Gikinahanglan ang lawom nga imbestigasyon sa kamatayon ni Liu

Wa kahay  kalambigitan ang  misteryosong  kamatayon ni Bernard Liu niadtong  pag-ambush patay ni Ananias Dy nga iyang kaubang testigo sa kasong drug importation batok sa ilang mga kanhi amo nga sila si Peter ug Wellington Lim?

Mangambot na lang ko daan kun masulbad ba kining kamatayon ni Liu kay ang pag-ambush patay ni Dy niadtong tuig 2006  hangtud karon wa pa gyud kahatagi og hustisya.

Kun buot balikan ang ilang mga testigo kaniadto sa House Committee on Dangerous Drugs sa panahon ni kanhi kongresista Antonio Cuenco, mas bug-at ang deklarasyon  ni Bernard Liu kay sa kang Ananias Dy.

Si Liu mitumbok kaniadto ni Wellington nga silang duha kuyog sa Hong Kong aron mangompra didto og shabu ug ibutang sa golf set bag nga yano ra sang makasulod sa eroplano ug diha sa Mactan Airport.

Kumusta naman tuod kadtong ilang mga testimony? Gibasura na ug gihimo lang ilo sa mga sakop sa Kongreso?

Usa kini sa mga lapso sa gobyerno kay di gyud ka sustiner ang Witness Protection Program. Naghatag  kini og dili maayong mensahe kay makapatagam kini sa mga tawo ug motak-om na lang sa baba aron dili mamiligro ang kinabuhi.

* * *

Nalingaw ko sa among programang “Dialogue on the Air” sa dySS Super Radyo niadtong Sabado kay nabalaw intawon og panagang ug panubag sa mga batikos sa katawhan si Vince Cinches kinsa usa sa mga organizers sa Road Revolution nga nagplano na sab ug part 3 ug pasirad-an ang Osmeña Boulevard.

Usa sa mga mitumaw nga isyu, nga gigamit ni Cinches ang Road Revolution Movement alang sa iyang pulitikanhong tinguha nga molansar  pagka-konsehal  dinhi sa dakbayan sa Sugbu sa tuig 2013.

Matud ni Cinches nga wa sa iyang vocabulary nga mosulod sa pulitika ug matud niya nga residente intawon siya sa dakbayan sa Talisay.

Miklaro usab  si Cinches nga dili intawon tinuod kining nanggawas nga mga alegasyon nga ilang gi-apas ang dolyares nga funding gikan sa gawas kay matud nila nga tres mil ra ang kwarta sa ilang bangko.

Bahin sa road closure ug sa Road Revolution part 3 giklaro ni Cinches nga tulo ka buwan gikan karon posibleng mahitabo na sab ug iyang gipasalig nga tarongon nila ang preparasyon ug tarungon ang pagpahibawo sa katawhan kay naleksyon sila sa duha ka mga kalihukan nga gisaway pag-ayo sa publiko.

Bisan sila si LTFRB Regional Director Ahmed Cuizon, LTO  Assistant Regional Director Arnel Tancinco  ug Citom Executive Director nga si manlalaban Raffy Yap mipasalig na sa katawhan nga di sila magpasagad ug isyu og permit pagpasira sa kadalanan kun di plantsado ang tanan.

Ang lugar nga pasirad-an mao gyud ang Osmeña Boulevard gikan sa Provincial Capitol paingon sa dalan P. Del Rosario.

Unya ang adlaw ug oras nga gitun-an  sa pagsira mao nga itayming ug Domingo unya gikan sa alas-12 sa udtong tutok  ug tapuson inig ka alas-8 sa gabii.

Sa diskusyon  niadtong Sabado, ang tugtan lang nga maka-agi sa kalsada sa Osmeña Boulevard mao ang mga  PUJ ug mga sakyanan sa bombero, pulis, ambulance ug kadtong dunay emergency. Buot ipasabot nga total ban gyud sa mga pribadong sakyanan. Apektado na sab ang mga doctor ug mga nurse niining panahuna.

Dunay mga caller ug mga texter nga misugyut nga adto mag Road Rev sila si Cinches sa Cansumuroy, Balamban kadtong gihagbungan sa mga Iranian National o ba kaha sa Busay. Apan si Cinches mipasabot nga di gyud sila didto kay peligro.

Apan dunay mi-text nga di sab sila si Cinces sa South Road Properties kay wa nay motan-aw nila ug di na sila mosikat.

In fairness ni Cinches, iyang gipasabot nga di pasikat ang tumong sa ilang grupo kun dili mao ang paghatag og awareness sa katawhan nga minusan ang paggamit sa mga sakyanan nga maoy nakahatag og abog ug hugaw sa hangin ug ingon man ang paghatag og gahin diha sa kadalanan alang sa mga tawo nga buot mag-hike, buot magbiseklita ug mag-skateboard.

With all due respect, andam ko nga mosuporta ning maong kalihukan apan di  gyud rason nga sirad-an  ang kalsada kay hangtud karon wa sila did-i ug wa sila hikawi nga magsuroy-suroy sa kadalanan maglakaw o magbiseklita man.

Alang nako, mas nindot tingali nga ang Road Revolution Movement anha lang sila sa tibuok Fuente Rotunda ug puwede pang ihatag nila ang una ug ikaduhang lane nga nagtuyok sa oval.

Pwede sab nga ang tibuok dalan Colon ilang pasirad-an ug maoy ilang gamiton kausa matag buwan ug itayming lang sa gabii sa adlawng Domingo.

Pagkanindot tingaling  tan-awon sa dalan Colon ilabina kun ibalik ang karaan  kaniadto nga maglampara lang. Unya dunay mamaligya diha og tuba ug mga inato nga pagkaon sama sa suman, bibingka, biko ug uban pa.

* * *

Wa pa ko makaadto sa Mantayupan Falls nga anaa sa lungsod sa Barili nga nakontrobersya na sab kay dunay bag-ong kinasal nga nalumos patay niadtong udtong tutok sa adlawng Biyernes nga si Adriane Dela Rita nga taga Kalawisan, Opon dakbayan sa Lapu-lapu.

Si Adriane naminyo og taga San Rafael Barili ug gikasal sila niadtong Huwebes  sa Mayor sa Barili.

Matud pa ni Filomeno Leyson, tigpamaba sa Office of the Mayor sa Barili nga dihang ilang gisubay ang nahitabo ang asawa sa biktima puwerteng siyagit og tabang sa pagkalumos sa iyang bana apan way lifeguard nga nakabantay kay ang nadestino mika-on.

May plano karon ang opisina sa mayor nga bawion sa lungsod ang pagdumala sa Mantayupan Falls nga kasamtangang gidumala sa barangay Kampangga.

Apan dunay di katoho-an nga estorya diha nga matud pa dunay dakung kugeta nga gihinganlan ug “Mantaga” nga nagpuyo diha ug gituhoan karon sa uban nga maoy responsable sa paglumos sa mga biktima diha apil na ang bag-ong kinasal.

Ang higanteng kugita amigo matud pa sa usa ka “amang” nga normal og pangisip apan maglakaw nga hubo tanan.

Gawas pa dunay kahibugngan nga langub diha nga daku kaayo og lisud sudlon segun pa ni Leyson.

Apan in fairness sa kugita nga gidudahan nga maoy responsable, high blood intawon matud pa ang biktima ug gani daan nang  gihilantan.