Milugmaw sab akong mga mata niadtong Sabado sa gabii sa akong radio program sa dySS Super Radyo kay naluoy kaayo ko sa atong usa ka Sugbuanon nga atoa karon sa Basak, Loon, Bohol nga nagpanghamoy sa tudlo sa grabeng kalisdanan sa supply sa pagkaon alang sa iyang pamilya.
Si Bonifacio Estioca, lumad nga taga-barangay Labangon ning Siudad nga atoa naminyo sa Loon, Bohol mireklamo kay dunay mga lugar nga pinalabi sa hinatagay sa bugas ug klaro nga gipamolitika.
Matud niya nga sa ilang barangay Basak, Loon igo ra silang hatagan og tagsa ka kilo matag pamilya samtang didto sa Central Loon, Bohol gihatagan og tag 3 kilo nga bugas matag pamilya.
Iyang gibutyag nga dihang nangindahay siya nga makakuha og dugang bugas ug milinya siya sa hinatagay sa bugas sa Central Loon apan kauwaw ang misugat kaniya kay giprangkahan siya nga dili gyud puwede nga manghatag ang taga-Central Loon ug taga laing barangay taliwa nga duna pay daghang ikahatag.
Gihilab akong kasing-kasing nga naminaw kaniya kay igo na lang mipatulo sa iyang mga luha ang amahan sa nagkutoy niyang mga sakop sa pamilya nga bisan usa ka kumkom nga bugas wa gyuy nabitbit gikan sa Central Loon.
Pagkapait gyud sa ilang sitwasyon kay sukad paglinog niadtong Martes sa buntag kaduha pa sila nahatagan og bugas nga tag usa ka kilo ug sa iyang kuwentada nga kaduha pa intawon sila makakaon.
Matud niya nga ikatulog na lang nila og sayo aron dili mabatyagan ang kahapdos sa tiyan nga way ikasulod.
Segurado ko nga ang sitwasyon ni Bonifacio Estioca susama sa liboan ka mga Bol-anon nga puwerteng gutoma na gyud ug uhaw kaayo.
Duna silay kuwarta apan ang nakaporke lang kay way mapalit kay guba ang mga establisimiento mugna sa linog.
Busa sa makausa pa kinahanglang motabang kita ngadto kanila bisag ginagmay lang. Sama sa giingon ni Department of Education in Central Visayas Director Carmelita Dulangon nga bisag motunol lang og tagsa ka botelya nga tubig mainom o ba kaha tagsa ka lata nga sardinas o ba kaha usa ka chocolate ikalipay na kaayo kini sa mga biktima ilabina sa mga tinun-an.
Magpasalamat sab ko sa uban nakong mga bisita sa akong programang “Dialogue on the Air” nga nagtuki bahin sa maong linog niadtong Sabado kay andam silang motabang sa mga biktima.
Ang kapolisan nga sila si Senior Supt. Noel Gillamac, Cebu Provincial Police director; Senior Supt. Noli Romana, Cebu City Police director; Senior Supt. Rey Lyndon Lawas, Lapu-lapu City Police director; Senior Supt. Petronelli Baldebrin, Mandaue City Police director; Senior Supt. Audie Villacin PCR chief sa Police Regional Office in Central Visayas ug Supt. Resty Santos nga Talisay Chief mitug-an nga magtampo-tampo sila aron ihinabang sa taga-Bohol.
Sila si Gov. Hilario Davide III ug Provincial Board Member Gigi Sanchez Zaballero nga naka-participate sa maong programa miingon nga padayon ang relief operation sa Kapitolyo ug mipasalig nga andam nilang tabangan ang mga Sugboanon kansang mga panimay ang naguba sa linog.
Sa habig sa taga-Philippine Red Cross pinangulohan ni Gwendolyn Pang, gitug-an nila ni Vic Jay Gonzal ug Manolito Aguelo nga daghan na sab ang ilang natapok nga hinabang alang sa taga-Bohol.
Maglaum ko nga kining pagpahigayon ug relief operations sa tanang nagpasiugda dili tinuntohan sa uban ug dili ipamolitika sa mga kadagkoan sa gobyerno.
Sila si SFO4 Sherwin Porcia ug FO1 Julian Cabatingan Jr. sa Bureau of Fire Protection miingon nga kinahanglang mopahigayon na sab sila ug mga “earth quake drill” sa bisan asang establismento ug mga tunghaan.
Samtang si Senior Geologist Abraham Lucero Jr. sa Mines-Geo Sciences Bureau sa Dapartment of Environment and Natural Resources in Central Visayas mipahimangno sa publiko nga dili gyud mokompiyansa niining mga pag-uwan-uwan karon kay possible nga mosamot kahuyang ang mga yuta tungod sa bag-ong linog.
* * *
With all due respect kang Cebu City Mayor Michael Rama ug sa mga nag-inspection sa Cebu City Medical Center kon CCMC dili pa gyud ko konbinsido sa iyang tinguha nga ipaguba na kining ospitala.
Maayo tingali nga atong ipa-assess kini ug mga experto nga posibleng dunay second opinion.
Kun dunay mga dagkung liki dili na ba puwede nga ipa-agi ug renovation or major repair aron makadaginot sa kuwarta ni Juan Dela Cruz?
Bisan nga niabot na kini og 50 ka tuig apan wa kini magpasabot nga dili na kini molig-on pagbalik kung tarungon sa pagpa-trabaho sa mga ligdong nga kontraktor.
Si Mayor Michael Rama nga akong nahinabi niadtong Sabado sa gabii buot na gyud nga ipadayon iyang plano sa pag-demolish sa CCMC ug matud pa gipaningkamotan karon nga limpiyo na ang gitarukan sa CCMC sa dili pa ang Disyembre.
Pero ang nakaporke man gud dili baya sayon nga makatukod kita og ospital ilabina niining bugno sa politika dinhi sa ato.
Gawas pa sab way budget unya wa nay pork barrel sa mga kongresista ug mga senador.
Ang laing nahuna-hunaan ni Mayor Rama mao nga paliton ang karaang building ug ang lote sa simbahan sa Mormons diha sa barangay Lahug aron himoong ospital alang sa taga-Cebu City North District.
Iyang gitug-an nga niining pagpaguba sa CCMC way personnel nga taktakon. Ang mga doctor ug mga nurses ipangdestino ug mga barangay health centers samtang ang mga estudyante sa nursing adto mopadayon sa ilang pagtungha sa University of Cebu human nagkasabot sila ni manlalaban Augusto Go. Samtang ang 30 kapin ka mga pasyente nga anaa karon sa BFP-7 gikatakda nga ibalhin kini og ubang tambalanan.
Kung mao ning kalakiha dili na kinahanglan nga atong palayason ang mga bombero diha sa Cebu City Fire Central duol sa CCMC.
Gawas pa Mayor Mike, ang Natalio Bacalso Avenue maoy lapad nga dalan ug sentro kaayo sa mga fire trucks nga makatubag dayon sa mga alarma sa sunog.