Opisyal sa PDEA nakig-alyado sa mga drug lord?
Nakadawat ko ug mga dokumento nga nagdaut sa pagkatawo ni Director II Rayford Yap kinsa maoy Philippine Drug Enforcement Agency (PDEA)Provincial Director sa Negros Oriental.
Sa unang mga panid sa dokumento, gibutyag nga si Yap gi-admonish ni Undersecretary Jose Gutierrez Jr. ug gi-warningan kini nga di na mag-apil-apil sa mga police operations nga may kalambigitan sa drugas tungod niadtong iyang pagpa-entrap sa usa ka langyaw nga si Adnan Sayed Anwar Ali Alkazim.
Gimanduan usab siya nga makig-coordinate kanunay sa iyang mga labaw.
Unya sa mga uwahing panid sa mga dokumento, gibutyag nga si Yap tiggamit og drugas ug kakonsabo matud pa sa mga drug personalities.
In fairness, si Director Yap nga mitawag kanako kagahapon human akong gipabuto sa akong “Flash Bulletin” sa GMA-7 nanghimakak sa alegasyon nga siya tiggamitan og drugas ug nakig-alyado siya sa mga gipanghisgutan nga mga drug personalities.
Mihagit siya sa nagdaut sa iyang pagkatawo nga ipa-utingkay sa korte ilabina na kang Judge Enriqueta Belarmino kay wa gyud siya mobali sa iyang mga testimoniya.
Misambingay siya nga ang nagdaut kaniya kagrupo niadtong PDEA agent nga nadakpan sa Bohol nga namaligya og drugas nga si Steven Valles nga matud pa klaro kaayong nag-recycle og shabu.
Alang nako, kinahanglang pangimbestigahon kini og tarong unya kadtong dili angayng ipabilin sa PDEA, kinahanglang taktakon sa serbisyo.
* * *
Salamat sa inyong makabungog nga suporta sa akong programang “Lloyd Suarez On Board Saksi” sa dySS Super Radyo matag gabii gikan sa alas-9 hangtud sa alas-11 kay consistent kitang No. 1 sa latest survey sa Nielsen Media Research.
Sa ubos mao ang resulta sa “Comparative Station Ratings By 30-Minute Segment Among Top AM Stations” (Monday-Saturday) niadtong July 2-8, 2010 nga survey sa 2nd Semester.
Sa 9 p.m. to 9:30 p.m., ang dySS nakakuha og 0.94, dyHP 0.39 samtang 0.26 ang dyAB. Sa 9 p.m. to 10 p.m., ang dySS naka-score og 0.85, dyHP 0.39 samtang 0.25 sa dyAB. Sa 10 p.m. to 10:30 p.m., ang dySS misakmit og 0.54, dyHP 0.12 unya 0.08 sa dyAB. Sa 10:30 p.m. 11 p.m., ang dySS mibira ug 0.43, samtang ang dyHP ug dyAB nagtabla sa 0.07.
Sa pinakabag-ong survey niadtong March 12 to March 18 (1st Quarter) 9 p.m. tp 9:30 p.m. ang dySS midaug og 0.34, nagsunod ang dyHP sa 0.32 ug ikatulo ang dyAB nga may score nga 0.25. Sa 9:30 p.m. to p.m., ang dySS misaka og 0.35, samtang 0.27 ang dyHP unya 0.19 ang dyAB. Sa 10 p.m. to 10:30 p.m., ang dySS nakakuha gihapon og mas labaw nga score nga 0.19, dyHP 0.15 samtang 0.06 ang dyAB. Sa 10:30 p.m. to 11 p.m., ang dySS 0.15, dyHP 0.10 samtang 0.04 ang dyAB.
Again, salamat kaayo ninyong tanan ug pinaagi niini, akong obligasyon ang pagpalapad pa sa akong paghatag og tinud-anay nga serbisyo.
* * *
Congratulations sa among programang “Imbestigador” sa dySS Super Radyo nga gidumala ni Super Algin Abaguita nga midaug na sab sa bag-ong gipahigayon nga 15th Cebu Archdiocesan Mass Media Awards (Camma) isip “Best in Public Affairs Program” for radio category niadtong Domingo sa gabii.
Sa akong kwentada, kini maoy ikatulo na ka higayon paglampos sa among programang Imbestigador nga naghatag ug tinud-anay nga serbisyo ngadto sa mga naproblema.
Ang among programa naghatag lang og taytayan ngadto sa mga nahingtungdang mga ahensya nga maoy makasulbad.
Pipila usab sa among mga entries nga nahimong finalist mao ang “Saksi Morning Edition” ni Sir Bobby isip Best in Radio Commentary, “Morning Na Cebu” isip “Best in Radio News Program ni Super Gerry Auxillo.
Nahimo sang finalist isip Best in Radio Drama ang tulo namo ka mga drama nga mao ang “Mary ug Yusuf” sinuwat ni Fermin Collantes Gomez, “Alang Kanimo Kapuso” diin suwat-suliran nga gitambagan nila ni Ma’am Susan Perez, Sir Bobby, manlalaban Eddie Barita, Prof. Tata Hernani ug Chupeta ug ang sinuwat ni Cora Rosales Jayma nga “Isla Huyong-Huyong.”
Na-finalist sab sa “Best in Radio Plugs/Public Service Announcement” ang duha namo ka entries nga “Anti-Illegal Fishing” ug “Anti-Illegal Drugs.”
Samtang ang akong programang “Dialogue on the Air” nga mabati matag Sabado nga nahimong “Best Radio Talk Show Program” sa miaging 14th Camma wa makasalmot tungod kay wa makaabot ug 10 ka mga episode nga recorded kay na-delete sa among mga files.
Samtang kabahin sa among nadawat nga duha ka prestigious awards sa GMA-TV-Cebu nga mao ang “Best Website” ug ang “Isyu Karon,” nagplano ang management nga i-uli lang tungod kay wa kami mo-submit og entries ug gawas pa ang among local website wa pay sulod ug di mabuksan sa publiko.
Kun tuyo man sa taga Camma nga mohatag og pasidungog sa mga programa ug ubang category sa tri-media, di na lang sila mo-require nga mo-submit sa mga entries sa lain-laing kategorya.
Maayong tun-an nila isip award-giving body nga sila nay mo-identify sa mga angayng hatagan og mga pasidungog.
