Congrats sa atong kapulisan
Nakadayeg kaayo ko sa tibuok pwersa sa kapulisan niadtong Lunes sa buntag nga nakig-pinusilay hangtud nga nangatumba ug nangamatay ang tulo ka mga tulisan nga sila si Antonio Adelan, Mario Dapitan ug laing wa pa mailhi nga maoy nagdala sa bag nga iya sa ChinaBank nga may sulod nga P1.2 milyones.
Ang giingong mastermind ug daku-daku sa grupo nga si Junjun Cabando nasamdan sa sampot ug nakasibat. Apan ang kapulisan padayong nangita kaniya.
Manghinaut ko nga makuha si Cabando sa atong mga tinugyanan, patay man o buhi.
Gawas sa atong kapulisan, nakadayeg sab ko sa duha ka mga security guard nga patay sab nga nakig-pinusilay sa mga tulisan. Angayng pasidunggan sila si Leofer Etac ug si Lito Andig Odag sa Puritan Industrial Security Agency.
Maglaum ko nga hatagan og incentives sa gobyerno ug sa agency ang gibiyaan nga pamilya sa duha ka mga gwardya nga nakalas.
Saludo sab ko niadtong duha ka mga pulis nga unang mitubag sa alarma nga sila si PO1 Elrich Jourden “Jay” Catacutan ug PO1 Roy Ceniza nga way kahadlok nga nakigbinagbakay sa mga tulisan nga maoy hinungdan sa ilang pagka-angol.
Angay silang hatagan og spot promotion gikan sa pagka police officer 1 ngadto na sa pagka police igawas sa ihatag nga Medalya ng Kagitingan ug cash incentives.
Manghinaut ko nga maghatag na og leksyon sa mga tulisan ang nahitabo nga di gyud sila magsilbe ug maghari na ang katarong dinhi sa Sugbo.
* * *
Daku kog pagduda nga “inside job” ang maong pagpanulis tungod kay daghan nang mga dagkung tulis diin malampuson gyud ang pundok sa mga tulisan basta may partisipasyon sa mga gwardya.
Bisan si Chief Insp. Romeo Santander hepe sa CIIB sa Cebu City Police Office miingon nga ilang gisubay ang anggulo nga “inside job.”
Kinahanglang tubagon kining mosunod nga mga pangutana:
Ingon ani ba kahuyang ang security nga gipatuman sa mga stationary nga mga gwardya sa Robinsons nga nakasulod man ang armas sa mga tulisan?
Nakig-pinusilay ba sab ang mga gwardya nga nadestino diha sa Robinsons ngadto sa mga tulisan?
Kun “inside job,” posible ba nga kakonsabo ang taga money changer? Posible ba sab nga dunay gwardya sa habig sa ChinaBank? Posible ba sab nga dunay kalambigitan ang ubang mga gwardya nga kauban sa mga nangamatay?
Kining tanan matubag lang pinaagi sa mas lawom nga imbestigasyon sa atong mga otoridad. Maglaum ko nga masubay kining tanan.
* * *
Salamat nga miklaro na kagahapon si manlalaban Jesus Osorio nga mosuporta na ang pamilyang Osorio sa pagpasaka sa kapulisan og kasong murder batok sa giingong mastermind sa pag-ambush patay sa iyang anak nga si Piskal Patrick Osorio niadtong Jan. 6, 2009.
Iyang gipasabot nga bisan di pa kaayo siya konbinsido batok sa gituhoang utok sa krimen, apan mas motuo siya sa trabaho nila ni Chief Insp. Romeo Santander nga maoy nagpahigayon ug dugang imbestigasyon human nadakpan ang giingong triggerman nga si Lyndon Horandoy kinsa napaubos sa extensive tactical interrogation.
Nasayod nako kun unsay motibo sa krimen apan di ko mag-una sa pagpagawas hangtud mohatag og go signal ang kapulisan ug mismo ang kabanayng Osorio.
Alang nako mas maayong mataral na ang giingong mastermind aron maklaro gyud sa hukmanan ang kinatibuk-ang istorya kun nganong gipatay si Piskal Osorio.
* * *
Gipadalhan ko ug formal communication sa akong amigo nga si manlalaban Rex Fernandez kinsa mipasabot nga mangayo sila ug kopya sa tape-on-air sa akong programa sa dySS Super Radyo niadtong Aug. 23 sa alas-9 sa gabii sa “Lloyd Suarez on Board Saksi”.
Intresado si Fernandez kinsa abogado ni Vilma Ouano sa akong giingong interview ni Antonio “Tonypeth” Ouano Jr., anak sa gi-ambush patay nga negosyante nga si anhing Antonio Ouano Sr.
Segun sa suwat ni Fernandez nga sa maong interview dunay mga “negative statement” batok sa iyang kliyente nga si Vilma kinsa igsoon sa gipatay ug iyaan ni Tonypeth.
With all due respect sa akong amigo nga si Fernandez akong klarohon nga wa gyud intawon ko maka-interview ni Mr. Ouano sukad-sukad.
Alang lang sab sa guidance nila ni Fernandez ug Vilma Ouano nga mas maayong adto sila mosuwat sa National Telecommunication Commissions (NTC) kun seryoso sila nga mangayo sa tape-on-air sa akong broadcast niadtong Aug. 26.
Kumusta man tuod ang kapulisan nga maoy naglangkob sa “Task Force Ouano” human mitanyag ang pamilya og usa ka milyon ka pesos aron pagsulbad sa kaso? Inutil pa gihapon? Pagkadugay nakasulbad.
