Beyond the baboy

Sa 18 ka tinun-an nga akong gipa-suwat og opinion kabahin sa gubat sa Zamboanga tali sa gobyerno ug sa Moro National Liberation Front (MNLF) mga lima kanila ang miingong may kalabutan kini sa pork barrel scam controversy.

Gani mosugyot man sila nga dunay kalabutan si Janet “Pork Barrel Queen” Napoles ning gubot sa Mindanao. Apan ang naka-paet lang kay wa silay mahatag nga connection gawas lang sa timing o kon nganong atol man ang panghasi sa pundok ni Nur Misuari sa imbistigasyon sa Priority Development Assistance Fund (PDAF) nga gi-anggaan og Pork Barrel.

Well, no one, it seems, is exempted from paranoia. Kay bisan ang mga batan-on mahiligon na usab kaayo og conspiracy churva. Ang pagtuo nga dunay gapaluyo sa gapaluyo. Ug nga usa ray hinungdan sa tanan. Pero tagaan natog chance. Kay bisan pa man niadtong wala pa manghasi ang faction ni Misuari sa Mindanao, daghan na nga mga explosion nga gi-connect sa popular imagination kang Napoles.

Ang appeal sa conspiracy theory mao man ang pag usa (unify) sa mga lain-laing nahitabo nga sa ingon masubay o matuhog kini og nga sayon na lang kining sabton. Ma simplify tanan ngadto sa usa lang ka plot, sugilanon ug theory. Gusto man gud ang tanan og cohesion.

Ang kining panginahanglan sa kadaghanan nga ma simplify ang tanan mao usay hinungdan nga matukod ang mga religion ug mga kalihukan.

Sama pananglit sa martsa para pag abolish sa pork barrel. Simple ang mensahe –Abolish the Pork Barrel. Ang pork barrel nga maoy tunubdan sa corruption ug pagpangilkil sa gobyerno ngil-ad og angay nang tangtangon. Apan ang pangutana –unsa man unyay atong buhaton aron ma tangtang ang pork barrel.

Maayo unta kon sa sunod rally duna nay mosugyot kon unsaon pagpadahili sa serbisyo ngadto sa lagyong kalungsuran. Mao man unta gud kini ang tumong sa Pork Barrel sa wa pa kini tuli-a.

Ang akong gikahadlukan kon ang tanan natong attention naa na lang unya sa pagbitay nilang Revilla, Enrile ug Estrada. Ang pag vilify o paghimog demonyo sa pipila ka binuhat sayon ra. Ang lisud mao ang paghimog pamaagi nga walay mahimong demonyo sa atong mga public servants.

Unsa may atong ipuli sa baboy? Ang kalag sa mga kanding ni Cuenco nga nangahanaw na.