Unsaon na lang kun magsige gihapon ang mga aftershocks sa linog niining adlawa ug sa mga mosunod nga mga adlaw samtang mo-resume na ang klase sa mga tinun-an.
Ingkaso dunay mga aftershocks, makaya ba pag-manage sa mga magtutudlo ang ilang mga tinun-an ilabina ang mga gagmay pa?
Gani niadtong Nobyembre 1 nga mopaingon na alas-10 sa gabii, daghan kanato ang nabulabog ug nabalaka dihang nakabatyag kita sa kusog nga aftershock.
Si Robinson Jeorgio sa Philippine Institute of Volcanology and Seismology (Phivolcs) miingon nga miabot og 4.5 intensity ang gikusgon ug milanat ug 4 to 5 seconds dinhi sa Sugbo.
Atong nahibaw-an nga ang magnitude niadto miabot sa 5.2 ug didto sa Tagbilaran City, Bohol nagmanukad.
Giklaro usab sa taga-Phivolcs nga natural lang nga ang mga aftershocks molanat gyud og duha ngadto sa tulo ka semana.
Alang nako nga ang himoon karon sa mga ginikanan mao nga dili mobiya sa eskuwelahan aron ingkaso kun dunay laing pagtay-og anaa dayon sila nga makaatiman sa mga anak.
* * *
Ambot kun unsay nasulod sa utok niadtong kapitan sa barangay Marapao, Pontevedra Capiz nga si kapitan Manuel Arcenas nga mimasaker sa iya rang kadugo nga midaug pagkakapitan nga si Ramon Arcenas ug sa duha ka mga igsoong lalaki sa captain-elect.
Si outgoing captain Arcenas napilde pagkakonsehal ug naparot sab ang anak niini nga si Isabel Arcenas sa pagkakapitan.
Paita gyud sa politika sa barangay kay moresulta sa bayolenteng krimen nga unta kadugo ra ang nanagtigi.
Unsa man gyud ang anaa diha sa barangay? Kinahanglan ba gyud nga magpatay ang kaliwat?
Dili ko makasabot nga dunay mga tawo nga modangop sa pinatyanay kun mangapildi og maalkanse sa diskarte.
Panahon na tingali nga estriktohon sa Commission on Elections ang qualifications sa mga kandidato. Usa na diha nga tutokan gyud ang dagan sa pangisip sa kandidato.
* * *
Puwerteng panalipod sa mga kadagkuan sa Bureau of Fire Protection in Central Visayas (BFP-7) dihang giduaw sila sa mga sakop sa media subay sa hulga sa ilang regional director nga si Ma. Luisa Hadjula nga putlan sa linya sa suga ug tubig ang mga pasyente sa Cebu City Medical Center (CCMC) nga anaa karon gipahimutang sa ground floor sa BFP-7 human niadtong linog.
Ilang gipasubay sa mga sakop sa media kun giputol ba gyud ang suga ug tubig hangtud nasuta nga way nahitabong pinutlanay.
Pero mao lagi na, kun wa tirahi si Hadjula dinhi sa akong lindog tungod sa iyang iresponsableng suwat sa CCMC chief of hospital nga iya gyung putlan, dili makaalinggat nga sayop siya.
Salamat kay pinaagi kang FO2 Wendell Villanueva nga maoy tigpamaba sa provincial fire marshal nga mi-interact sa akong radio program sa dySS, mipasabot nga dili na himoon ni Hadjula ang bahad nga putlan sa linya sa tubig ug koryente ang mga pasyente.
Ang gitinguha nila karon mao ang pagduso og kiha sa korte pinaagi sa ilang legal counsel nga si manlalaban Benito Cruz aron mabadlong si Cebu City Mayor Michael Rama nga mobawi sa lote nga giokupahan sa BFP-7 diha sa N. Bacalso Avenue.
Akong sublion nga dili gyud makiangayon nga putlan ni Hadjula ang mga pasyente nga nagkinahanglan og tabang.
Nindot gyud nga dili sirad-an ang pultahan alang sa sabot-sabot kay parehas ra ang ilang tumong nga mao ang pagserbisyo sa katawhan.
* * *
Ambot lang kun unsa katinuod nga dakong buhi si Jacqueline Chiong segun pa sa self-proclaimed nga “ghost rescuer” ug “ghost equalizer” nga si Cris Encila kinsa mitambong sa among programang “Dialogue on the Air” niadtong Sabado sa hapon uban kang Bro. Socrates Fernandez ug Sherwin Maceren nga maoy daku-daku sa mga tig-embalsamar ug mga patay sa Saint Francis Funeral Homes nga nagtuki bahin sa kalag-kalag.
Si Encila nga nangangkon nga makaistorya og kalag miingon nga bugtong si Marijoy Chiong lang ang napatay sa mga sindikato sa drugas didto sa Tan-awan, Guadalupe, Carcar niadtong Hulyo sa tuig 1997.
Apan si Jaqueline, matud pa, anaa ra sa gawas sa nasud apan wa siya motug-an kun asa dapita.
Matud pa usab ni Encila nga kun mabalik si Jacqueline dinhi sa Sugbo dako gyud kaayong bulabog ang judicial system.
Pagkanindot kun buhi si Jackie. Magpaabot lang ko nga akong mahimamat personal ug ma-interview ang igsoon ni anhing Marijoy Chiong aron makahatag pa og dugang detalye si Jackie niadtong mga panahon nga gidagit sila sa grupo nilang Paco Larrañaga ug Josman Aznar.
***
Mga piniriso sa Cebu Provincial Detention and Rehabilitation Center ug Bagong Buhay Rehabilitation Center nangreklamo na karon tungod kay wa nay bista-bista ang ilang mga kaso.
Segun pa sa usa ka grupo nga miadto sa duha ka mga jail facility karong bag-o nga bisan gagmay ra kaayo ang mga kaso sa mga piniriso sama sa gun ban, dili makalihok tungod kay suspendido karon ang mga bista tungod sa kaguba sa building sa Palace of Justice gumikan niadtong linog.
Bisan si manlalaban Inocencio de la Cerna miingon nga daghan karon sa iyang mga kliyente ang wa makapiyansa kay way bista.
Matud niya nga makasukol silang mga abogado nga mag-hearing bisan ilawom sa punoan sa kahoy diha sa Kapitolyo. Ang ubang mga huwes wa say supak sa ilawom sa mangga.
Pero si Executive Judge Soliver Peras miingon nga dili niya i-compromise ang seguridad nilang mga huwes kay risgo kaayo nga magbista sa gawas sa building.
Ang iyang tubag sa kalangay sa taga-Korte Suprema pagdesider kun asa sila magpahimutang mao nga way kuwarta ang Supreme Court. Pait! Asa man diay ang income sa mga kaso?