Gi-ingon nga sa tanang galamiton sa tawo sa pagsabot sa kalibotan (senses) ang paminaw maoy una natong magamit. Kini usab kuno maoy katapusan natong magamit sa di pa kita mopanaw.
Ang paminaw mao usay kusog nga mohatag kanatog kahadlok ug kabalaka. Tan-aw og salida nga horror sa TV unya pagnga ang sound di ba mahimo kining kataw-anan.
Ang higala kong si Bingoy gikapuyan nag assemble sa iyang mga found objects pag alas otso sa gabii ug mihigda na lang siya ug naghulat sa pag-abot sa katulog. Wa dayon siya makatulog kay gipangulbaan siya kun magtaligsik. Daw gahuwat siyag unsay mag-una ang tingog ba sa taligsik o ang iyang pagkatulog.
Kulbaan siya sa taligsik kay basin og mokusog kini ug mahimo na nga ulan. Sa tanto gud og pangispalto sa gobyerno daw naubos ang among lugar ug kun mokusog ang uwan, dili dayon makagawas ang tubig. Ug kun mobaha, ang tubig sa canal na hinuon ang mosulod sa among tugkaran.
Pero samtang naniid sa posibleng pag-abot sa taligsik, si Bingoy laing tingog ang iyang nadunggan. Matud pa niya, mga batan-ong lalake kuno nga murag tingog og “cartoons sa TV” ang gasaba-saba. Daw may tinguha silang manghasi kun basihan ang ilang mga gabinuang nga tingog.
Wa madugay nakadungog si Bingoy og tingog sa babaye nga namadlong sa mga batan-on. Apan misamot pagsiaw ang mga batan-ong lalake.
Wa maka-dungog si Bingoy sa gi-ingong hagsa sa gilabay nga botilya gikan sa balay sa namadlong ngadto sa nagsaba-saba sa pikas koral apan misyagit ang mga batan-ong lalake ug nangutana kon gusto ba kuno og gubat ang namadlong kay nganong nanglabay man kini og botilya. Giingnan na usab sila nga pahilumon.
Ang sunod nga nadunggan ni Binggoy mao ang panaglalis nga gisundan og buto-buto. Mga pito ka buto. Dayon gisundan kini og pag panghilak ug sa mga pulong nga “dugo, dugo.” Dayon gisundan na pod kini og laing buto-buto nga daw gagikan sa laing hinagiban.
Wa madugay miabot na dayon ang sirbatos kapulisan. Nasayran na lang ni Bingoy ang among 19 anyos nga silingan nga si Belen mao diay ang namadlong ug mao usay gipusil patay sa among silingan ra usab nga lalake.
Basig gadumot na kining maong nakapatay sa mga namadlong kaniya. Posibleng droga usab ang hinungdan.
Mao kini ang ga-unang problema sa atong dakbayan karon drainage ug krimen. Ug dili layo sa atong paminaw ang daw kanunay nga pagsaka ning duruha.