Daghan na kaayong mga huwes nga gipahamtangan og silot sa Korte Suprema tungod sa pagpasagad og gamit sa ilang contempt power ngadto ni bisan kinsa.
Kagahapon among nakompirmar nga gi-show cause or pa-esplikahon sud sa lima ka adlaw sila si manlalaban Pachico Seares columnist sa Sun.star ug Leo Lastimosa sa ABS-CBN, dyAB ug The Freeman tungod sa ilang mga komentaryo sa nakab-ot nga desisyon sa huwes nga nagkonbikto ni Leo sa kasong libel.
In fairness nilang Leo ug Seares, makahimo na sila og pagsaway sa nakab-ot nga hukom sa huwes kay nahuman na ang kaso. Daghan nang desisyon nga pwedeng labhan ang huwes sa iyang desisyon nga tan-aw sa nahingtungdan nga medyo sayop ug di maki-angayon.
Akong basa niini, di man tingali angayng mangunay si Judge Yrastorza pag-cite og indirect contempt nilang Seares ug Lastimosa kay di man mahitabo nga ang complainant mahug nga arbiter ug executioner.
Akong sublion nga di gyud maayo nga modawat og allowance ang mga huwes gikan sa mga local government units sa ngan sa delicadeza kay bisan unsaon, makuwestiyon gyud ang desisyon ilabina kun pabor ngadto sa nihatag og allowance.
* * *
Ugma na ang lubong ni Philippine Drug Enforcement Agency kon PDEA in Central Visayas Information Officer Jesus “Jessie” Tabanao didto sa lungsod sa Moalboal nga gipusil-patay niadtong Sept. 14 sa alas-11:45 sa gabii sa may dalan Escario, barangay Camputhaw ning dakbayan.
Subo nga palandungon kay hangtud karon wa pa mailhi kun kinsay responsable sa pagpatay ni Jessie.
Si Supt. Carmelo Dayon nga maoy nangulo sa Task Force Tabanao mi-prangka niadtong Sabado sa among programang “Dialogue on the Air” sa dySS Super Radyo nga lisud pa gyud kaayo ang pag-identify sa assailant kay naka-helmet unya ilang gisiguro karon ang pagkamatinud-anon sa mga testigo.
Si PDEA Director Lyndon Aspacio wa mopadaplin sa mga pagtuo nga kauban ra sa PDEA ang responsable apan iyang giklaro nga lisud sab kaayo nga dudahan dayon nga inside job kay bisag dunay factionalism within PDEA, dili mahitabo nga mosangpot sa pag-unay ug pinatyanay.
Ang gidudahan karon nila ni Director Aspacio ug Supt. Dayon nga kaila ra ni Jessie ang mipatay kaniya or ang mipa-patay kaniya tungod kay dunay napatik nga mensahe sa usa sa tulo ka cellular phones ni Jessie nga adto sila magkita didto sa iyang natumbahan.
Unya ilang nasubay nga si Jessie medyo dunay gipa-abot nga taw didto mao nga iyang gipa-hazard ang signal light sa iyang Strada Mitsubishi.
Ilang gidudahan nga ang pagpatay ni Jessie sumpay gyud sa iyang trabaho sa PDEA.
Bisan si Jessie atoa na gibalhin sa Butuan ilang gipasabot nga tungod sa pagkakugihan ug pagkasinsero ni Jessie sa trabaho posible nga kadtong pakigkita kaniya sa iyang gikasabot tipik ug kabahin kadto sa case build-up nga subject sa dakong operation sa PDEA.
* * *
Salamat kaayo sa tanan nga misuporta ug mi-sponsor sa bag-o lang nga kasaulogan sa among ika- 19th Cebu Press Freedom Week sama sa management sa Cebu Eastern College kon CEC kay diha gipahigayon ang among tinuig nga basketball tournament sa Press Freedom ug sa Newsmen Basketball Association of Cebu (NBAC).
Salamat sab kaayo ni Sir Chester Cokaliong sa Cokaliong Shipping Lines nga mi-abag ug dako sa among liga sa Newsmen Basketball Association of Cebu ug kang Rey Cañete, daku-daku sa mga referee ug officiating table.
Daku gyud kaayo ko ug pasalamat sa CEC ilabina nila ni Sir Jeff Go, Sir Sammy Sia ug Sir John Maraat kay ila gyung pangitaan ug paagi nga makagamit kaming mga sakop sa media sa ilang basketball gym basta hisgutan ang among paugnat sa kusog.
Magpasalamat sab ko sa Coca Cola Bottlers Philippines (Coke) pinaagi kang Sir Dennis Mendoza, Sir Gerry Yntig sa Globe Telecom, Jane Paredes sa Smart Communications, manlalaban Girlie Garces sa San Miguel Corp., sa Toledo SPC Power ug sa uban pa nga naka-ayuda sa usa ka semana namo nga kalihokan.
Sa among basketball tournament sa Press Freedom, na-angkon gihapon sa mga police beat reporters ang kampyonato niadtong Sabado samtang kami sa judiciary beat maoy 1st runner-up unya ang SPORTS maoy 2nd runner-up ug 3rd runner-up ang mga beat reporters sa Cebu City Hall.
Salamat ni Michelle So sa Sun.Star Daily nga maoy instrumento nga nakahatag og trophy sa champion ug cash prizes nga P7,000, P5,000, 1st runner-up, P4,000 sa 2nd runner-up ug P3,000 sa 3rd runner-up nga nahatag dayon human sa duwa niadtong Sabado sa udto diha sa Cebu Eastern College.
Samtang sa torneyo sa Newsmen Basketball Association of Cebu (NBAC) daku sab namong pasalamat sa (CFBJ) kon Cebu Federation of Beat Journalists pinangulohan ni Sir Elias Baquero kay mao say mitunol ug P20,000 alang sa awarding sa NBAC nga pormal namong nahatag niadtong Sabado sa gabii atol sa culmination and fellowship night sa 19th Cebu Press Freedom Week.
Sa NBAC tournament, kami sa GMA-7/dySS maoy champion ug nakuha namo ang trophy ug cash nga balig P5,000 Ang combined team sa Cebu Daily News (CDN) ug The Freeman maoy 1st runner-up ug dala sab nila ang ilang trophy ug cash nga P3,000. Nakuha usab sa CCTN-47 ang P2,000 cash ug ilang trophy pagka 2nd runner-up; Unya ang Sun.Star / Bombo Radyo maoy 3rd runner-up ug duna silay trophy ug cash nga P1,000.00.
Unya congratulations kang Super Gabriel Bonjoc kay duha ka title pagka MVP ang iyang nahuptan niadtong Sabado nga mao sa NBAC ug sa Press Freedom Basketball tournament.
Ang uban sab kanamo gihatagan og individual medal ni NBAC Commissioner Bobby Inoferio, sama sa mythical five, defensive player, sportsmanship ug most improved player.