The plight of the flickr thief
Isip maniniyot, duna koy mga pangutana alang kang Mark Joseph Solis.
Si Mark Joseph Solis usa ka magtutungha sa Masters in Public Administration sa National College of Public Administration and Governance sa University of the Philippines nga nangilad sa Chilean embassy pinaagi sa pag sumiter og picture nga dili siya ang nagkuha sa usa ka photo contest nga gihimo ning maong embassy.
Gi-angkon ni Solis nga iyang kuha ang maong hulagway uban sa istorya nga ang bata sa hulagway gihinganlan og Nilo ug nga mitabang kini sa iyang amahan sa usa ka seaweed farm sa Zamboanga. Ug kon suhito ka sa mga hitsura, ingnun ta lang make-up artist ka, makabantay dayon ka nga dili man Pilipino og mata ang mong bata.
Ug tuod man, dili Pinoy ang maong bata kay usa man kini ka Brazilian. Gikuha sa Brazil ang maong hulagway sa usa ka social entrepreneur nga si Gregory John Smith. Gi-upload kini sa Flickr ni Smith ug iya kining gihatagan og title nga “Neptune, King of the sea.”
Dili lang kini ang unang higayon nga nangiwkiw si Solis sa Flickr. Dili usab kini ang unang higayon nga gi-intra ni Solis ang “Neptune” ni Smith. Nahibaw-an na lang nga kadaghan na manguha si Solis sa Children At Risk Foundation’s Flickr album ni Smith.
Miangkon na si Solis sa iyang binuhatan, nangayog pasaylo ug mi-uli sa iyang mga ganti.
Bisan pa man og dili iya ang mga entry nga iyang gi submit sa mga photo contest, makaingon ta nga aduna siyay interest sa photography. Maong buot ako mangutana kaniya kon tinuoray ba siyang maniniyot. Ug kon ugaling maniniyot siya, buot usab akong mangutana sa iyang system –Canon ba o Nikon o mirror-less.
Mangutana usab unta ko niya kon importante ba ang isolation sa subject, nga maoy nakit-an nako nga trend sa iyang mga kinawat nga photos, para ma potential winner sa usa ka photo contest.
Ug kon dili man gani siya maniniyot, unsa may hinungdan nga mi salmot siya sa maong mga photo contest gawas sa posibleng pangwarta o pagpakita sa iyang pagka maru?
Sa iyang acceptance speech sa Chilean Embassy ma klaro ang iyang pagka utokan ug pagka maayo mohan-ay og pulong, mas maayo pa sa mga senador nato nga mangawat lang sa sinulat sa uban. Mao nga buot usab ako mangutana kaniya kon duna bay extra kilig kaniya ang photo contest nga dili niya makuha sa writing contests.
Daghan ang miingon nga maayo siyag mata. Ug nga tungod kay maayo siya mamili og picture maayo siyang himuong judge sa sunod Sinulog Photo contest. Apan alang kanako, dili sa mata ang abilidad ni Solis kon dili sa pagsabot sa panginahanglan sa katilingban, sa mga photo contest organizers ug maong matunol dayon niya ang hulagway nga ilang gipangita. Gatuo ako nga sama sa usa ka sociopath, wala siyay pagbati ning maong mga hulagway ug wa siyay pakialam ning maong mga organizers, mga galamiton lang sila sa iyang pagtesting sa iyang kaugalingon kon unsa siya ka marunong. Ug gatuo ako nga dili lang kini sa photography kon dili sa tanang butang sa kinabuhi nga kaya niyang sudlan.
