Acromegaly ug nganong dili underdog si David
Nyor Gamay (NG): Unsa na imong gitan-aw, Nyor?
Nyor Dako (ND): Kining mubo nga pakighinabi ni Malcolm Gladwell.
NG: Unsa may iyang topic, Nyor?
ND: David and Goliath
NG: Ha?! kakaraan na gud ana, Nyor. Wa diay ka mahibaw sa sugilanon ni David ug Goliath?
ND: Wa, Nyor. Wa na ko kaabot. Ang akong naabtan si Teban ug Golyat na lang nga ga promote sa Happy Mart.
NG: Ay na ganig hinanggaw, Nyor.
ND: Hala, suhito man gyud ka, suginli kuno kos nahibaw-an nimo aning David and Goliath.
NG: Naunsa man intawn ka Nyor, uy. Si David, nga nahimong hari sa Israel, usa pa ka batang tig-tugway sa mga karnero dihang iyang napatay sa panagsangka ang makalilisang nga higante sa mga Philistines nga si Goliath. Kompleto sa bangkaw, bunal ug espada ang higante samtang tirador ray dala ni David. Mao ni ang classic nga kadaugan sa underdog.
ND: Kinsa man diay underdog, Nyor?
NG: Ang-ang man og ang dako, di ang gamay. Wa diay ka kadungog anang gi-ingong ang gamay ray makapuling?
ND: Diha ka nasayop, Nyor.
NG: Ha?
ND: Nganong gaaway man silang duha, Nyor?
NG: Miatake man ang mga Philistines nga gida ni Goliath sa mga Hudiyo.
ND: Nyor, nag-atbangay ang duha ka tribo atubangan sa usa ka walog o valley. Ug walay usa ka pundok nga buot moasdang pag-una, kay sa ilang pag-atake kinahanglan silang manaog sa walog ug dayon mosaka para makigsangka. Sa pagkanaog lang daan delikadog pauwanan na silag bangkaw ug sa pagsaka unya nila sayon na lang silang tigbason. Mao nga nakadesider na lang ang duha ka pundok ila na lang ipa one-on-one ang kumbate. Gipakanaog sa Philistines ang ilang nagtakiang nga higante para panghudlat sa mga Israeli. Ug tuod man nalisang ang tribo sa Israeli nga way usa kanila nga misukol hangtud nga miisa sa iyang kamot ang shepherd nga si David.
NG: Unsa guy dag-anan sa tigtugway og karnero sa usa ka opisyal sa militar.
ND: Paminaw og maayo Nyor. Walay intensyon makigbangga si David kang Goliath tungod kay una, wa siyay kamahoan sa one-on-one nga pakigsangka ug ikaduha, dili sundaw ang tan-aw ni David kang Goliath kon dili usa ka mangtas nga angay tumbahon sa iyang tirador, sama sa mga lion ug lobo nga iyang tiraduron sa agtang kun buot silang mokaon sa iyang mga karnero. Ang tirador ni David dili kanang dunay guma nga imong birahon. Usa kini ka tirador nga ilabyog og pila ka rebulosyon una iwitik ang bato. May daw bala kini nga kakusgon nga makapatay kinig lion ug ingon man galupad nga langgam.
NG: Pero bisan pa, Nyor, dako kaayo si Goliath ug suhito nas pakigsangka. Bintaha kaayo siya batok sa way alamag nga si David.
ND: Dako si Goliath, Nyor, apan resulta sa usa ka abnormality ang iyang pagkadako. Duna siyay Acromegaly o Gigantism. Tungod niini, di siya maayo molakaw ug haap ug may pagkalibat ang panan-aw niini. Wa usab siya kasabot nganong makigsangka si David kaniya nga lipak rag tirador maoy dala. Wa siya masayod nga way plano makig-away kaniya, nga usa ka haap ug gatakiang nga higante. Ang bugtong tumong ra ni David nga tiraduron siya sa tunga sa agtang sama sa pagtirador niani sa mga lion ug mga lobo nga nanghasi sa iyang mga karnero.
NG: Sa ato pa?
ND: Sa ato pa, tungod kay bisag higante si Goliath, apan kay baldado kini, haap ug way alamag sa plano ni David, siya ang underdog ning maong panagsangka. Susama ra kinis America nga gipildi sa Vietnam.
