Swerte pa si PB Member Teban
Kining pagkatalawan sa tawo makatabang gyud usahay batok sa mga dautang elemento.
Sama sa nahitabo ni Provincial Board Member Julian Bacus Daan nga mas nailhan nga “Teban” nga gitulis niadtong Lunes sa buntag sulod sa iyang panimay nga kun nag-inisog pa niadtong higayuna tingali siya maoy gisunod paghaya gikan kang anhing Vice Gov. Greg Sanchez.
Mag-unsa man gud ang alahas, kwarta ug ubang bahandi kun napatay pa si bokal Teban?
Kadtong sitwasyuna delikado gyud kun nakasukol sila si Teban ug ilang katabang kay sigurado gyung pamatyon ngan nga kaila ra, paryente ug silingan pa gyud. Mao bitaw nga nagtaptap ang tulisan.
Sa duha ka mga dinakpan, si Julius Racaza hugot nga nanghimakak nga duna siyay partisipasyon sa krimen. Matud niya nga igo ra siyang giduhig sa unang nasikop nga si Rameses Abatayo kay nagtanom kini og kalagot kaniya.
Apan si Rameses Abatayo hugtanong mitumbok kang Racaza nga apil gyud sa kasong pagpanulis.
Kagahapon nadunggan sa kahanginan sa tibuok Kabisay-an ug Mindanao ang kalagot sa kapikas ni bokal Daan nga si Yolly dihang gihatagan siya og higayon pagkonprantasi sa duha sulod sa police station sa Talisay.
Di ko makabasol sa iyang reaction kay natural lang gyud kadto isip biktima. Nakatilaw gyud diay og santako ang duha.
Tiaw muna mi-abot ug 1.2 milyones ka pesos ang balor sa mga alahas nga nadala. May lang gani kay nabalik ang uban.
Apan luyo niining tanan, kinahanglang pasidunggan ug hatagan og promotion ang tanang sakop sa kapulisan sa dakbayan sa Talisay nga nakaapil sa malampusong pagdakop nila ni Racaza ug Abatayo.
Sakto gyud ning panultihon sa atong katigulangan nga mas maayo pa nga makasilingan kitag ungo nung kang kawatan.
* * *
Pwerteng daghana sa nag-ilog sa puwesto sa katungdanan pagka Ombudsman hulip kang resigned Ombudsman Merceditas Gutierrez.
Sa 38 ka mga kandidato nga gipang-rekomendar, 25 ra ang midawat sa nomination basi sa report sa Judicial and Bar Council.
Wa maapil og hisgot ang pangan sa atong Deputy Ombudsman for the Visayas Pelagio Apostol nga usa sa mga intresado.
Apan ang Sugbuanong Court of Appeals Justice Portia Aliño Hormachuelos apil sa listahan nga gipagawas kagahapon.
Si Ma’am Virgie Santiago nga akong pambato daan nang mibalibad ug nakasabot ko kaniya kay medyo gikapoy na sa pagpangalagad og duol na kaayo ang iyang retirement.
Si Justice Gabriel Ingles sa Court of Appeals Cebu Station nagkanayon nga mas maayo gyud unta nga gawas nga ligdong ang mahimong sunod Ombudsman, kinahanglang batan-on gyud aron taas ang serbisyo ug makahimo pag daghang kaayuhan sa opisina nga napuno sa mga intriga ug kontrobersiya.
* * *
Naluoy kaayo ko niadtong Catherine Cinco usa ka Human Resource Consultant nga taga Dipolog nga wa atubanga sa tag-iya sa hotel nga iyang gi-estaran nga didto siya nawad-i sa iyang mahalon nga butang sama sa laptop computer ug digital camera sulod sa iyang hotel room.
Si Catherine midangop kanamo sa GMA-7 didto sa Mandaue Cultural and Sports Complex atol niadtong hinapos nga hapon paggama sa pinakadaku nga bibingka sa kalibutan.
Samtang nagsadya ang kinabag-an nga misaksi sa biggest bibingka apan nagpatulo sa iyang mga luha si Catherine nga miatubang kanako.
Matud niya nga inay siya tabangan ni Mr. Christopher King nga maoy tag-iya sa KL Premier CITI Suites Inc. apan wa siya atubanga. Igo ra siyang gitawgan sa intercom ug gihagit nga pakihaon na lang.
Gawas niini, duna pay mga sambingay si King ngadto kaniya nga misantop sa mga pagduda nga anaa siya sa sindikato ngan nga laptop ug digital camera maoy gikawat.
In fairness ni Mr. King ang GMA-7 naningkamot nga makuhaan sa iyang habig apan wa pasudla si Darlene Seno Cruz. Ug igo rang nanugon sa front desk nga pakihaon na lang si Catherine.
Mao kini ang nakadiperensiya sa mga negosyanteng kwartahan ug dunay gisaligan sa gobyerno kay isog na kaayo sa ilang mga customers.
Hinuon, anaa ra ni Catherine kun mokiha ba gyud. Apan daku kaayog mata ug dunggan ang Ginoo batok niining mga madaug-daugon.
