Nyor Gamay (NG): Maayong buntag, Nyor. Gaunsa man ka diha?
Nyor Daku (ND): Dia intawn namunit aning mga manga sa natumba nga kahuy. Ganahan ka? Kuha lang diha, naay gitapok nako dihas imong luyo. Pagda las inyo kon ganahan ka. Usik-usikan lang unya nas mga kwaknit. Ingkiban unya biyaan.
NG: Salamat Nyor. Wa diay ka mag internet ron? Daghan man kaayong nipadayag sa ilang kasuko sa Facebook ug Twitter.
ND: Ah, ang mga angry birds. Nag internet ko ganina pero nag brownout man.
NG: Angry birds? Hangawa gyud nimo Nyor.
ND: Murag upat na sila ka klase Nyor.
NG: Mao ba? Unsa man nang mga klaseha?
ND: Una, mao ang Kontra P-Noy. Kining ang mga angry birds nga daan na nga wa ganahi ni Noynoy. Ug kaning kahinay sa pag-abot sa mga tabang ngadto sa mga lagyong lungsod nga na-igo sa bagyong Yolanda ilang gamitong prueba nga wa sila masayop nga wa sila mobotar kang P-Noy.
NG: So mag sige ra ni silag atang sa sipyat ni P-Noy, unya mobira dayon?
ND: Right, Nyor. Ang laing klase usab sa angry mao ang Empathizing birds. Ang kanunay nga naa sa ilang huna-huna nga unsa kaha kon kita ang naa sa lugar sa mga biktima. Kapait kaha sa usa ka semana nga way tubig ug pagkaon. Labi na gyud kon ang atong mga patay naa ras atong tungod samtang gahapdos atong tiyan.
NG: Mao ni sila ang may lawm nga pagbati ug panghuna-huna. Unsa pay laing langam Nyor.
ND: Ang lain Nyor, mao ang Bright Birds. Kini sila gatuo nga wala ka kita ang gobyerno sa para kanila ang klaro nga mas maayo nga mga pamaagi sa pag sulbad sa mga problema. Mao kini sila ang kusog motuhik.
ND: Mao tingay ni sila ang tig monitor sa balita sa CNN ug sa BBC. Unsa may katapusang angry bird, Nyor?
NG: Ang katapusan mao kini ang mga righteous birds. Nasuko kini sila sa mga maru, sa mga tikasan, sa mga mangingilad, sa mga garbuso, sa mga mapahimudsanon. Kini sila ang pinakausikan sa mga langam. Ga usik-usik silas ilang kusog ug ga usik-usik sila sa ilang kasuko.
ND: Ug nganong naka-ingon man ka ana Nyor?
NG: Wa man gud kay makuhang maayo kon masuko ka nianing maong mga batasan nga diha na sa wa pa si Yolanda. Ang mga tikasan, mangingilad ug mapahimudsanaon dili mawagtang bisag pito pa ka Yolanda ang moagi. Mao nga imbis magpunay silag paghut niani mosugyot na lang tingay silag pamaagi unsaon pagsanta o paglikay ning maong binuhat nga ingon ani ang binuhatan.
NG: Di gyud ni sila mawagtang Nyor bisag pito pa ka Yolanda? Kon walo kaha Nyor?
ND: Tingali. Basig ma wa na ni sila. Kay ma wagtang naman tang tanan.