Inutil gyud si P-Noy

Kinahanglang angkonon sa tumang pagpaubos ni Presidente Benigno Aquino III ug sa iyang mga kaalyado nga nainutil gyud sila sa paghatag og dinaliang tabang ngadto sa mga biktima sa bagyong Yolanda sa Tacloban, ubang parte sa Leyte, mga parte sa Samar, sa Sugbo ug didto sa Ilo-ilo.

Bisan unsaon nila pagpanindot sa ilang estorya bahin sa ilang ayuda ug bisan unsaon nila og depensa ang nanggawas nga mga negatibong reaksiyon apan migitib gyud ang tinuod nga “helpless” ang presidente sa maong katalagman.

Akong nakita nga mismo ang presidente wa makasabot sa iyang trabaho ug nagkabuang kun unsay unang buhaton.

Ang gobyerno maoy hinungdan nganong nahimong “unruly” ang mga survivors sa Tacloban kay sama sa “bao” ug “umang” ang linihokan.

Sa sinugdanan, nag-ayo lang sa estorya nga andam na ang tanan sa wa pa moabot ang bagyong Yolanda niadtong Nobyembre 8.

Kun moingon ta og andam, nahan-ay na ang tanang matang sa preparasyon gikan sa relief goods, personnel, transportation, equipment ug uban pa.

Nasayod sab ang presidente kun asa mo-landfall ang bagyo ug unsay gipasabot ug epekto sa “storm surge” sa supertyphoon.

Kun nakapatuman ang Malacañang og massive forced evacuation sa ubang mga residente sa ubang lugar nga medyo delikado nganong gipasagdan ra man ang mga molupyo sa Tacloban?

Tungod ba kay dili kaalyado sa presidente si Tacloban Mayor Alfred Romualdez?

Human sa bagyo nga nasayod si P-Noy sa kadaut sa Tacloban nganong langay man kaayo silang nakatabang?

Tungod ba kay nagpabilin ang kaligotgot ni P-Noy sa mga kaliwat sa kanhi unang ginang Imelda Romualdez Marcos nga gituhoang may kalambigitan sa pagpatay sa iyang amahan nga si late senator Benigno Aquino Jr?

Haskang inutila gyud kay hangtud karon daghan pang mga patay nga nagpasad sa mga lugar didto sa Tacloban.

Si P-Noy nga maoy commander-in-chief sa Armed Forces of the Philippines nalimot sa iyang trabaho pagmando sa liboan ka mga sundalo ug kapolisan nga motutok gyud sa paspas nga relief operations ug paghipos sa mga patay.

Naa pay Secretary Mar Roxas sa Department of Interior and Local Government, nagpakaulaw lang sa mga biktima sa bagyo kay kutob ra sa pang “pogi points” kay taliwa sa kagutom sa mga tawo igo ra kining nakig “hand shaking” ngadto sa mga nanghapdos ug nagkutoy nga mga tiyan sa iyang gikabagat.

Wa gyud katunol bisag luyat na lang nga saging! Pastilan!

* * *

Kinsa may mokaon ug kinsa na may mopahimulos sa mga daghang hinabang ilabina ang gikan sa ubang mga nasud kun ang mga survivors sa Yolanda mohurot na og biya sa Tacloban?

Dili kaha kini kawaton o ba kaha gamiton sa pamolitika inig 2016 nga presidential elections sa taga-Liberal Party?

Nabalaka baya ko nga maparehas kini sa nahitabo sa Guinsaugon, Southern Leyte nga ang mga hinabang sa gawas nangahanaw lang sab.

Ang uban namasangil kaniadto nga gibaylo-an og “buwad” ang mga lamiang de lata nga “ham”. Buwad ray naabot ngadto sa mga biktima unya ang mga lamian nga “ham” gikawat sa mga kanahan.

Naglaum ko nga transparent si Social Welfare Secretary Dinky Soliman sa pagpanghatag niining mga hinabang gikan sa ubang mga nasud ug kinahanglang maapod-apod sa labing daling panahon.

Wa sila mauwaw nga napuno na sa mga pagsaway?

* * *

Daghan na ang misanong sa panawagan ni Cebu Archbishop Jose Palma ug ingon man sa Malacañang nga wa nalay ipahigayong Christmas party sa mga business establishments ug sa mga ahensiya sa gobyerno.

Kini aron ang budget sa party adto nalang igahin sa mga biktima sa bagyong Yolanda.

Niadtong Sabado sa among programang “Dialogue on the Air” sa dySS Super Radyo, mayoriya sa akong mga bisita mipadayag nga wa na gyud sila maghuna-huna og Christmas party.

Mismo ang taga-Metropolitan Cebu Water District (MCWD) pinaagi nila ni Charmaine Rodriguez ug Astro Logarta ingon man sa taga Visayan Electric Co (Veco) nga si Therese Sederiosa automatic nilang gi-cancel ang Christmas party aron maka-focus sa tabang sa mga biktma sa bagyo.

Ang mga lineman sa Veco ipadala sa Tacloban aron makatabang sa pagkutay sa mga linya samtang mohatag og daghang tubig ang MCWD.

Sila si Director Carmelita Dulangon ug Engr. Victor Yntig sa Department of Education in Central Visayas kon DepEd-7 miingon sab nga ilang ipakanselar ang natakdang party.

Mao sab kini ang gipadayag sa mga representante sa Bureau of Fire Protection nga sila si Insp. Eulalio Munez ug FO2 Wendell Villanueva.

Posible nga ipakanselar sab nila ni Director Asteria Caberte ug Zaide Bation sa Department of Trade and Industry ang ilang Christmas party apan ila unang kuhaan og consensus ang tanang mga empleyado.

Si Randy Torres nga usa ka public school teacher kinsa usa sa mga survivors sa Leyte nga gipakuyog ni Director Dulangon, emosyonal nga mipadayag nga ang importante sa “Pasko” alang kaniya mao nga buhi gihapon siya uban sa iyang pamilya ug nagpasalamat kaayo siya sa tanang mga tawo nga nakatabang kaniya nga nakaabot dinhi sa Sugbo.

Alang nako, mas maayong dunay Christmas party sa mga ahensiya ug mga kompaniya.

Apan himoong simple ang selebrasyon nga di kinahanglang bongga ug maghudyaka gyud.

Di ba gud puwede nga magtapok-tapok lang unya magsalo sa pagpangaon samtang mang-repack sa mga hinabang?