The revolution will be televised” -Snoop Dog with The Gorillaz
“It is music and dancing that makes me at peace with the world and at peace with myself” –Nelson Mandela.
Niadtong midagan si Ramon Fernandez pagka senador, miingon siya nga dili siya angay i-parehas sa mga artista kay ang duwa sa basketball tinuod ug dili arte lamang. Kon ikaw siguro artista, murag malain ka sa gisulti sa kandidato kay ang imong trabaho dili diay tininuod. Para sa mananan-aw parehas nga kalingawan ang drama ug basket.
Si Manny Pacquiao nga mas malampuson sa politika kay ni Fernandez may medyo lahi og gamay nga panan-aw. Kay para kaniya dili pinatyanay ang tumong sa boxing kon dili para pag-entertain sa viewers.
Kon tubayan ta ang linya ni Pacquiao nga boxing is foremost entertainment maka-ingon kita nga ang iyang pagdabu-dabu ni Rios katunga lang sa sugilanon kon naka halin ba isip salida ang maong panagsangka. Matud pa sa gadala sa pay per view TV mas minus ang mi subscribe sa Pacquiao-Rios kon itandi kini sa mga away ni Manny sa una.
Gipangutana Si Kobe Bryant kon unsay inspirasyon sa iyang bag-ong sapatos nga Kobe 9 sa Nike, mitubag ang injured shooting guard sa LA Lakers nga ang mga lihuk ni Manny Pacquiao maoy gihimung sumbanan ning maong sapatos.
Dihang gipangutana ang big guard kon ang pagpirma kaniya sa Lakers management sa usa ka daku kaayong kontrata para ba pagsiguro nga mapuno ang bleachers sa stadium bisan pa man og makapa-minus kini sa ilang chances sa championship, mitubag kini nga pag daug maoy una niyang tumong isip basketbolista.
Entertainment ba usab ang politika? Di ba kadaghan naman kita makadungog sa pulong nga political circus. Sama pananglit ni Miriam ug ni Enrile, sa ilang pagpanaginot og pogi points sa atong kagamhanan taliwa sa kasakit nga nahatag mi Yolanda.
Si Nelson Mandela nga namatay kagahapong adlawa ug si Barrack Obama nga presidente karon sa USA maoy mga malampusong Afro politicians. Si Mandela tingali ang political figure nga pinaka-paborito sa music industry.
Ang mga inila nga mga mang-aawit hugot kaayo nga mipaluyo kang Obama sa iyang 2nd term reelection.
Pero entertainment ba gayud kining politika? Dili ba tininuod man kini ug gani daghan mang pinatyanay matag piniliay. Ingna-ni-a na lang paghunahuna, walay makalingaw nga dili tinuoray.
Tininuod kadtong paglawg sa mga unang Kristianos sa mga lion sulod sa Coliseum sa Roma para sa kalingawan sa mga taw. Daghan na nga kinabuhi ang nakalas sa kalingawan gikan sa mga taga circus nga nahulog sa pisi, paingon sa rambol sa mga fan sa football.
Ang inyong iring pananglitan, kon mopatay man kinig tiki, ok-ok o ilaga, dili na kini niya kan-on. Kay imo naman siyang binuhi, dili na siya mopatay para survival. Mopatay na lang siya for entertainment. Para na lang pagbansaybansay sa iyang kabangis ug pagpawa sa iyang kalaay samtang gahuwat siya sa sunod mong paglawg kaniya.