Dihang nakit-an ko si Budoy sa entablado gitawag ko kini. “Dong, dong, dong, mag DJ ka ron dong?” Mitubag kinig: “Dili Dong, Zumba instructor ko ron.” Ha? Mao ba? Gikan sa pagkapintor nahimo siyang bokalista dayon na DJ ug karon, Zumba instructor na.
Ug tuod man may tulo ka batan-ong dalaga nga gipasaka sa entablado para motupad kaniya ug misayaw uban kaniya. Misayaw sila og Zumba samtang mikanta si Budoy sa Jr. Kilat hit nga “M-16.” Pagkuhaman niani iyang gi-introduce ang bag-o niyang kanta nga gaulohag “Chop the Pork.” Tinabangan sa iyang kauban nga tabla artist mi-perform si Budoy nianing Zumba flavored nga protest number niya samtang ang mga tawo nanayaw.
Dili kini ang unang protest performance ni Budoy. Gipahugyaw niya niadto ang mga taga-Manila sa iyang “Hello Garci” nga adlib sa panahon ni Gloria Arroyo. Ug karon ning anti-pork barrel rally sa Plaza Independencia iya na usab ni gipadasig ang mga tawo nga nanambong niani.
Maglisud kog estimate sa mga nimartsa gikan sa Fuente paingon sa atubangan sa Fort San Pedro. Makaingon nga dili kaayo daghan. Apan lingaw kini nga kalihokan kay kaila ra nimo ang mga nanambong niani. Or at least, kaila sa kaila.
Mikuyog si Mayor Mike Rama sa maong martsa. Makapanghinaw si Mike parte ning pangawkaw sa pork barrel kay wa man gyud siya sukad makongresista. Any way wa man sab siya makapamolitika kay hugot mang mipatuman ang nagpasiugda ning maong kalihokan nga di kini bahiran og politika. Walay dikurso nga nahitabo sa entablado nga gikantahan ni Budoy ug nga gisayawan sa mga girls.
Nahimuot kong gatan-aw sa stage nga ang tanang gatindog ngadto puros kaila nako. At one point diha ang mga maniniyot nga sila si Ferdinand Edralin ug Lito Tecson nga gitaparan ni Januar Yap nga mipatong isip maniniyot usab. Kuyog ni Budoy niadtong higayona mao sila ni Dr. Rowena Burden ug Inventor JV Baring.
Samtang sa ubos didto ang mga higala ta sa Monochrome Magick nga sila ni Sandrixx Alessandro, Juan Carlo de Vela, Clayton Tugonon, Michelle Alvarez ug Teo Phylus.
Diha usay mga teatro ug mga advertising sama nila nila ni Papo, Barry, Chai, Gloria, Kalay, Stella Monteno ug uban pa.
Nakit-an ko usab si Jeremiah Bondok, Mayang, Ronald Villavelez, Neil Pangue Arcenas, Maia Franco ug Ana Conejero.
Matawag ta kining maong panagpundok nga picnic with a cause. Sama sa mga stick sa dinamita sa pelikulang “Force 10 from Navarone,” kining maong panaktapok dili makatumpag sa kurapsyon apan igo na kining mopaliki sa mga politikanhong pamaagi sa pagpangawat sa kwarta sa magbubuhis.
Kun ang radio maoy instrument nga nakapalagpot ni Marcos ug ang text messages maoy nakapatangtang ni Erap, kining pork barrel maoy unang target sa Facebook revolution sa ato.