bugas (National Food Authority Rice) diha sa Cebu Provincial Detention and Rehabilitation Center kaniadto.

Didto gi-serve ang warrant sa CPDRC sa iya  ra sang mga kaubang kawani sa Kapitolyo  ug sa kapulisan.

Apan medyo nalangay ang pag-serve kay wa didto si Babor kay naghatud og piniriso sa Vicente Sotto Memorial Medical Center.

Mga 15 minutos gikan pag-abot ni Babor nga nag-drive sa CPDRC van, giaresto na siya ug dayon gipapanso.

Wa mosugot ang mga arresting officers sa hangyo ni Babor nga di lang kini magpapusas kay ipasunod gyud ang lagda.

Si Babor nga among  naistorya mipadayag nga biktima lang sab siya sa kasong qualified theft nga iyang giatubang.

Misambingay si Babor nga di lang siya ang responsable sa pagpangawat apan wa siyay kaisog nga motribukar ug adto lang niya itug-an ang tanan sa husgado.

Sama sa akong giingon kaniadto, imposible kaayo nga gi-solo ni Babor pagpalusot ang mga bugas.

Ang nakaporke lang sab ni Babor, kay nagtinalawan gihapon pagtribukar.

* * *

Magpasalamat ko sa akong mga bisita niadtong Sabado sa among programang  “Dialogue on the Air” sa dySS Super Radyo nga sila si manlalaban Benjamin Cabrido environmentalist ug consultant sa dakbayan sa Mandaue; Manlalaban Raffy Yap, City Traffic Operations Management executive director; Engr. Randy Navarro, manager sa Inayawan Sanitary Landfill; Eddie Llamedo sa Department of Environment and Natural Resources; Warlito Ignacio, presidente sa mga scavenger sa Inayawan ug Danilo Capangpangan sa Municipality of Consolacion.

Ang isyu nga among gituki mao ang pagpasira na sa hingpit sa Inayawan Sanitary Landfill ug ang pagpangitoy sa isyu.

Ang importante atul sa among diskusyon  nga nakakab-ot ug pagsinabtanay tali sa  Siudad sa Sugbu ug Mandaue kay giklaro ni  Cabrido nga makaagi gyud ang mga garbage truck sa dakbayan sa Sugbu diha sa mga kalsada sa dakbayan sa Mandaue paingon nga molabay didto sa Concolacion.

Gani matud pa ni Cabrido  nga  na-misquote lang si Mandaue City Councilor Benjamin Basiga sa media ug ilang seminaron ang ilang mga traffic enforcers nga di magpasagad og dakop sa mga garbage truck nga way kalapasan.

Miingon usab si Cabrido nga wa gyud silay pagtuo nga panimawos ang gihimo sa taga-Citom sa lakang nga di gyud pasudlon sa downtown area ang mga PUJ nga nagruta og Mandaue.

Nakasabot si Cabrido sa estrikto nga pagpatuman nila ni Yap ug siya nagtuo nga ila pa kining maistoryahan ug iyang gisugyot nga mag-color or number coding sa mga sakyanan ang mga operator aron dili maghuot sa mga kadalanan.

Balik sa isyu sa pagpasira sa Inayawan Sanitary Landfill, mipasabot si Cabrido nga usa ka environmentalist nga di gyud sila magpanuko og kiha nila ni Cebu City Mayor Michael Rama bisag iya kining  paryente kun di mopasira sa Inayawan.

Si Navarro miingon nga kun siya pa lang ang makabuot, iya dayong pasirad-an ang labayanan kay puno na gyud kaayo ig problema gyud kaayo niya.

Si Llamedo sa DENR mipasabot nga dunay duha karon ka mga labayanan sa mga basura nga gidumala sa mga pribadong negosyante  nga aprobado sa ilang buhatan. Ang usa sa barngay Polog, Consolacion, samtang ang ikaduha anaa sa barangay Binaliw, Cebu City.

Samtang si Capangpangan sa Consolacion mitug-an nga wa pay mga residente ang mipadayag og mga pagsupak nga adto ilabay sa ilang dapit ang mga basura dinhi sa dakbayan sa Sugbo.

Pero sa akong tan-aw ang labing epektibo og di kaayo gasto sa paghipos sa mga basura mao gyud ang pag-edukar sa tanan.

Ma-edukar lang ang tawo kun pabayron sa gobyerno matag labay sa basura.