Nanakod karon ang binuhatan ni Gamorot sa BIR
Wa pa siguro mo malimot niadtong kontrobersiyal nga revenue officer sa Bureau of Internal Revenue kon (BIR) nga si Benjamin Gamorot nga nataktak na kinsa na-entrap kaniadto tungod sa pagpangilkil sa usa ka negosyante nga nag-process sa BIR sa capital gains tax ug documentary stamp tax alang sa yuta.
Samot na gyud ron nga inyong mahinumdoman si Gamorot kay dunay laing revenue officer sa BIR nga susama og kabuang ni Gamorot.
Haskang paita gyud kay abi ba nako nga nagkinto na ang tanang mga revenue officer sa BIR paghimo og mga tinunto.
Mabalaka lang ta nga moanha sa BIR nga mo-transact kay tingaleg kita na say mabiktima sa mga kanahan.
Karong bag-o, dunay laing revenue officer ang nag-atubang ug mga kaso sa Cebu City Regional Trial Court tungod sa pagdispalko og dakong kuwarta.
Ang gipasakaan og kasong estafa through falsification of official documents ug kasong kalapasan sa Anti-graft and Corrupt Practices Act mao si Mae Cheryl De Gracia Enguio.
Gawas sa iyang pagka-revenue officer, si Enguio usa sab ka computer operator sa BIR.
Sa imbestigasyon sa Ombudsman Visayas, wa motubag ug wa moatubang si Enguio ug naestablisar nga wa kini mo-turnover ngadto sa national treasury sa gibayad nga capital gains tax ug documentary stamp tax nga binayad sa usa ka Francis Fabian Borromeo kinsa nag-process sa transfer sa title sa iyang condominium unit ngadto sa nakapalit.
Nabulsa sa opisyal ang kinatibuk-ang P202 mil kapin ug miisyu pa kini og mga peke nga dokumento.
Sa duha ka mga kaso girekomendar nga makapiyansa siya ug P70 mil.
Samtang akong nahibaw-an nga base sa mga dokumento sa Ombudsman, duna pay laing upat ka mga biktima sa mga kuwestiyonableng transaction ni Enguio sa BIR nga karon giimbestigahan pa.
Sa laing upat ka mga transaction, nakasakiyo si Enguio ug sobra sa P1 milyon.
Kanus-a man tawon mahurot ning mga kurakot sa gobyerno uy ug kanus-a man tawon ni sila panggabaan!
* * *
Pagkadaghan gyud diay sa akong mga kaubanan sa broadcast ang managan karong umaabot eleksiyon sa Barangay karong Oct. 28.
Ang common nilang rason sa pagsalmot tungod kay mas epektibo silang mangalagad sa ilang tagsa-tagsa ka barangay ngan nga dunay daghang connection sa atong mga buhatan sa gobyerno isip mga sakop sa media.
Niadtong Sabado sa akong tulumanon nga “Dialogue on the Air,” kompirmado nga si Busay barangay captain Yody Sanchez kinsa anaa sa iyang katapusang termino ug isip production manager sa dyDD Bantay Radyo, magpapili gihapon sa pagkakonsehal uban sa iyang anak. Matud niya nga gituyo niya kini aron matutokan ang iyang mga napondar nga mga proyekto.
Sila si Apas barangay captain Ramil Ayuman sa dyRC ug dySS Super Konsehal Allan Majait, maninguha usab nga langkaton ang katapusan nilang termino.
Samtang ang lain nakong mga kauban sa dySS Super Radyo nga sila si Super Jeffrey Tumulak sa Camputhaw ug Super Gabriel Bonjoc sa Poblacion, Talisay susama usab og direksiyon.
Samtang maninguha usab si Super Gerry Auxillo nga makasud pagkakonsehal sa Quiot unya si Super Norman Mendoza nagduha-duha pa nga mag-konsehal sa Ibabao-Estancia, Mandaue.
Si Garry Lao sa The Freeman, kinsa incumbent councilor sa Tejero ning Siudad maninguha pagdaug sa mao gihapong katungdanan aron pagtiwas sa iyang katapusang termino o 3rd term.
Si Fred Languido sa dyLA ug The Freeman naingganyo nga magpapili pagkakonsehal sa Kalunasan tungod kay iyang nakita nga dunay daghang mga pagkulang sa serbisyo.
Si Dario Gil sa dyLA gihapon, maningkamot nga makasud sa magic seven sa Poblacion Argao taliwa nga independente siya.
Akong nahibaw-an nga mobalik pagkakapitan sa Banilad si Malou Inocando Tabar kinsa nangalagad karon sa dyRC ug CCTN-47.
Si Wangwang Capistrano sa dyRF giingong magkonsehal sa Mambaling ug si Aida Tampus sa dyHP buot sab nga mosulod sa konseho sa Hipodromo.
Si Commission on Elections in Central Visayas Legal Officer Enerio Boy Ocariza miingon nga kinahanglang mo-leave o ba kaha mo-resign ang mga sakop sa media nga mosalmot sa politika basi sa probisyon sa “Fair Elections Act.”
Gawas niini nanawagan si Ocariza sa mga sakop sa prensa ug ubang mga kandidato nga likayan ang pagpahimo og tarpaulin nga may dagway sa mga dagkung opisyal sa gobyerno aron dili maproblema puhon.
So, good luck na lang sa tanan nakong mga amigo ug mga kaubanan! Dag-a ninyo ha! Hehehe.
* * *
Magpasalamat kaayo ko ninyo akong mga suking tigpaminaw sa akong radio program sa dySS Super Radyo/Radyo GMA kay pulos nangharos sa pagka number 1 sa tanang mga AM stations basi sa pinaka-latest nga survey nga gipahigayon sa Nielsen Media Research sa second quarter niining tuiga.
Puwera buyag consistent gyud kaayo ang rating sa pagka-no. 1, ang akong programa nga “Lloyd Suarez On Board Saksi” nga mapaminawan gikan sa alas-9 sa gabii hangtud alas-11 sa gabii.
Nagpabilin sab nga nanganaw-kanaw sa kahanginan ang akong programa nga “Dialogue on the Air” matag Sabado gikan sa alas-2:30 hangtud sa alas-4:30 sa hapon. Kining maong programa midaug sab kaniadto nga “Best Radio Talk Show” sa Cebu Archdiocesan Mass Media Awards o Camma.
Daghan gyud kaayong salamat sa inyong pagsalig. Pinaagi niining laing mga kadaugan, maghatag kini kanako og igong kadasig paghasmag sa bisan unsang hagit ug mga pagsuway isip usa ka responsableng magsisibya dinhi sa Sugbo.
Atangi sab diay ninyo nga sugod karong sayong gabii ang “Balitang Bisdak” sa GMA-7 inyo na sang mabati sa dySS.
