Mayor Rama, danghag?

Unsa katinuod nga usa ka “service provider” nga tig-seminar sab og mga tawo sa bisan unsang isyu maoy unang mikuwestiyon sa grupo nila ni Francisco Paragas, managing director sa Paglaum Basureros 20/20 Inc?

Si Cebu City Administrator Jose Marie Poblete wa motribukar sa pangan sa “service provider” nga maoy unang nanawag kaniya ug nagtuo siya nga nasuya lang kay naunhan sa grupo nila ni Paragas nga nahimong katie-up ni engineer Randy Navarro, community environment and natural resources officer sa pag-conduct niadtong kontrobersyal nga seminar sa may SM Cinema 1 niadtong Setyembre 17 nga gipabayad og tag P750 ang matag motambong nga mga negosyante.

Ang katuyoan sa maong seminar mao ang pagpasabot sa City Ordinance no. 2243 nga nagmandu sa tanang mga establisimento pagduso sa ilang Environmental Sustainability Action Plan or ESAP isip usa na sa mga requirements pag-renew sa ilang business o mayor’s permit.

Duna say mga impormasyon nga akong nadawat nga posible kuno nga pangdaut lang sa Rama administration ang isyu ug ang nagpasiugda sa smear campaign mao ang kampo sa Bando Osmeña – Pundok Kauswagan kon BO-PK.

Hinuon posible man kining tanan nga dunay nasuya nila ni Paragas ug pangguba niining kasamtangang pamunoan ni Rama.

Apan sa akong basa ning maong kontrobersiya, dili makapanghinaw si Mayor Michael Rama tungod kay giangkon nila ni City Administrator Poblete, manlalaban Janeses “Jade” Ponce ug Navarro sa akong programang “Dialogue on the Air” sa dySS Super Radyo niadtong Sabado nga may pagtugot sa mayor ang maong seminar nga pasiugdahan sa grupo nila ni Paragas sa Paglaum Basureros 20/20 Inc. unya gitugotan pagpangolekta og kantidad sa mga motunga basi niadtong suwat ni Navarro.

Giklaro gyud nila ni Poblete nga pirma ni Mayor Rama ang ubos nga bahin sa suwat ni Navarro address sa mayor nga nangayo og pagtugot bahin sa seminar ug pagpangolekta.

Si Navarro miingon usab sa maong programa nga diha siya sa kilid sa mayor nga mibasa sa maong suwat ug dayon iyang nakita nga mipirma gyud.

Ambot kun resulta ba sa pagkatanga, pagkadanghag, pagkamaayong tawo o ba kaha kompiyansa lang gyud.

Si Poblete miingon nga wa gyud mahibawo ang mayor sa pagkatawo nila ni Paragas nga maoy nag-spearhead sa seminar nga gitugtan sa mayor.

Pero with all due respect, ang ligdong ug tarong nga opisyal kinahanglang tarungon pagsubay ang personalidad sa tawo kun di nato kaila. Ingon ani ang liderato ni Rama nga tira-pasagad lang og hasmag? O ba kaha wa na nila angkona ang pakigsuod nila ni Paragas kay nabulilyaso ang pangwarta ug pagpahimulos sa gahum?

Ilang gibalik-balik ang punto nga nag-encourage ang gobyerno sa gitawag og “public private partnership” sa mga himoong proyekto sama sa kontrobersiyal nga seminar. Nindot lagi unta kini kun way ill motive ang mga kaalyado sa gobyerno pagpatuman sa mga proyekto.

Kun wa mabulilyaso, dili maputol ang kabuang nila ni Paragas sa pagpangwarta. Dili na makabasol nako si Paragas nga naingon ani ang tono sa akong komentaryo kay bisag among gitawgan nga motunga sa programa, mibalibad kini.

Gipasabot nila ni Poblete nga wa gyud intawon makakuwarta si Mayor Rama ug silang mga opisyales sa kontrobersiyal nga seminar.

Ubos na kini karon sa imbestigasyon sa Cebu City Legal Division ug dunay ipatawag nga executive session ang konseho karong Oktubre 23 bahin sa maong kontrobersiya.

Sumpay ning maong isyu, daghan na kaayong reklamo ang nadawat sa lain-laing opisina sa City Hall gikan sa mga negosyante bahin niadtong pagpangolekta og tag P750 sa taga-Paglaum Basureros.

Dunay uban gusto nga mangayo og refund sa City Hall. Apan sila si Paragas maoy nangolekta sa kantidad ug miisyu og resibo nga way klaro.

Si Joselito “Lito” Vasquez, executive assistant ni City Councilor Nida Cabrera miingon nga daghan kaayong tawag sa telepono ang ilang nadawat nga dalang pamalikas tungod sa kalagot.

Nagpadala na usab og suwat-reklamo ang West Gorordo Hotel, Mayflower Inn ug ang Elicon House pinaagi kang Ma. Edna Lee anak ni late Sandiganbayan Justice German Lee ngadto kang Rama.

Samtang duna say susama ug reklamo ang mitugpa didto sa buhatan ni City Administrator Poblete, Ponce ug Navarro.

Niadtong Sabado, usa ka Luvimin Sabay nga nagnegosyo og kan-anan ug furniture miingon nga ang taga-Paglaum Basureros 20/20 Inc grabe kaayong nakagamit sa City Hall kay miingon gyud nga way mahitabong renewal sa business o mayor’s permit kun di mosalmot sa seminar unya nagpaila gyud nga taga-City Hall ang naghatud sa imbitasyon sa seminar unya pag-adto nila didto sa venue way taga-City Hall nga nakit-an.

Kun wa pa magkango si Mayor Rama ug mitoon pa daan sa epekto sa pagpangolekta, wa untay negatibong isyu sa nindot nga katuyoan sa seminar. Pagbantay, Mayor Mike! Porbida!

Alang niadtong wa pa makaseminar sa ESAP gipahibawo na ni Navarro nga libre na gyud ang mga succeeding seminar anha sa Cebu City Health ug sugdan kini karong Oct. 7.

Kun gusto pa gyud sila ug dako nga venue ug mas hamugaway puwedeng hangyoon si Gov. Hilario Davide III nga gamitong libre ang Cebu International Convention Center (CICC) aron di sab na puy-an ug mga abat ang CICC.

* * *

Insakto baya si Sen. Miriam Defensor-Santiago nga posibleng ipapatay si Janet Lim-Napoles nila ni Senate Minority Leader Juan Ponce Enrile ug sa ubang mga magbabalaud nga nalambigit sa pork barrel scam.

Kini tungod sa pagkadesperado na nila ni Enrile pagkakaron.

Alang nako, gawas niiing tinguha ni Senadora Santiago nga makuhaan og “perpetuation of testimony” si Napoles aron ingkaso patyon naay ikabilin nga deklarasyon, kinahanglang ang Senate Blue Ribbon Committee nga gipangulohan ni Sen. Teofisto Guingona III maninguha usab niini.

Kinahanglang adto ra gyud kuhaan sa sulod sa iyang selda si Napoles aron way risgo.