Nindot kun si Kongresista

Pabor ko niining  panawagan ni retired Cebu archbishop Ricardo Cardinal Vidal nga dunay public dialogue nga ipahigayon bahin niining pagpatukod og mga flyovers nila ni Kongresista Rachel “Cutie” del Mar ug sa iyang amahan nga si kanhi kongresista Raul del Mar.

Wa gyuy kumo nga estoryahon ning maong problema tali sa mga Del Mar ug sa  mga mibabag ilabina ang mga madre sa Asilo dela  Milagrosa.

Mas  maayo man gyud unta nga personal nga atubangon sa mga Del Mar ang mga tawo nga misupak niini aron makapasabot sila og tarong ug mahan-ay  ang tanan.

Niadtong among gipatawag nga “Dialogue on the Air,” wa motunga personal ang mga Del Mar apan in fairness, mitunga sa among sibyaanan ang amahan  nga si Raul ug nagpa-interview kanako pagpadayag sa ilang habig ug akong gi-replay ang akong interview kaniya sa tunga-tunga sa programa.

Una niyang gipasabot nga di gyud sila makatunga niadtong higayuna  kay  atua sa gawas sa nasud si Cutie samtang ang amahan tayming sab nga mobiya  sa Sugbo kay tambungan ang birthday sa iyang father-in-law sa laing nasud.

Bintaha gyud unta nga si Kongresista Cutie del Mar maoy motabi og di magsalig sa amahan aron ipakita nga makamao na siya sa iyang trabaho ug responsibilidad.

* * *

Unsa na man gyud kaandam ang tanang mga opisyales ning dakbayan  sa Sugbo ilabina ni Mayor Michael Rama pagsira sa Inayawan Sanitary Landfill ugmang adlawa?
Akong tan-aw, medyo kagidlay ta sa pag-transport sa atong mga basura kay si Mandaue City Councilor Benjamin Basiga chairman sa committee on environment  mipahimangno nga di paagion ang mga garbage trucks sa ciudad paingon sa lungsod sa Consolacion nga  maoy atong labayanan.

Usa sa mga ipahiluna sa Cebu city government mao ang mga scavengers nga nagsalig sa ilang panginabuhi sa mga basura nga ilabay diha sa Inawayan.

Ang daku-daku sa grupo sa mga manguykuyay og basura nga si Warlito Ignacio miapelar ngadto sa mga kadagkuan sa ciudad nga unta dili gyud sirad-an  ang labayanan ug basura diha sa Inawayan kay daghan silang magutman.

Karong Sabado, kini maoy topic nga among tukion  atul sa among programang “Dialogue on the Air” gikan sa alas 2:30 paingon sa alas 5 sa hapon.

* * *

Makapungot kaayong paminawon kining reklamo sa mga pasahero sa mga pampublikong sakyanan batok sa mga driver nga mga abusado ilabina nga molarga dayon bisag wa pa makatarong og kanaug ang mga pasahero.

Unang  gireklamo ang KMK bus sa usa sa among tigpaminaw sa dySS Super Radyo.

Matud niya nga bisag nagkagidlay siya pagkanaug sa  bus, pag-abot sa Minglanilla ug bisag wa sila  makatarong sa pagkanaug sa sakyanan, milarga lang dayon ang driver. Matud niya nga na-trauma intawon ang iyang duha ka mga gagmayng bata.

Samtang ikaduhang reklamo nga among nadawat niadtong Lunes sa hapon gikan sa usa ka ginang nga taga barangay Luz nga si Chelo Milan. Iyang gireklamo  ang driver sa Talamban-bound PUJ nga may plate  number GWW 256.

Susama ang nahitabo kaniya sa unang reklamo uban sab sa iyang gamay nga anak.

Si Assistant Regional Director Arnel Tancinco sa Land Transportation Office in Central Visayas miingon nga mas maayong ilhon sa mga biktima ang mga abusadong driver.

Iyang gipasalig nga ilang subpoenahan ang mga driver nga gireklamo og patubagon.

Matud niya nga kun nakalapas gyud sa reckless driving, ilang pamultahon ang mga driver og sobra P1,000.

* * *

Dili madali kining pagpangibot  sa mga  decorative  lampposts nga nagkalat sa kadalanan nga maoy  ceremonial route atol sa 12th Association of Southeast Asean Nations Summit nga gimontar sa mga kontraktor sa Department of Public Works and Highways.

Kini mga ebidensya batok sa mga nangurakot ug naka-pending pa sa Sandiganbayan ang pipila nila ka mga kaso.

Dili isyu nga naka-obstruct ang mga lampposts. Ang importante, hagit kini sa mga mayor nga mopanindot  niini og balik.

Karon nga nagkaduol na ang Pasko, mas maayong butangan kini og series lights sa atong mga  opisyales aron mapahimuslan.

Mas nindot man gani nga itugyan kini sa mga barangay  nga may jurisdiction sa maong mga decorative lampposts.