Pagbutho sa giingong “seminal album” sa Nirvana nga “Nevermind,” manoy na ako sa generation nga misakay niani. Wa kaayo nako sinatia ang lyrics nga daw tigmo nga gituyo paglingla ug pagdani sa namati. Niadto gung tungora miagi na akog pagtutok ug pagtuki sa lyrics sa kanta sa Beatles, ni Neil Young ug Bob Dylan. Kay kini man sila maoy mga wordsmiths sa pop culture sa akong panahon. Mao nga pag-abot sa Nirvana gitugkan nako og tapul ug miingon ko nga ila na sad na.
Bisan og wa mo-dive paglawom para pagsabot sa ilang kanta (kay ang gitagaan ko og attention niadtong panahuna mao man ang mga kanta sa Eraserheads ug Yano), giganahan ra gihapon kos mga tukar nianing three-piece band nga Nirvana. Partly tingali sa ilang melodic nga tuno ug partly sa ilang mga isog nga tinukaran. Na-classify man sa hard rock nga genre ang maong banda.
Pagkadali baya sa panahon kay daw sa pipila lang kapamilok, 20 naman diay ka tuig sukad pag gawas sa album nga “Nevermind.” Kining sub-genre sa hard rock nga grunge diin nasakop ang Nirvana, naglakip sa Soundgarden, Screaming Trees, Alice in Chains, Pearl Jam ug tingali ang Smashing Pumpkins. Dunay sticker nga “alternative” ang mga album ning maong mga banda apan makalibog nga designation ang label nga alternative kay may sugyot man usab kini sa pipila ka mga accoustic acts.
Nagkanayon ang mga manunulat ug kritiko nga tungod sa mga complex melodic lines sa mga kanta, lawom ug sinsiro nga lyrics, mosikat gyud kining album nga “Nevermind.” Apan dako kuno og natabang ang timing sa release niani. Gipul-an na kuno ang mga tawo sa hair metal nga puros party ug chix ang lyrics ug gamay ra sad ang nakauyon sa death metal bands nga ang mga kanta naa ra magtuyok sa mga medieval mythology, puros dungeons ug dragons. Gidawat dayon ang “Nevermind” sa mga bag-ong tubo naidtong panahuna isip una sa mga album diin ang melodic hard rock nga mga kanta may kalabutan sa personal nga kasakit ug problema sa ilang mga ka-edad. Mga issue sama sa bullying, molestation ug abuse maoy kasagaran nga kabahin ang maong mga kanta.
Misamot pagsikat ang Nirvana dihang gahikog ang ilang front man nga si Kurt Cobain. Ang ilang katapusang drummer nga si Dave Grohl naghimog banda nga Foo Fighters. Ug ang partner ni Cobain nga ang bahista nga si Krist Novoselic naghimog pipila ka banda apan mas aktibo siya isip usa ka political activist.
Ang anak ni Cobain nga si Frances Bean usa na karon ka painter ug model sa edad nga 19 anyos. Anga bata nga galangoy sa swimming pool para mokab-ot sa usa ka dollar bill nga mao si Spencer Elden, 20 anyos na usab karon ug miingon nga mitabang lang ang iyang papa sa higala niani nga dunay photo assignment ug maong gi-itsa siya sa pool.
O ania, para sa mga nangiat niadtong dekada ‘90, ang “Come as You Are” sa Nirvana nga gikan sa “Nevermind” album.
Come as you are, as you were, as I want you to be/As a friend, as a friend, as an old enemy/Take your time, hurry up, choice is yours, don’t be late/Take a rest, as a friend, as an old memory/Memory ah, Memory ah, Memory ah/Come doused in Mud, soaked in Bleach, as I want you to be/As a trend, as a friend, as an old Memory ahhh/Memory ahh, Memory ahh, Memory ahh
Chorus: And I swear that I don’t have a gun/No, I don’t have a gun/No, I don’t have a gun
Memory ahh, Memory ahh, Memory ahh, Memory ahh. (Don’t have a gun.)
Chorus: And I swear that I don’t have a gun/No, I don’t have a gun/No, I don’t have a gun/No, I don’t have a gun/No, I don’t have a gun/(Memory ahh, Memory ahh)