Megan, Mitoy, Mercury, Malls
Namiktyur kos presscon para sa concert ni American Idol Kris Allen sulod SM dihang may nakit-an kong babaye nga gadalag papel nga iyang gibasa-basa. Nadani dayon ko sa iyang nipis nga lawas og taas nga barug mao nga ako dayong giti-on akong camera kaniya. Sa iyang paglakaw sa kilid sa stage paingon sa atubangan, usahay mababagan ang angle sa akong camera sa poste, sa tanum o di ba sa mga taw nga daw dunay isulti niya nga importante.
Nitan-aw ang maniniyot sa akong tupad sa akong LCD ug mi-ingog –“Lain man lagi nang imong gi-shootan du.”
“Kinsa man ni, partz? Guapa man kaayo.” Gipangutana ko siya.
“Megan Young bitaw na.”
“Katong sa PBB?” Mitando siya. Dayon mipatong sa stage si Miss Young para mo emcee sa presscon.
Gipa-adto dayon mi sa Waterfront para ma one-on-one namo si Allen ug ang ubang manukaray sa maong concert. Nangandoy kong moadto pud si Miss Young aron makakuha kog mas duol nga picture apan wala siya moadto. Hinuon katunga sa akong 8 gig nga CF card puros na man hulagway niya.
Pag-uli ko sa amo ako dayong gi post sa flickr akong kuha ug ako dayong gi google ang ngan nga Megan Young ug usa sa akong nakit-an mao ang YouTube video nga misayaw siya ug ang iyang mga kauban sa PBB uban sa mga inmates sa Bagong Buhay Rehabilitation Center. Ang theme sa Pinoy Big brother ang ilang gisayaw.
Of course, nakahibaw na kita karon nga siya ang naka-break sa Pinay jinx sa Miss World.
* * *
“Help!” sa Beatles maoy katapusang gi-kanta ni Mitoy sa The Voice Philippines. Ug sama sa tanan niyang mga pagkanta diin gilamoy niya ang iyang mga gikabangga, nahimong pure Mitoy ang maong Lennon-McCartney nga kanta.
Ang iyang performance pagka-Sabado maoy nakapakugang kanako. Kay sa iyang pagkanta og “Anak” si Freddie Aguilar gihimo niyang Freddie Mercury (sa Queen).
Matag tan-aw nako sa performance ni Mitoy mas makaingon ko nga dili siya singer kon dili magician o salamangkero nga dili ang kaabtik sa kamot (sleight of hand) ang gigamit kun dili ang gahum sa iyang tingog.
* * *
Si Sacha Noam, Baron Cohen (Borat, Ali G) ga-plano untang mohimog salida kabahin sa banda nga Queen (Bohemian Rhapsody, We Are The Champions) diin siya ang modala sa papel sa lead singer nga si Freddie Mercury (Farrokh Bulsara ang original nga pangan) nga namatay sa AIDS. Ki-at sa entablado ang gay nga si Mercury. Ang pagkaki-at ug pagka-bayot ni Mercury mao untay buot ipakita ni Baron Cohen sa sine apan wala ganahi niini ang mga sakop sa Queen nga buot ipahimong wholesome si Mercury para sa usa ka PG nga salida.
* * *
Makig showdown karong semanaha ang mga pelikula sa South Korea batok sa mga pelikula sa Europa. Samtang mopasundayag ang Ayala sa Cine Europa 16 karong petsa 4,5 ug 6, ang SM City Cebu mopa-ukyab man sab sa ilang Korean Film Festival sa mao gihapong mga petsa.
Sayang kay imbes daghan unta tang makit-an gamay na lang kay magdungan man sila. Mamili na lang tag maayo. Kun mosukol mog taas kayo nga linya ari mos Korean film fest diin daghan kaayong batan-on ang maglaray. Morag mas menos ang taw sa Ayala ani.
Abi nakog sale ra mag-initay ning mga malls, mopa-ugat man sab diay sa ilang libreng film fest.
