Mirror, mirror, on the wall, humana ang World Cup sa mga bading
Bisag di ka ganahag boxing, matandog ra gihapon ang imong kinabuhi kon dunay away si Manny Pacquiao kay ang tanan nimong kaila gaatang man nianing maong mga kumbati. To a lesser degree, mao usab kini ang scenario sa World Cup, NBA championship ug Miss Universe.
Dgahan man untang beauty pageants sama sa Miss World, Miss International ug Miss Earth pero kini mang kang Donald Trump nga Miss Universe maoy nahimong World Cup sa mga pageant junkies, labi na sa mga gay.
* * *
“Buanga aning Miss Universe, bai, mura man sad diay nig boxing—moabot man sad og milyon ang primyo.” Nagkanayon ang driver sa taxi nga akong nasakyan niadtong si Venus Raj ang atong kandidata sa maong bangga sa kaanyag.
* * *
“How come the winner of Miss Universe always comes from Earth?” —Wilfredo Almendralejo Rodolfo III
Bitaw no. Misnomer ang pageant? O nagpasabot lang kini sa kahakug sa tao (human race) nga buot moangkon ug maghawud sa tanang butang?
* * *
Sa mga ingon niani nga event diin ang tanan dunay valid opinion (sayop man o sakto) ang Facebook maoy sabongan.
Ug mao nga dinhi ning maong site gasyagit gikan sa Kansas ang among higala nga si Mike O alang mopahungaw sa iyang ka dismaya sa kapakyasan sa atong manok pagkuha sa korona ning pinakainila nga bangga sa kaanyag.
Sama sa kasagaran ang bone of contention sa iyang pagpyait mao ang performance sa mga kandidata sa question and answer portion. Perfect gyud alang ni Michael ang tubag ni Miss Philippines Shamcey Supsup.
Ug wa pa gyud mihubas ang iyang kalagut iya pung gihisgutan ang butligbutlig ug facial hair kuno sa nawong ni Miss Angola. Nianing tungora mibuhakhak kog katawa kay murag gabutbuto gyud ang dughan ni Mike sa kalagut.
Apan kaming mga higala niya ngari sa Sugbo, sama kang Ronald ug Niza dapig kang Miss Angola. Daghan usab kanamo diri wala mobilib sa gisulti ni Supsup. Alang kanako parochial ra kaayo ang perspective sa atong kandidata, pang Miss Sinulog ra kaayo.
Gipangutana usab si Lea Salonga sa press kabahin sa iyang pangutana para ni Miss Angola Leila Lopes ug mibutyag ang Pilipina Broadway star nga gisuwat na daan sa organizers ang pangutana ug nga igo na lang siyang mibasa niani.
* * *
Dili kalikayan duna gyuy controversy kining mga beauty pageants. Bisan pa gani sa Greek mythology. Nagkanayon ang mitos nga gipapili si Paris, nga usa lang ka tigtugway sa karnero, kon kinsa sa mga Diyosa ang pinakamaanyag—si Hera ba, si Aphrodite ba o si Athena. Unya bisan tuod og diyosa na sila apan tandugunon gihapon ilang garbo isip babaye mao nga silang tulo misuway paghaylo kang Paris nga silay pilion. Gihayluan siya ni Hera ug gingharian nga maglakip sa tanang binuhat, gisaaran siya ni Athena sa kadaugan sa gubat. Apan gidani si Paris sa saad ni Aphrodite nga maiya si Helen sa Troy nga maoy pinakamaanyag nga mortal niadtong higayuna. Dayag na lang nga pwerting gubota dihang gipadaug ni Paris si Aphrodite. Gani tungod man kuno ning maong pageant nga nahitabo ang Trojan War.
Hinon ang unang recorded nga beauty contest sa Greece pang lalake man.
