Layo pa ang 2016 nga presidential elections, apan akong mga kasaligang tinubdan nagbutyag nga kompirmado na nga si 3rd Dist. Rep. Gwendolyn Garcia maoy molansar pagkagobernador.
Sa pamilyang Garcia gipilian sa United Nationalist Alliance kon UNA sila si Gwen, Pablo John ug Winston apan mas si Gwen ang kampante kay matud pa daghan og sumusunod ikomparar sa iyang mga igsoon.
Duna say mitug-an nga si Gov. Hilario Davide III dili na mopadayon sa 2nd term kay gikapoy ug tungod kay daghan kaayong “little governors” nga nagpalibot kaniya.
Hinuon, posible man nga tinuod kini apan unya na ko motuo kun mahitabo man.
Posible ba nga Garcia versus Durano sa 2016?
Kun tinuod man nga dunay daghang “little governors,” nganong di man sab panaktakon ni Governor Junjun kining mga tawo nga nagdag tigaw sa iyang liderato?
* * *
Posible nga moulbo ang kagubot sa lungsod sa Ginatilan kay dunay resulta sa recount sa Oslob Regional Trial Court nga ang gipildi ni Mayor Dean Michael Singco nga si Maria Liza Toledo maoy midaug sa election protest.
Gawas kang Mayor Singco, gipildi usab si Vice Mayor Jose Ramon Gornez kang Maria Fema Duterte.
Ang incumbent Mayor ug Vice Mayor pulos mga sakop sa One Cebu Party samtang taga-Liberal Party (LP) ang mga midaug sa protesta.
Nahibaw-an sab nga natagak ang ikawalong konsehal nga si Joel Divinagracia nga miembro sa LP ug pulihan siya kang Walter Tocao sa One Cebu.
Sa subling ihap, si Mayor Singco nabiyaan og 634 botos. Sa ihap sa husgado 3,161 votes kang Singco samtang 3,795 votes kang Toledo.
Si Vice Mayor Gornez nakakuha og 3,663 ug nabiyaan siya og 199 botos kang Duterte nga may 3,862.
Akong nahibaw-an nga si Mayor Singco moapelar sa resulta sa recount sa korte apan andam kining motuman kun unsa may mando sa korte.
Nindot unta nga di lang sab dayon gubton sa taga-Ginatilan ang ilang lungsod ilabina sa kampo ni Toledo sanglit duna pay katungod si Mayor Singco nga moapelar.
Manghinaut lang ko nga dili unta sila maparehas sa nahitabo sa Tudela, Camotes ug sa lungsod sa Campostela kaniadto nga gubot pas lukot.
Ang paet lang niini kun mo-take oath dayon sila si Toledo ug Duterte bisan dili pa final ang desisyon ug mosugo sa ilang mga tawo pagpalayas nila ni Mayor Singco nga mosukol sab.
Kun magka-gubot gyud, apektado ang paghatag og basic services ngadto sa katawhan.
Ang konseho sa Ginatilan gidominar sa One Cebu.
* * *
In fairness kang Governor Davide iyang gihimakak ang mga alegasyon nga dunay pamolitika ang pagpangapod-apod sa mga “relief goods” ngadto sa mga biktima sa bagyong “Yolanda” didto sa northern Cebu niadtong mga nanglabayng mga adlaw.
Pero alang nako, dili nako igsapayan nga dunay pamolitika basta lang magpadayon ang pagpanghatag og patas ang pagtratar sa tanang mga lungsod bisan kadtong kontra nila sa politika.
Mao nga akong awhagon si Governor Junjun Davide nga unta ipadayon nila ang pagpanghatag samtang duna pay mga buotang Sugboanon nga nanghatud sa Kapitolyo og mga hinabang.
Sama sa among gihimo karon sa GMA-7 ug dySS sa “Operation Bayanihan” nga puwerteng daghana pa ang pustonon ug ipanghatud ngadto sa mga tabangonon kay sa tinuod lang wa gyuy puas ang katawhan sa paghatud sa ilang mga hinabang.
Maayo unta nga palabwan pa sa Kapitolyo, sa Cebu City Hall ug sa bisan usang Local Government Units ang among gihimo kay daghan pa intawon ang wa makasabot sa ilang kahimtang human nawagtangan og kapuy-an.
Nagkinahanglan sila sa atong alalay kay di pa intawon makahunat!
Ang ako lang ni Governor Junjun mas maayo nga balikan niya og adto ang mga biktima ug dili magpasagad og kalawat sa mga report sa mga mayor nga numero unong namolitika.
* * *
Unsa ka lig-on ang seguridad sa mga huwes nga magbista na karon sa gawas sa building sa Palace of Justice?
Dili sa ingon nga nanghadlok ko kanila nga nagpakabana na sa ilang mga kaso apan di sab siguro maayong i-compromise ang ilang security.
Insakto na ba ang upat ka mga pulis nga naka-detail karon sa Palace of Justice ug ang gidaghanon sa mga guwardiya?
Sa mga huwes nga moadto sa mga bilanggoan aron adto magbista, kahatagan ba og police escort sa Cebu City Police Office?
Nalutsan man gani ang atong mga guwardiya niadtong John Pope nga usa ka Canadian national nga namusil sulod sa Palace of Justice kini na bang abli kaayo ang tent sa mga huwes diha sa parking lot.
Grabe sab kahinay sa taga-Korte Suprema pagpangita og paagi.
Niining kahimtang sa mga huwes, gikinahanglan nga armasan gyud sila ug kinahanglang moapil sa practice shooting aron maka-return fire sila niadtong mo-interest sa ilang kinabuhi.