RSP Gubalane ‘way kauwaw?’

Kumusta na si kanhi Cebu City mayor ug karon  Rep. Tomas Osmeña sa south district nga giingong gidala sa Chong Hua Hospital niadtong Sabado sa hapon human nga nagpuot ang  iyang dughan?

Pagkatayming baya intawn kay samtang anaa siya sa sulod sa ospital  didto  kami sa Fuente Osmeña circle kay didto nagmanukad among sibya  sa programang “Dialogue on the  Air” sa dySS Super Radyo uban kang Cebu City Mayor Michael Rama  nga  naghisgot og pagsupak sa duha ka mga flyovers nga ipatukod ni kongresista Cutie Del Mar ug kang kongresista  Tomas Osmeña sa may Mambaling SRP.

Wa malikayi  ang  pagduda sa akong mga bisita  nga ang hinungdan   sa pagkalandig ni  Osmeña mao ra  gyud si Mayor Rama nga  nangugat batok sa mga flyovers.

Di gyud matuis ang baruganan ni Mayor Rama  nga kinahanglang unahon ang pagpalapad sa mga kalsada sa dili pa ang pagbutang sa mga flyovers.

Si Joel Lee ug mga kaubanan sa Stop Cebu Flyovers Movement nanghugyaw sa balita  nga ang Regional Development Council  nagpasar og resolusyon nga  magtukod og technical working group aron ipa-review ang tanang mga proyekto gikan sa tuig 2005  lakip na ang  mga flyovers.

Si kanhi kongresista Raul Del Mar, amahan  ni kongresista Cutie Del Mar, mipadayag  nga ang duha ka mga flyovers makatabang gyud sa problema sa trapiko.

Wa siyay  pagsupak sa tinguha nga kinahanglang palapdan ang mga  kalsada  ug pag-abli og mga bag-ong daan pagsulbad sa trapiko.

* * *

Pagka-way delicadeza  ni Regional State Prosecutor Fernando Gubalane kun tinuod ang alegasyon ni Cebu Assistant City  Prosecutor  Mary Ann Castro nga nag-shopping kini ngadto sa lain-laing mga Local Government Units (LGUs)  sa pagpangayo og allowances.

Matud pa ni piskal Castro nga  si Gubalane  dili angayng modawat  niini  kay wa siya mo-serbisyo sa mga LGUs nga iyang gipangayoan og binuwan nga allowance.

Gani nakakuha si piskal Castro ug dokumento nga pirmado sa usa ka assistant commissioner  sa Commission on Audit  nga si Gloria Cornejo  nga nagmando ni Gubalane nga mo-refund sa iyang gidawat nga mga allowances.

In fairness hinuon ni Gubalane sa akong interview kaniya, wa niya  angkona nga nangayo siya og cash allowances gikan sa mga LGUs sa dakbayan sa Danao, Bogo, Lapu-Lapu, Toledo, Dumaguete ug Tagbilaran.

Ang iyang giangkon mao ang kadako sa iyang binuwan nga sweldo  ug ang mga lain-laing mga allowances gikan sa Department of Justice ug ang mga allowances gikan sa Cebu City Government, Cebu province, Mandaue City ug  Talisay City.

Basi sa pasangil ni piskal  Castro,  si Gubalane  gawas nga magdawatan ug P71,500 nga suweldo, mo-income  kini og P31,100 nga allowance gikan sa DOJ ug laing P38,000 gikan sa lain-lain mga LGUs.

* * *

Obligasyon sa taga-gobyerno ang pagsakmit niining mga appliances ug ubang mga Christmas decorations nga mga substandard nga delikado kaayo sa sunog.

Maglaum ko nga dili inutil ang taga Bureau of Customs  niining mga pinalusot  nga mga produkto nga China-made nga ma-display nalang sa atong mga kamerkadohan.

Nanawagan sab ko sa publiko nga di magpasagad sa pagpalit og mga Christmas décor nga magbutang sa risgo sa tibuok pamilya.

* * *

Daghan kaayong salamat  sa taga-San Miguel Brewery Inc. nila ni Ma’am Girlie Garces ug sa taga Kepco-SPC Power Corp.  nga maoy mga major sponsors sa among culmination night  sa Cebu Press Freedom Week niadtong Sabado sa gabii.

Bisan late na ko nga nakaadto sa venue sa Laguna Garden Café sa may Ayala apan nakasaksi gihapon ko ug naka-abot sa kamaya ug hudyaka sa akong mga kaubanan sa tri-media.

Pagkanindot tan-awon kun ingon ato kanunay ang sitwasyon nga kalimtan ang kompetisyon.