Misamot karon ka lig-on ang pundok nga nagsupak niining duha ka mga flyovers nga pangtukoron diha sa barangay Kamputhaw ug barangay Carreta ning dakbayan nga pasiugdahan nila ni Congresswoman Rachel “Cutie” del Mar ug sa iyang amahan nga si kanhi kongresista Raul del Mar.
Alang nako, nagkinahanglan kini og dialogue ug sabot-sabot tali sa mga proponent ug sa mga mosupak niini.
Gani nakadesider kaming mga naglangkob sa News and Public Affairs sa dySS Super Radyo nga kini maoy among topic karong Sabado sa among sinimanang tulumanon nga “Dialogue on the Air” nga magsugod alas 2:30 sa hapon.
Kagahapon, ang presidente ug media liaison sa “Stop Cebu Flyovers Movement” nga sila si Joel Lee ug Louella Alix miadto sa among sibya-anan aron pagpadayag sa ilang sentimento.
Ang grupo nila ni Lee mipasalig nga motunga usab sila karong Sabado. Naglaum ko nga motunga ang among mga pangimbitahon sama nila ni Kongresista Del Mar, Mayor Michael Rama ug uban pa.
Mas maayo man gani nga motunga og apil kadtong mga nagpasiugda sa signature campaign bisag taga-south district kay basig duna silay bug-at nga katarungan.
* * *
Unsay nahitabo ni Lyndon Horandoy nga giingong maoy trigger man sa pag-ambush patay ni Piskal Patrick Osorio?
Akong nahibaw-an karong bag-o nga nag-atras-abante siya sa iyang pangangkon nga duna siyay papel sa krimen.
Niadtong Lunes, akong naobserbahan sa korte si Horandoy nga naghilak samtang nag-istoryahanay sila ni manlalaban Jonathan Talabo kinsa maoy miabag kaniya pagpirma sa extra-judicial confession.
Way nahimong arraignment ni Horandoy kay nagmakuli si Talabo pagserbisyo kaniya kay nagkasumpaki na sila.
Matud pa ni Talabo, kun consistent pa si Horandoy nga moangkon gyud sa krimen, andam siyang moabag.
Tungod kay nahibaw-an niya nga di gyud mo-angkon si Horandoy mao nga gimanduan niya nga mangita og laing abogado nga moasister kaniya.
Apan si Chief Insp. Romeo Santander miingon nga wa sila mabalaka niining usab-usab nga sulti ni Horandoy kay alang kaniya nga normal kini sa tawo.
Gawas pa ang importante nga nakapirma siya sa extra-judicial confession sa boluntaryong pamaagi nga wa bun-oga ug wa kulataha.
Andam nilang patestigohon sa korte sila si Talabo ug ang piskal nga nag-subscribe sa panahon unya nga magbista na.
* * *
Nakatawa ko sa ordinansahon ni Cebu City Councilor Nida Cabrera nga mag-require gyud sa mga buot magminyo ug magpakasal nga patamnon og lima ka puno-an sa kahoy sa dili pa hatagan og marriage license.
With all due respect ngadto sa konsehala, maayo ang iyang katuyuan apan hasol na kaayo kini sa mga magpakasal ilabina nga pulos mga trabahante nga maglisud gani og leave sa trabaho aron lang sa pagkuha sa mga dokumento nga rekisitos sa kasal, pagtambong sa mga seminars og ang mismong pagpangandam sa actual nga wedding ceremony.
Alang nako, di na kinahanglan nga maggama pa kita og ordinansahon kabahin niini kay insulto kini kanatong mga Sugbuanon kay kitang tanan kagikan sa mga mag-uuma.
Inay magpasar og ordinansahon, nganong di na man lang magpahigayon ang taga-gobyerno og regular nga tree planting activities nga boluntaryo natong salmutan?
Kun ipaagi og balaud gud, mawa ang atong kultura sa pagkamaandamon nga motabang.
Kun mapasar kini, buot bang ipasabot nga responsable na kita nga makatanom sa usa lang ka higayon sa tibuok natong kinabuhi?
* * *
Mas bintaha na karon nga ubay-ubay na sa atong kapulisan ang magbantay sa atong palibot 24 oras.
Kagahapon, gi-anonsyo ni Budget Secretary Florencio Abad nga iya nang gi-release ang P1.03 billion nga maoy i-sweldo sa 6,451 ka mga bag-ong pulis.
Di pa sab dugay gipagawas na ang budget nga P 1.75 billion alang sa pagpamalit og mga kagamitan sa Philippine National Police.
Naglaum ko nga gamay ra ang mabulsa sa mga buaya diha sa PNP aron molambo ilang panerbisyo sa katawhan.