Gawasnon ba gyud kaming mga sakop sa media?

Sa tinuod lang, sagad sa among mga kauban sa trabaho nagkagidlay gyud sa panginabuhi.

Kini tungod kay kasagaran sa mga sakop sa media gagmay ra og sweldo  unya layo ra kaayo sa benepisyo ikomparar sa ubang kompanya.

Ang nakapait pa gyud sa uban, kay bisan hapit na lang pangayoon ang serbisyo unya dugayon pa paghatag ang sweldo.

Maayo unta nga usa sa mga himoong krusada sa mga nag-una sa duyan ug giilang mga haligi sa industriya ang pag-umol og core group  aron maoy tahasan sa pakig-dialogue sa mga tag-iya sa mga media outlet pagtubag sa mga pagkuwang ug mga problema.

Unsaon man ang pagkagawasnon sa kinatibuk-an sa mga sakop sa prensa kun gilisud-lisod na sa sweldo ug mga benipisyo? Ayaw kog ingna nga magsige  lang ta og singgit sa atong mga katungod ug pagkagawasnon unya nagkutoy ang tiyan sa atong mga kauban?

Dili siguro lisud estoryahon ang mga tag-iya kay nasayod sila kun unsa karisgo ang trabaho sa mga sakop sa prensa ug deserving ang  prensa sa Sugbo  nga makabaton og hamugaway nga panginabuhi.

Niining paagiha, di na siguro kinahanglan nga modangop pa sa Department of Labor o ba kaha ang pag-umol  og trade union.

In fairness hinuon, sa akong  kinatibuk-ang obserbasyon, nga bisag  dyutay ra ang sweldo, apan nagpabiling gawasnon ug mibarug ang Cebu media pagsangyaw sa mga tinuod nga balita.
* * *

Nakadayeg kaayo ko sa kaisog  ni Regional Trial Court Judge Soliver Peras sa iyang pagtratar  niining kasong parricide batok kang Philippine Benevelont Missionaries Association Supreme Master ug kongresista  Ruben Ecleo Jr. kay wa kini mobakwi sa iyang unang kamanduan nga nagkanselar  sa P1 million nga  pyansa sa akusado ug wa molibkas sa gi-issue nga warrant of arrest.

Miingon si Judge Peras kanako nga di gyud niya tugtan si Ecleo nga mobutang ug mopyansa nga tres milyones ka pesos kun dili  kini mo-surrender.

Gihagit  ni Judge Peras nga motahan una si Ecleo sa di pa kini magsigeg  hangyo.

Ang nakaporke ni Ecleo kay iyang gitunto ang korte kay bisag taud-taud na ang  kamanduan nga magpaubos siya sa heart by-pass operation apan wa gyud  kini himo-a  ni Ecleo.

Insakto  kining baruganan sa prosecution nga kinahanglang ibalik si Ecleo sa prisohan kay daghan nang mga negatibong  komentaryo batok sa korte nga matud pa nag-ayo  lang manggukod sa mga kabus.

Pero dunay Ecleo nga impluwensyado ug kwartahan, wa gyud makatay-og  ang husgado.
* * *

Nasulbad na  ba gyud ang kinawatay sa mga bugas humay (National Food Authority rice) sa  gipondohan ni Provincial Social Development Officer Marivic Garces diha sa Cebu Provincial Detention and Rehabilitation Center (CPDRC)?

Kumusta na man tuod ang kinatibuk-ang imbestigasyon sa Kapitolyo bahin sa initial findings ni Capitol Consultant  Retired Col. Cesar Veloso nga matud pa pirme ang kinawatay sa stock sa mga bugas diha sa CPDRC?

Wa bay laing mga opisyal nga manubag sa kinawatay sa bugas? Unsa may gihimo ni Garces karong bag-o aron di na masubli?

Niadtong Biyernes sa buntag pormal,  nang  nag-atubang sa korte og kasong qualified theft si Antonieto Babor ang prison guard nga giingong maoy nangawat sa 35 ka sakong bugas niadtong Abril 25.

Mirisi kang Babor kay ang iyang pyansa nga 60 mil pesos mas mahal pa sa iyang gikawat nga bugas nga mibalor lang ug 47  mil ka pesos.

Pero in fairness ni Babor,  di pa nako sirad-an ang akong pagtuo nga gihimo lang siyang sacrificial lamb sa kinawatay sa bugas.

* * *

Sa akong basa,  self-serving kining gihimo sa taga-Philippine Drug Enforcement Agency (PDEA) Manila  nga naglibre sa kasong administratiba  sa ilang agent nga si Steven Valles kinsa gidakop sa giingong buy bust operation sa kapulisan sa Bohol.

Mas maayo  tingali  nga ang Visayas Ombudsman maoy mopahigayon og lina-in nga imbestigasyon aron mas klaro ang resulta.

Pagkanindot paminawon nga malibre si Valles  sa imbestigasyon gikan sa usa ka opisina nga independente.

Si  manlalaban Mauro Licen,  legal counsel sa PDEA-7 miklaro nga wa pa maabswelto sa kasong criminal sa kasong RA 9165  si Valles.

Gani sumaa pa ni Licen,  ugma pang adlawa  i-arraign sa kaso si Valles.