God and math
Nyor Daku (ND): Nyor, managhid lang ko nimo ha.
Nyor Gamay (NG): Unsa man, Nyor?
ND: Kanang ako untang eksaminon ang imong pagtuo.
NG: Unsa nga pagtuo man na, Nyor?
ND: Basic lang gud. Kabahin sa Ginuo. Sa Simbahan. Sa kamatayon ug uban pa.
NG: Kahibawo baya ka, Nyor, nga di tig simba sa amo. Kay adtong gagmay pa ang among lolo, adto man mi dad-on sa buwangan. Di man sa simbahan. Pero sige, eksamina lang ko, Nyor, para malingaw ta.
ND: Dunay baligya, Nyor, nga baseball bat ug bola sa baseball. Gipresyuhan silag P110. Ug giingon nga mas mahal ug P100 ang bat kaysa bola. Tag pila man ang bola?
NG: Ha? Unsa? Pagtarong kunos imong pagkatao, Nyor.
ND: Did I say something wrong, Nyor?
NG: Something wrong ka dyan! Nananghid ka nako nga imo kong eksaminon parte sa pagtuo unya nganong napunta man ta sa math? Salig ka abi nakapasar kas geometry. Parehas baya tang nangamote sa trigo ug calculus. Abi nakog ipa-recite nimo nako ang Padre Nuestro o ipa inumerate ang Station of the Cross.
ND: Salig lang nako, Nyor. Tubaga lang ang pangutana ug atong mahibawoan ang gilabmon sa imong pagtuo.
NG: Usba to, Nyor, be.
ND: Ang bola ug ang baseball bat gibaligya og P110. Labaw og P100 ang presyo sa bat. Tag pila ang bola?
NG: Hahaha, sakpan naka, Nyor. Gilamdagan kos kahitas-an nga palipat nang imo. Trick question kana.
ND: Dili, Nyor, uy. Straight ning akong pangutana. Be, unsa may tubag nimo kon trick question man gani ni?
NG: Libre ang bola, Nyor, kay da kini sa set. Unsaon man nimong bola kon way bat? Unsaon sad nimong bat kon way bola? Ibunal sa iro ug iring nga sungkaban?
ND: Sorry, Nyor. Apan sa imong tubag daw ikaw ang panuway. Ikaw tingali ang demonyo.
NG: Ha?
ND: Kay sa akong nabasa duha ra man untay tubag. Lahi ra man ning imo.
NG: Ha?
ND: Matud pas gi-post sa LiveScience.Com didto sa Yahoo kaganina ang motubag og “10” mao ang mga intuitive nga tao nga maayo mo tagna og maayo molihay. Sila usab ang mga tao nga dako ang pagsalig sa Ginuo.
NG: Unsa may laing tubag, Nyor?
ND: Ang laing tubag—singko. Ug mao kini ang tubag sa mga tao nga reflective. Mga tao nga mahinuklugon. Mga tao nga kusog maminsada ug di kaayo mosalig kahitas-an.
NG: Unsa may sakto nga tubag, Nyor?
ND: Singko.
NG: Sa ato pa, Nyor, bugo ang motuo sa Ginuo?
ND: Di sad tingali, Nyor, kay daghan mang mga bangiitan nga scientist nga hugot ang pagtuo sa Ginuo. Tingali hinay lag arithmetic ang mga biata ug diboto.
NG: Ayawg tuo anang mga Amerikano, Nyor. Mga pahungpahung na sila, Nyor. Pataka lag survey.
ND: Aw, hinuon…
