Dalaygon ang Dios!

Gikalipay kaayo nako og dako ang desisyon nilang Cebu Governor Hilario Davide III ug Provincial Attorney Orvi Ortega nga hingpit nilang gipasaylo ug dili na nila pasakaan in the spirit of Christmas og kasong theft si Manang Nessie Torralba—kadtong trabahante sa canteen sa Kapitolyo nga nangawat og mga relief goods.

Salamat ninyo Governor Jun kay nagpakita kini nga dili kamo mga tig-a og kasing-kasing ug kamao sab maminaw sa sugyot sa mga ordinaryong tawo nga nakapaminaw sa akong programa sa dySS Super Radyo nga mipadayag nga pasayloon na lang siya dihang nagminatay og hilak si Nang Nessie nga nangayo og pasaylo sa iyang nahimo.

Sa sitwasyon ni Nang Nessie angay lang gyud siyang pasayloon kay iyang gipakaubos og samot ang dignidad sa iyang pamilya nga way kaulaw nga miangkon sa kahanginan nga nahimo niya ang pagpangawat tungod kay iyang gipakaon sa iyang mga sakop sa pamilya nga nagkutoy ang mga tiyan.

Daw sama nga gikumot akong kasing-kasing niadtong tungora dihang nagbakho si Nang Nessie atubangan sa among microphone kinsa nagbalik-balik sa pangayog pasaylo nilang Governor Davide.

Kinsa gud tawon ang di maburyong sa problema nga ang iyang suweldo nga tag P200 ang adlaw sa canteen maoy gisaligan sa pito ka mga sakop sa pamilya unya iyang bana nga panday dili na makatrabaho kay baldado na unya may tambal pa nga ipa-inom.

Again salamat ninyo, Gov! Sangko sa langit ang kalipay ni Nang Nessie karon!

* * *

Wa gyud ko masipyat nga salikwaot kaayo ang gigamit nga termino ni Cebu City Mayor Michael Rama nga “Calamity Assistance Fund kon CAF” kadtong tag P20 mil nga ilang gidawat karong bag-o isip additional sa tag P10 mil nga Christmas bonus.

Sa pangangkon lang daan ni Mayor Rama nga ang napuntahan sa iyang P20 mil maoy gibayad sa koryente, tubig ug utang, nagpakita lang nga na-defeat gyud ang purpose sa iyang CAF.

Kun gigamit pa lang ni Mayor Rama ang P20 mil ngadto sa pagpanapak sa mga buslot sa iyang atop ug pagtapak sa mga liki sa ilang semento, mohaum unta og gamay.

Pero bayad sa utang, tubig ug suga medyo nabawhag gyud ang “Calamity Assistance Fund” ngan nga regular kini natong obligason isip padre de pamilya.

Insakto sila si Konsehal Margarita Osmeña nga wa mokobra kay dili sila biktima sa mga kalamidad.

Sama lagi sa akong giingon sa unahan nga bisag mag-survey pa ang taga-City Hall sa 2 mil kapin ka mga kawani ug mga opiyales nga recipient sa tag P20 mil, may lang sigurog makaabot og 2 porsiento ang mga biktima sa kalamidad.

Laksot ba gyud hinganlan kadto nga extra bonus o ba kaha extra cash gift?

Kining mga saad ni Mayor Rama nga tag P6 mil ang ilang ipanghatag karong Enero sa mga sakop sa senior citizens ug sa dawatonon sa mga PWD kon persons with disability unya nako motuo kun moabot na.

Kay basig mangapusoy na sab ang mga tiguwang sama niadtong Dec. 21 nga distribution nga wa matuman ang tag P4 mil sa mga lolo ug lola.

Gawas niini, ipaklaro intawon ni Mayor Rama ang insaktong schedule sa distribution kay niadtong petsa 21 daghang reklamo ang akong nadawat gikan sa taga south district kay bisag sa hapon pa ang schedule apan nanghatag na nianang pagkabuntag inay schedule sa taga-north district ang sa buntag nga distribution.

Kun wa lalisa sa akong mga tigpaminaw kay maoy gipa-anonsiyo ni Elly Espina sa public information office nga sa hapon ang distribution sa taga-south district, dili hatagan silang mikobra pagkahapon. Pagklaro intawon mo sa schedule aron dili magsipok ang ulo sa mga tiguwang.

* * *

With all due respect, medyo huyang ug kuwang pa ang surveillance ug monitoring sa mga naglangkob sa Cebu City Anti-Indecency Board kon CCAIB sa mga bay kahilayan sama sa napasirad-an nga Las Vegas KTV.

Kay ang akong amigo mi-insister man gyud nga grabe ang iyang nasaksihan diha sa Las Vegas ikomparar sa nakit-an sa taga-CCAIB.

Ang taga-CCAIB ordinaryo ra man nga mga eksena ang nakit-an pero sa akong amigo kita gyud sila og live sex.

Kinahanglang hinuktokan ni Mayor Rama ang gipangayo nga motion for reconsideration sa Las Vegas.

Dili sa ingon nga atong kulban sa kaldero ang mga operator ning maong bay kahilayan ug ang ilang gatosan ka mga trabahante ug labaw nang dili nato isakripisyo ang pang-warta sa Siudad pinaagi sa makumkom nga buhis gikan niining matang nga negosyo.

Ang buot ipasabot nako niini mao nga kinahanglang mosubay lang gyud unta sa lagda ang management sa Las Vegas nga wa nang mga law-ay nga pasundayag nga makapatambog sa tawo ngadto sa impyerno.

Kinahanglang wa nay mga sirado ug mga private rooms diha nga anha himoon ang mga misteryo.

Wa koy supak nga paablihan og balik ni Mayor Rama basta masunod ang tanan og dunay taga-City Hall nga mag-obserbar sa day- to-day operation sa Las Vegas.

Maglaum lang sab ko nga di lang ang Las Vegas maoy tutokan sa Siudad kay naa pay daghang mga bay kahilayan nga malapason ug di lang sa Metro Cebu apil na ang ubang mga lugar.