Conviction ni Leo, di makapatak-om kanamo

Subo gyud kaayong palandungon nga nakonbikto sa kasong libel si Leo Lastimosa, news anchor sa ABS-CBN TV Patrol Central Visayas, dyAB ug columnist sa The Freeman samtang 13 ka adlaw na lang sa di pa buksan namo ang kasaulogan sa “Cebu Press Freedom Week” karong petsa 15.

Apan, may na lang kini kay sa gipatay karong bag-o nga radio commentator didto sa Iligan City nga si Fernando “Nanding” Solijon.

Hinoon dili makaluya kini kanamo nga magtinarong sa trabaho ug sa among profession. Ang importante nga dili pangurakot ug dili pangawat ang nakonbiktohan ni Leo.

Dili igsapayan nako nga daghang mga sakop sa prensa ang itaral sa kasong libel ug makonbikto basta lang mayagyag ang kamatuoran batok sa mga magdumala sa gobyerno nga magtinunto sa trabaho.

Dili sab rason nga kining conviction ni Leo motak-om ug moundang na lang kami sa pagkomentaryo batok sa mga abusado ug mga mapahimuslanon sa gahom.

Hinoon dili pa kini maoy katapusan sa “due process” ni Leo ug dako pa og purohan nga matuis kining desisyon ni Regional Trial Court Judge Raphael Yrastorza pinaagi sa pag-apelar direkta ngadto sa Court of Appeals (CA).

Si manlalaban Celso Espinoza, legal counsel ni Leo miingon nga ang best remedy mao gyud ang pag-apelar ngadto sa CA kay imposible alang kanila nga makakuha ug reconsideration kang Yrastorza.

Nakasabot ko ni Espinoza nga molawos sa CA bisan pa akong nahibaw-an nga dunay gipang-reconsider sa huwes sa iyang gipangkonbikto kaniadto kay kuli kining usbon ngan nga high profile kining kaso ni Leo.

Ambot lang kun dili ba sab tawon pildihon si Leo sa CA ngan nga magdawatan sab og allowances sa Kapitolyo kaniadto ang mga mahistrado sama sa mga huwes?

* * *

Nalingaw ko sa init apan “friendly and academic discussions” atol sa akong programang “Dialogue on the Air” sa dySS Super Radyo niadtong Sabado bahin sa abolition sa pork barrel nga gitambungan ni North Dist. Rep. Congressman Raul Del Mar.

Sa wa pa mosanong ug sa wa pay categorical statement Congressman Del Mar nga uyon siya nga wagtangon na ang pork barrel tungod sa grabeng abuso sa iyang mga kaubanan nag-alboroto sila si Dra. Rowena Burden ug si Tisha Ylaya nga mas nailhang Inday Tikay nga maoy nagpasiugda niadtong dakung rally.

Bisan gud sa panahon nga “off-air” atol sa commercial break way puas ang init nga lantugi.

At least klaro kaayo ang mensahe nga bisan dunay mga kuwanggol sa Kongreso ug sa Senado dako gyud kaayo og gamit ang pork barrel kanatong mga Sugboanon ma- “soft or hard projects”.

Bilib lang sab ko ni Del Mar kay wa manghambug nga limpiyo siya sa paghupot sa iyang “pork barrel” ug wa kini moangkon nga dunay mga anomaliya. Ang iyang punto nga andam siyang magpa-imbestigar ug hatagan sila og higayon nga makaesplikar ug dili dayon kondenahon.

Bisan si Paul Hubahib nagrepresentar sa “Gawad Kalinga Foundation” mipadayag sa pagka-importante sa “pork barrel.”

Apan sila si Dr. Burden ug Inday Tikay miingon nga duna gyuy kaltas sa “pork barrel” nga gipaagi sa mga tawo sa mga magbabalaud.

Si Ombudsman Graft Investigation and Prosecution Officer Pio Dargantes mipasalig nga ang ilang buhatan wa gyud matug niining mga anomalosong transaksiyon sa “pork barrel.”

Gipasalig sab sa tigpamaba sa Department of Public Works and Highways in Central Visayas (DPWH-7) nga si Marie Mignon Nillama nga wa nay corruption ang ilang buhatan ug andam silang mopatuman sa mga proyekto gikan sa “pork barrel” sa mga kongresista unya transparent na gyud ang public bidding sa mga proyekto sa DPWH.

Ang nindot sa maong “dialogue program” nga nagkauyon sila si Kongresista Del Mar ug sa ubang mga panelist nga puwedeng ipabilin ang budget nga tag P70 milyones matag tuig matag kongresista apan ang mga magbabalaud dili na makapanghilabot ug iderekta na ngadto sa mga implementing agencies.

Supak usab sila si Inday Tikay nga iderekta sa mga kapitan sa barangay kay nakat-on na sa mga magic-magic.

Kung iderekta sa mga implementing agency, 100 percent na ba nga way kinawatay?

Ang importante karon nga mataral na sa Sandiganbayan ang mga senador ug mga kongresista nga nalambigit sa multi-billion scam aron mangawagtang sa puwesto.

* * *

Way gamit ug way pulos kining plano sa gobyerno nga mag-install ug closed circuit television camera sa prisohan ni Janet Lim Napoles didto sa Fort Santo Domingo sa Sta. Rosa Laguna alang sa “live streaming” sa internet kung di makit-an kanunay si JLN.

Unsa may gamit niini kun ang makita sa publiko sa “live streaming” sa Internet mao ra ang entrance ug exit sa bungalow type nga detention facility sa training compound sa Philippine National Police (PNP) elite?

Alang nako ang mas epektibo kaayo nga “live streaming” mao nga ang prisohan gama sa transparent glass ug gawas sa video duna pay audio nga madunggan aron pirmeng ma-monitor si Napoles sa katawhan.

Aron sab nga dili malapas ang iyang privacy hatagan siya og gamay nga lugar nga di makita sa camera panahon matug ug sa mga personal nga himoon niya.

Kini maoy bugtong paagi nga dili magtahap ang publiko ngadto sa Malacanang ug kang Department of Interior and Local Government Secretary Mar Roxas nga may dakong impluwensiya sa PNP-Special Action Force nga maoy magbantay kang Napoles.

Kini maoy nindot nga paagi puslan man nga bawalan ang mga sakop sa media ug limitahan ang mga mobisita ni Napoles.

Di na lang ko mokuwestiyon nga dunay refrigerator nga ipasulod kay alang na sa iyang medisina.

Nindot sab nga ang “live streaming” sa Internet i-flash sa matag television network kay dili tanan maka-avail og libre nga Wi-Fi.