Guilt – West

Pasayloa ko, mga movie fanatics, sa wa nako pagsibya pinaagi ning maong lindog sa mga libreng pelikula nga gipsundayag sa SM ug Ayala sa semana lang nga milabay. Didto man gud ang atong atensyon sa makalilisang nga bagyo.

Niadtong Byernes, Sept. 30, hangtud sa Domingo, Oct. 2, gisaulog sa Ayala Cinema ang ika-14 nga Cine Europa. Samtang gapasalida usab og mga libreng Korean movies ang SM agig pagsaulog sa Korean Month. Gauna og abre ang Korean filmfest niadto Sept. 27. Apan wa gyud intawon ko kakita bisag usa. Daghan hinuon kitang mga kaila nga miingon nga nindot ang mga pelikulang gipasundayag sa maong filmfest. Ug sayod ang mananaway og Koreanovelas sa kasinatian sa drama nianing nasud sa Samsung ug Kia.

Ang wa nako makit-i sa Cine Europa tungod sa kaapiki sa panahon mao ang “Little Robbers” sa Austria, “Long Weekend” sa Belgium, “Letter to America” sa Bulgaria, “Grapes” sa Czech Republic, “Mosquitoes’ Tango” sa Slovakia, “Princess” sa Poland, “An Ordinary Execution” sa France, “Little Greek Godfather” sa Greece, “The Lark Farm” sa Italy ug “Never Let Me Go” sa United Kingdom. Medyo nasubo ako nga nasipyat ako pagtan-aw ning nauwahi kay si Carey Mulligan, Keira Knightly ug Charlotte Rampling man diay ang mga artista ning pasundayag sa England kabahin sa mga batang gibuhi para mahimong donors sa organ transplant.

Sa akong mga nakit-an, ang pangbatang pelikula sa Germany nga “The Crocodiles,” ang duha ka offering sa España nga ang “Intacto” ug ang “Mataharis” ug ang “Exchange” nga mipakita sa kinabuhi sa mga mangingilad sa Romania mao ang mga pelikula nga walay eksena gawas sa ilang nasud.

Samtang ang “How About Love” sa Switzerland, “The Silent Army” sa Netherlands, “The Escape” sa Denmark ug ang “Mammoth” sa Sweden dunay mga eksena sa third world. Ang “How About Love” diha sa border sa Burma ug Thailand. Ang “Silent Army” sa Africa. Ang “The Escape” sa Afghanistan ug Turkey.

Ang pinakakurat mao ang “Mammoth” kay mga 1/3 sa pelikula Manila ang setting. Ug may kalabutan kini sa mga yaya nga Pilipina nga nanarbaho sa gawas samtang gibilin ang ilang anak sa Pilipinas. Dili lang kabahin sa overseas workers kining maong pelikula nga gipangunahan nila ni Michelle Williams ug Gael Garcia Bernal kay mituki kini sa maingon tang bonding tali sa mga anak ug ginikanan. Daw misugyot kini og “guilt” sa Western progressive nations sa pagguba nianing maong bond tungod sa ilang paggukod sa kalambuan.

Ang paglingiw, pagpamakak sa kaugalingon ug ang wa pagpakabana sa mga adunahang nasud sa kahimtang sa mga nagkalisud nga nasud nga misamot og sangkiig tungod sa ilang mga gubat nga giatubang maoy gituki sa pelikula sa Switzerland, Netherlands ug Denmark. Daw mipadayag (o kaha nangampanya sa ilang mga tao) nga luyo sa ilang kahamugaway dili hingpit ang ilang humanidad o pagkatawo kun wa silay mahimo sa kasakit sa nagkalisud.

Maingon tang usa ka exorcism sa ilang kultura ang pipila ka pelikula nga gipasundayag sa Cine Europa 14.