Ana-a gihapon ang mga killer wire

Paita gyud sa atong mga opisyales sa dakbayan sa Sugbo pinangulohan ni Cebu City Mayor Michael Rama kay wa gyud magtagad niining mga linya o wire nga hapit na lang mohawk sa kalsada nga maghatag og risgo sa mga motorista.

Bisan ang habig sa may dalan Escario nga didto nabitik ang process server sa korte makita gihapon ang daghang kutay sa wire nga nagbabag sa kalsada ug didto habig sa nahagbaan ni Philippine Drug Enforcement Agency information officer Jessie Tabanao.

Sa tinuod lang, daghan na kaayo ko og reklamo nga nadawat bahin niining mga wire ug mga poste nga nagtahirig sa bisan asang barangay.

Nganong di man maka-pressure si Mayor Rama sa mga tag-iya niini?

Kun akoy Mayor Mike, pakigkitaan nako ning taga-Visayan Electric Co, Philippine Long Distance Telephone Co, Globe ug taga cable aron maghiusa sila og sulbad niini.

* * *

Kun sakop pa lang unta sa simbahang Romano Katoliko si magsisibya Mike Aton, dili ko mokwestiyon sa iyang bahad ngadto kang Gov. Hilario Davide III nga ikiha sa Ombudsman tungod sa pagpa-Misa sulod sa Kapitolyo niadtong miaging ika-444 nga “Founding Anniversary” sa Sugbo.

Ngan nga lahi iyang simbahan mao nga mokwestiyon ko sa iyang motibo.

Ang akong punto niini, mao nga mag-respetohay gani ta! Di man did-an, kun ganahan mohimo og susamang kalihokan ang bisan unsang tinuhoan sa ilang mga sakop nga trabahante sa Kapitolyo ug sa bisan asang opisina sa gobyerno.

Kining kalaki ni Aton susama ra kini niadtong usa ka party-list nga nag-representar sa Kabataan nga naghimo og balaodnon nga ipatangtang ang tanang mga rebulto sa tanang opisina sa gobyerno.

Apan misibog ang maong magbabalaod sa iyang tinguha kay nakatilaw og batikos sa halos tanang sector.

Pagka daghang importanteng butang nga angayng tutokan diha sa Kapitolyo ni Mike Aton nga maghatag og kabulahanan sa kinabag-an.

* * *

Nakasabot ko sa mga Hong Kong journalists nga miisa ilang mga tingog dihang nang-ambush interview ni Presidente Benigno Aquino III kay wa gyud motubag sa ilang mga pangutana bahin niadtong palpak nga pagsulbad sa Manila hostage crisis nga binuhatan sa usa ka dismissed police officer nga miresulta sa kamatayon sa walo ka mga Hong Kong nationals.

Alang nako di man gyud to binastos ang gihimo sa mga tigbalita kay trabaho man sa usa ka sakop sa media nga kinahanglang “assertive” gyud ilabina nga babagan sa mga security personnel.

Simple kaayo ang mga pangutana nga pwedeng tubagon ni P-Noy sa kalma nga paagi. Ang pangutana sa mga tigbalita sa Hong Kong didto sa Bali, Indonesia mao kun makigtagbo ba siya sa ilang Hong Kong leader nga si Leung Chunying ug mangayog pasaylo ngadto sa mga kabanay sa biktima.

Tinuod nga ang tigbalita modala sa papel nga medyo maki-angayon apan dunay mga sitwasyon nga makalagot ilabina kun di matarong og tubag ang mga pangutana.

Ngan nga may kasing-kasing kadtong mga tawhana nga mobati sa ilang mga kababayan nga nangamatay sa palpak sa Pilipinas, mao nga mosabot ko sa mga tigbalita.

Swerte lang ang atong President nga wa labaya ug binugok o itlog sa manok nga bu-og.

Alang nako overacting ra sab kaayo ang organizing committee sa 2013 Asia-Pacific Economic Cooperation kon Apec forum pag-revoke sa accreditation sa mga tigbalita.

* * *

May rason nga makapangyam-id ang katawhang Pilipinhon niining liderato ni Presidente Noynoy Aquino ilabina sa kawsa niini batok sa corruption kay nag-atubang kini karon og kontrobersiya sa pagwaldas sa binilyong salapi sa katawhan nga gitawag ug Disbursement Acceleration Program kon DAP.

Sama sa akong panawagan kaniadto pa, kinahanglang mopagawas ang taga-Commission on Audit kon COA og comprehensive findings kun gi-unsa ni P-Noy paggasto ang budget sa iyang opisina ug niadtong mga panahon nga siya nahimong kongresista ug senador.

Otro sab ning kampo ni kanhi presidente Gloria Macapagal Arroyo nga mi-kwestiyon sa timing sa filing sa kasong plunder nunot sa Malampaya funds scam.

Nagtuo tingali ning kampo ni Arroyo nga makonbinse nila ang katawhan nga way grabeng kawat sa ilang administrasyon.

Pero unsa man katinuod nga ig-agaw si Ruby Chan Tuason kang kanhi first gentleman Mike Arroyo kinsa nakabulsa ug P240 milyones sa Malampaya funds?

Pilay bahin sa mga Arroyo sa P240 milyones?