Court Sheriff nabitik sa wire

Nakatayming ko kagahapon nga nakasunod kang Regional Trial Sheriff Nelson Basubas nga nagmotor subay sa dalan Escario.

Sa sinugdanan nagtuo ko nga usa siya ka kawani sa Kapitolyo nga naka-office uniform nga nagkahugaw na ang likod unya murag hubog nga nag-drive sa motor kay pinabitay ang walang tiil unya ang tuo ra niyang kamot ang naggunit sa manobela.

Lain nakong gituhoan nga nag-exhibition siya pag-drive. Apan tanto nakong pag-obserbar lahi naman gyud ang dagan niya kay nag-ekis-ekis na man unya murag katumbahon.

Mao nga misantop sa akong huna-huna nga siya gi-atake mao nga mipaduol ko kaniya aron pag-rescue ug aron dili mapantok ang iyang ulo ug kalooy sa Diyos milampos ko.

Mao nga amo siyang gitabang uban sa mga opisyales sa barangay Camputhaw.

Ang akong nahibaw-an nga ang naingnan diay sa iyang pagka-baldado mao nga nabitik iyang liog sa wire nga nayat-yat diha duol sa Philhealth.

Kun kinsa man ang tag-iya sa wire maayo gyung manubag sa nahitabo sa court sheriff.

* * *

Naunsa na man tawn ni oi! Nagkadaghan na man sa atong mga senador ang gituhoan nga nalambigit niining tinunto sa PDAF kon Priority Development Assistance Fund o “pork barrel.”

Naay Senate President Franklin Drillon nga miklaro kagahapon nga wa siyay anomaliya pero lami man kaayo og pahiyom sa iyang pakighulagway sa mastermind sa P10 billion scam nga si Janet Lim-Napoles.

Basi sa 2012 report sa Commission on Audit ug sa Department of Budget and Management si Napoles nakakuha ug P178 million sa administrasyon na ni P-Noy gikan sa PDAF sa unom ka mga senador nga sila si Juan Ponce Enrile, Jinggoy Estrada, Loren Legarda, Bongbong Marcos, Bong Revilla ug Tito Sotto.

Matuwid na daan pa ni, Mr. President?

Sa gipahigayong hearing sa Senate Blue Ribbon Committee nahisgotan gihapon ang maong mga senador apil na sila si Gringo Honasan, kanhi senador Edgardo Angara, Lito Lapid ug Ralph Recto nga pulos sab nanghimakak.

Wa kaha malambigit si Presidente Noynoy Aquino?

* * *

Bisan layo ta didto sa Zamboanga City, apektado gihapon ta sa nahitabong stand-off tali sa puwersa sa gobyerno ug sa faction ni Moro National Liberation Front chairman Nur Misuari.

Posible sad baya nga mag-alboroto sab ning atong mga kaigsoonang Muslim nga anaa dinhi nagpuyo sa Sugbo.

Apektado sad ta kay naka-agaw pansin kini sa atong pagtutok niining grabeng corruption sa PDAF sa atong mga magbabalaud.

Dili gubat ang sulbad diha sa Mindanao kun dili mao ang pakig-sabot-sabot alang sa kalinaw.

Maglaum ko nga dili marisgo ang kinabuhi sa mga sibilyan nga ubos karon sa kustodiya sa mga rebelde.

* * *

Pagkalaksot ug pagkabati gyud paminawn sa usa ka pari nga maningka ug mangasaba atubangan sa daghang parokyano ngan nga sila maoy gitan-aw nga simbolo sa kalinaw ug panaghigugmaay.

Maot man gani paminawn nga mo-isa lang ang tingog, unsa na kaha kung manghapak na sa iyang kaubang pari o ba kaha mohimo ug mga krimen sama sa pagpanlugos, manuntok ug mamusil.

Wa gyuy ayo kung tinuod man ang nahitabo kang Fr. Renato Gamorot sa Sta. Lucia Parish sa Asturias nga gihapak iyang bukton makadaghang higayon ni Fr. Virgilio Paras sa San Roque Parish didto sa lungsod sa Asturias.

Pwerteng gamaya ra gyud sa hinungdan nga mao ang kapakyas ni Fr. Gamorot pagpananghid kang Fr. Paras nga mo-misa sa patay nga kanhi konsehal sa lungsod didto sa barangay Poblacion nga area of jurisdiction ni Fr. Paras.

Sa mga nakasaksi, ilabina sa kabanay sa namatay ug bisan si Fr. Gamorot na-shock kang Fr. Paras nga miadto sa bay sa namatyan aron lang makig-konprontasi kang Fr. Gamorot ug sa asawa nga nagbangutan.

Nakahibaw ko niining general rule sa Simbahang Katoliko nga kinahanglang ipananghid gyud sa hingtungdang parokya kung laing pari ang pamisahon sa usa ka kalihokan.

Kun napakyas pagpangayo og permit ang pari nga mi-misa ug ang mismong kabanay angay pa ba nga mag-eskandalo si Fr. Paras nga makadaot sa kinatibuk-ang Simbahan?

* * *

Akong mga pahasubo sa pamilya ni Darell Carumba diha sa Daanglungsod Alcoy.

Si anhing Darell among kauban sa broadcast media sa Bantay Radyo ug correspondent sa Banat News/The Freeman kinsa gi-atake sa high-blood ug namatay niadtong Lunes sa hapon.

Akong nahibaw-an nga wa makalikay si Darell sa sunod-sunod nga inom niadtong hinapos nga bahin sa Agusto atbang sa ilang sibya-anan hangtud nga gi-atake ug namatay.

Kini gyud hinoong sakita sobra gyud ka traydor.

Akong sublion, wa gyuy kumo sa pag-disiplina sa kaugalingon gikan sa pagkaon ug inom.

Usa sa maayong paagi aron paglikay sa inom ilabina kun weekends kinahanglang hatagan og obligasyon ang kaugalingon sa sayong buntag sama sa sports.

Mao nga kinahanglan gyud nga ipadayon ang paugnat sa kusog namong mga sakop sa media sa Newsmen Basketball Association of Cebu.