May tubag na ang kapulisan sa pagduda ni manlalaban Jesus Osorio, amahan ni anhing piskal Patrick Osorio bahin sa giingong kahuyang sa ebeidensiya sa kaso batok sa mastermind sa krimen.
Si Chief Insp. Romeo Santander, hepe sa Criminal Investigation and Intelligence Branch sa Cebu City Police Office, nagkanayon nga bug-at na gyud kaayo ang ebidensiya batok sa utok sa krimen.
Gikompirmar ni Santander nga naka-execute na og extra-judicial confession ang ilang nadakpan nga si Lyndon Horandoy ug duna gyuy pangan kun kinsa ang nagsugo kanila nga ipapatay ang piskal.
Pero ang ako ba, unsa may gilangayan pagkiha sa mastermind kun lig-on na ang ebidensiya sa kapulisan?
* * *
In fairness ni former Cebu City councilor Nestor Archival nga maoy tag-iya sa NA Systems Inc. nga akong naistorya kagahapon, iyang gipanghimakak ang mga alegasyon sa iyang mga kanhi trabahante nga mga electricians nga ilang gitumo-tumo-an sa kasong qualified theft.
Iyang gi-insister nga nangawat gyud sa mga electrical wires ang unom niya ka mga kawani niadtong Aug. 31 sa gabii sa eBLOC Building sa I.T. Park sa barangay Apas hinungdan nga ilang gipadakop ug gani napriso gyud sud sa 12 ka adlaw ug napabuhian niadtong Lunes.
Apan ang duha sa unom ka mga trabahante ni kanhi konsehal Archival nga sila si Rolando Bandolon Pepito ug Antonio Gansan Villanueva nga maoy among naabtan nga paingon nang manguli gikan nga gi-dismiss ilang kaso sa piskaliya mipadayag gyud nga gibinuangan sila sa ilang HR ug admin officer nga si Jose Forzado III nga maoy nagtumo-tumo pagkiha kanila.
Basi sa records, gi-dismiss ni piskal Mario Ley Gidayawan ang ilang kasong qualified theft kay dunay affidavit of desistance si Forzado.
Tungod kay nagpatambag ang duha ug ilang kabanay kun unsay ilang mahimo ilabina nga gikonsiderar na silang gipangtaktak sa trabaho ug gipapirma sila og quitclaim mao nga among gidala ni Karlon Rama sa Sun.star Daily ngadto sa buhatan sa Public Attorney’s Office kon PAO.
Gumikan kay miingon gyud sila nga wa sila mangawat ug inosente sila mao nga gitambagan sila nga mokiha na lang sa National Labor Relations Commission kon NLRC og kasong illegal dismissal.
Gani si manlalaban Danilo Tenebro sa PAO miingon nga andam silang motabang sa mga kawani.
Nagtuo sila si Pepito ug Villanueva nga gi-frame sila sa kompaniya tungod kay dugay na silang nanerbisyo ug nahadlok nga makabayad kanila og daku sa ilang mga benepisyo. Si Pepito matud niya mi-abot na og 15 ka tuig samtang 13 ka tuig si Villanueva.
Apan matud sa kanhi konsehal, andam niyang atubangon ang bisan unsang kaso kay wa sila magtumo-tumo og kiha.
Ang rason ni Archival nga misibog sila sa kaso kay nadala sila sa mga luhod-luhod ug pagpangayog pasaylo sa mga asawa og kabanay samtang napriso ang unom.
Iyang gipasabot nga ang sayop lang gyud niya kay nganong nadala siya sa luoy-luoy nga karon siya na maoy gipakadautan.
* * *
Tugoti nga mopasabot ko ngadto ni kanhi City Councilor Nestor Archival sa trabaho namong mga sakop sa media kay iyang gi-kwestyon kun nganong amo pang gibalita niadtong Lunes ug namantala kagahapon dinhi sa Cebu Daily News ang reklamo sa iyang mga kanhi electricians.
Matud niya sa among panag-estoryahanay kagahapon sa telepono nga unta pagkadaghang balita nga among isabwag apan nganong siya may among ibalita. Nagduda pa siya sa media nga may interest kaniya.
Buot ipasabot ni Archival nga ang reklamo sa iyang mga tawo nga legitimate complaint amo na lang piyungan? Kanyahay ra nga daghang mag-rebelde ning nasuda kun mao ni.
Di ko makabasol sa mga nangreklamo nga mipadayag og kahadlok kay kinsa ra man silang mga kabus ikomparar sa kanhi konsehal nga gihugan-huganan kaniadto nga matudlong environment secretary?
Namasangil pa siya nga kaming mga tigbalita mga iresponsable kay kuno wa namo siya tawgi sa wa pa ipublikar.
Pagkatinuod gitawgan siya pasado alas singko sa hapon niadtong Lunes sa among kauban dinhi sa CDN nga si Ador Mayol aron makatubag sa isyu apan dili siya ma-kontak.
Gi-teksan ug gitawgan pa ni Ador mga pasado alas-9 sa gabii apan wa gyuy reply ni Archival. Ang rason niya kay busy siya ug dunay meeting nga gitambungan unya kagahapon na sa buntag siya nabasa ang mga text messages ug nabantayan ang missed calls.
Mao ni ang nakadaut kay negative na gani ang isyu gahi pa sa kusahos manubag.
Ang media di makapa-abot sa tubag una ipublikar ang balita. Mora baya siyag wa mag-agi pagka opisyal ning harang dakbayan!