Hari sa mga telepono

Nyor Dako (ND): O, Nyor, unsa man nang imong gikalingawan og tan-aw anang imong tablet?

Nyor Gamay (NG): Di ni tablet Nyor. Phablet ni.

ND: Unsa man nang phablet? Public Market?

NG: Hanggawa gyud nimo Nyor. Kining phablet, kombi ni sa smartphone ug tablet.

ND: Unsa man nang smartphone, Nyor? Telepono nga bright? Smart man kaha.

NG: Pwede ra sab natong matawag nga bright kay daghan man og kamahuang himoon kining mga smartphone.

ND: Mao ba? Unya unsa man lagi nang imong gikalingawan og tan-aw diha sa imong phablet?

NG: Ang mga bag-ong produkto sa Apple.

ND: Bag-ong mansanas? Gi bio-engineer nga mansanas?

NG: Corny na kaayo ka Nyor.

ND: Aw o. Apple as in iPhone; iPod; iPad; iTune ug uban pa. Gi-gutom ra tingali ko Nyor maong naka-picture ko og mansanas. Unsa man ng produktoha imong gi-wiwi diha?

NG: Gitan-aw nakog possible na ba gyud nga dunay iPhone nga mo-ubos sa singko mil. Pero wala pa man diay. Kani gong iPhone 5C giingon man nga tag US $99 kuno.

ND: Sa ato pa modagan gikan sa P4,500 ngadto sa P5,000.

NG: Unta. Pero mao diay kini prisyo sa 5C sa America kun mo-subscribe kag usa ka telecommunications company sama sa AT&T. Apan kun mag free line ka mokabat gihapon ang maong iPhone og US $550. Mahal lang gihapon kun way mo-subsidize niini.

ND: Wa diay ka makontento anang imong phablet nga ga-sige pa man gihapon kag pangitag mansanas?

NG: Fans baya kong Steve Jobs, Nyor. Cherry ning akong phablet Nyor nga maoy nanguhag market sa Samsung. Ang Samsung mao nay namaraw sa iPhone.

ND: Mao ba? Nganong wa man lagi ko kita nimo ga turtle neck? Sige man tong ga-turtle neck si Steve Jobs.

NG: Dali mangatol akong liog Nyor.

ND: Pero Nyor, kanang imong Cherry bisag apilan pa nag Samsung ug Apple di na katay-og sa akong telepono nga maoy hari sa tanan.

NG: Hari gyud? Basig maparehas nas manok.

ND: Unsa nang manoka Nyor ba?

NG: Kadto bang maestro kuno nga manok. Kadto ba kunong di mapildi kay maestro lagi. Naunsa man nga gibuno ra man gihapon. Gibuno ang maestro nga manok sa Principal nga manok. Basig bun-on na ang imong hari nga telepono sa Emperor.

ND: Wa pa matawo ang emperor nga mobuno sa akong hari, Nyor. Tan-awa.

NG: Uy kagamay gud ana imong hari, imo ra mang giluklok sa bugan.

ND: Tan-awa lang. Sa nga-nga pa lang daan Hari na. CD-R King C8. Duna nay flashlight, MP3 ug kamera unya kinyentos ra.

NG: Gibaliw man ka Nyor uy. Di kaabot usa ka buwan guba na na.

ND: Unya kun buhi pa ni rong Pasko, tagaan ko nimog pinaskohan nga iPhone? Ug kun motiurok na ni, akoy palit nimog Samsung.

NG: Di ko mo-sukol Nyor. Kuyawg masumaran pa anang imong hari, Wa ra ba kaayoy manginteres og kawat ana.