Junket ang biyahe sa mga PB members sa US?
With all due respect, akong naobserbahan nga dili haom ang gikatakdang biyahe sa mga sakop sa Hunta Probinsiyal ug ubang mga Capitol officials didto sa New York, U.S.A pagtambong sa drug rehabilitation workshop gikan sa Nov. 10 to 16.
Nakaingon ko nga dili haom tungod kay inig abot nila dinhi sa Sugbo dili gihapon ma-apply ang ilang naantigohan sa workshop kay way drug rehabilitation center nga iya provincial government.
Dili trabaho sa mga board members ang pag-manage og mga rehab centers.
Ang angayng patambungon didto mao ang mga managers sa atong mga lain-laing drug rehabilitation centers sama didto sa Argao ug mga psychiatrist ug mga psychologist nga maoy mga frontliners pag-atiman sa mga drug addict kay mental health ang isyu dinhi.
Sayop sab si Provincial Board Member Gigi Sanchez Zaballero nga mipasabot nga makatabang kini sa pagsulbad sa grabeng problema sa pagkuyanap sa illegal drugs.
Ako lang pahinumduman ang atong mga local legislators nga dili sila mga enforcers nga maoy manakop kay trabaho kini sa taga Philippine Drug Enforcement Agency, National Bureau of Investigation ug kapolisan.
Kung tinuod nga nagpakabana ang atong mga opisyales sa mga drug addict unahon nila ang pagtukod og daghang mga rehab centers aron adto ipasulod ang mga pobreng addict nga naghatag og konsumisyon sa mga ginikanan.
Mas dako ang akong pagtuo nga pahayahay ra gyud sa baga kining gikatakdang biyahe sa atong mga Capitol officials nga kuwarta sa mga magbubuhis ang gamiton kay sa schedule nga workshop, mas daghan pa ang naka-line-up nga kalihokan sa suroy-suroy sa mga landmarks didto sa US.
Abi ba nako nga nagdaginot si Gov. Hilario “Junjun” Davide III sa kuwarta sa katwhan nga dali kaayong nakatugot sa biyahe.
Kun ang igasto sa biyahe isugod pa lang og ugbok og mga haligi sa usa ka drug rehab center sa province owned lot, mopakpak pa ko, Guv!
Kung P200 mil ang gasto matag ulo sa maong workshop sa New York, nagpasabot nga mogasto ang Kapitolyo og P2 milyones sa 10 ka mga delegado.
* * *
Pagka-uyaw gyud kun dunay mga kandidato dinhi sa Sugbo nga magpinatyanay tungod sa kainit sa puoitika niining nagkaduol nga barangay elections karong petsa 28.
Sama didto sa Pangasinan nga dunay incumbent barangay captain ug iyang kauban nga gipamusil niadtong Biyernes sa buntag sa unang adlaw sa filing sa certificate of candidacy.
Suwerte lang si kapitan Johny Pulgofino, 48, residente sa baramgay Annam sa Umingan, Pangasinan kay luwas na sa talandogong kahimtang.
Sa nahibaw-an, alas-8 sa buntag niadtong Biyernes samtang nagbiyahe ang biktima sa national road sakay sa iyang tricycle uban sa iyang mga kauban kalit lang gipangpusil sila sa mga nag-angkasay sa motor.
Mopahimangno lang ko sa magpapili nga likayan gyud ang mga personal nga isyu sa pangampanya og mo-focus lang gyud sa plataporma de gobyerno.
* * *
Dili pa angayng maglipay ug magmaya si Romelo Pabroa code name Billy nga marshal/escort sa Department of Justice (DOJ) witness protection program kay wa pa mahuman iyang kalbaryo nga giakusahan nga nanglogos sa iyang gibantayan nga testigo nga babaye sa “safehouse.”
Misamot karon ang kapungot sa pundok nga Crusade Against Violence pinagulohan ni Thelma Chiong nga kahatagan og hustisya ang biktima human gi-dismiss ni piskal Felixberto Geromo ang kasong rape batok ni Pabroa.
Gani nagplano karon ang pamilya sa biktima nga ikiha sila si piskal Geromo ug State Prosecutor Llena Ipong Avila kay nagtuo ang kabanay nga nagkonsabo ang duha pagdupa-dupa kang Pabroa aron dili mataral sa korte.
Kun wa gyuy salig sila si Chiong sa mga piskal pagresolbar sa ilang i-file unya nga motion for reconsideration puwede man tingali nga mohangyo sab sila nga ipa-inhibit ang DOJ unya adto nila iparesolbar ang kaso sa Ombudsman Visayas kinsa may co-equal jurisdiction kay ang giingong rape nasud sa “in relation to office” ngan nga giingong gipahimuslan ni Pabroa ang biktima atol sa iyang mga duty ug sulod pa gyud sa “safehouse.”
* * *
Wa ko makaila kang SPO1 Aldrin Gulingan sa Highway Patrol Group in Central Visayas kinsa giakusahan nga mangilkil ug P200 mil sa kliyente ni manlalaban Noel Archival nga si Jane Katherine O bugti sa pagpa-release sa gi-impound niini nga sports utility vehicle (SUV) tungod kay wa ma-renew ang rehistro sa sakyanan.
In fairness sa pulis, lisud kining tuhoan kay daku ra sab kaayo ang P200 mil unya ang renewal sa sakyanan mogasto lang sa gamay nga kantidad nga dili kaabot sa P10 mil.
Ang akong basa niini mao nga nagtumo-tumo lang sila si Archival aron mapugos ang taga HPG in Central Visayas pag-release sa SUV.
Makonsensiya sab mo uy og dili tinuod.
