“Wa nay usbanay, papason na gyud ang PDAF”

Kinahanglang wagtangon na gyud nato ang “pork barrel” o Priority Development Assistance Fund (PDAF) nga maoy nakapa-buwisit ug nakapasamot sa atong kawad-on kay gihurot pag-kurakot.

Ang atong mga senador ug mga kongresista igo nalang mo-focus sa paghimo ug paggama ug mga epektibo nga balaud. Ato silang tangtangan sa gitawag ug executive functions ug kinahanglang consistent kita sa tinuud nga prinsipyo sa presidential form of government.

Kung tinuud nga serbisyong tinud-anay ang katuyu-an sa akong mga higala andam silang mosakripisyo ug motabang alang sa kaayohan sa nasud.

Di na sab ko motoo nga magpabaga sila ug nawong atubangan sa minilyon nga katawhan nga mi-insister nga gusto nang wagtangon sa hingpit ang “pork barrel” kay ang klarong nakapahimolos mao ra sab ang mga magbabalaud ug ang mga kurakot nilang mga kaubanan ug mga kawatan nga FOUNDATIONS, NGO’s ug PO’s.

May rason nga palig-onon pa sa katawhan ang kawsa kay nagdiki-diki pa mismo si presidente Noynoy Aquino pag-abolish sa PDAF.

Niadtong Sabado sa gabii sa akong programa sa radyo sa DYSS nakatawa ko sa napublikar sa among website sa GMA News nga nag-usab sa pangan sa pork barrel tungod niining paling-paling nga baruganan sa presidente nga gustong usbon ang pangan sa pork barrel.

Daghang sugyot nga himoong: TONGPATS, or Totally New Government PDAF Audited to Satisfaction.

Dunay misugyot sa mga social media nga hinganlan siya ug “LIEMPO” kon (Lawmakers Initiative for Emergency, Miscellaneous and Personal Outlay) or SISIG (Social Initiative for Service in Governance).

Dunay miingon nga himoong “PAPAITAN”, or President Aquino’s Political Action and Initiative for Total Allocation of National Budget.

Duna say mi-proposed nga ”HUMBAA” , or Horrifyingly Unlimited Money for Belmonte, Aquino and Allies.

Ang uban misugyot ning mosunod:

Budgetary Allocation for Collaborative Outreach Nationwide (BACON)

Benigno Aquino Development Assistance Fund (BADAF)

Countrywide Universal Priority Initiatives Treasury (CUPIT) Fund

National Assistance Program of Lawmakers Engaged in Swindling (NAPOLES)

Holistic Lawmaking for Development of All Filipinos (HOLDAF)

Government Outlay Line-itemized and Appropriated Yearly (GOLAY)

National Allotment for Countryside Amelioration and Welfare (NACAW)

President’s Outlay for Countrywide Handling of Emergency Rehabilitation for Opulence (POCHERO)

Outlay for the Interest of Napoles and Kin (OINK)

Selective Enforcement of Budgetary Outlays (SEBO)

President Aquino’s Nationwide Outlay for Transparency (PANOT)

Pero bilib ko sa atong mga Sugbuanon kay dali kaayong nakahimo ug lain nga pangan sa pork barrel ngadto na sa “BUWAYA”.

Sa text nga akong nadawat dunay miingon nga “BUWAYA” stands for “Big Unliquidated Allocations Yearly Abused”.

Duna say miingon nga “ Budgetary Unlimited Allocation for Yourself Alone”.

Duna say mitext nga : “Budget Undelivered Although Yearly Alloted”.

Duna say miingon nga :” Budget Unahon Alang Sa Yagaw nga Aquino Administration.

Duna say miingon nga “Budgetary Unification With Allocation Yearly Allotment”

Siyarog wa makasabot sa yaga-yaga sa katawhan ang mga politiko. Baga na gyud mo ug nawong!

* * *

Puwera gaba gyud ning atong mga ahensiya sa gobyeno kay unya na manglihok kung dunay disgrasya nga mahitabo sama niadtong bangga sa duha ka mga barko nga miresulta sa pagka-lunod sa MV Saint Thomas Aquinas.

Karong bag-o na-init na sab ang pagtuki kabahin sa pag-establisar sa mga pantalan sa gitawag ug Vessel Traffic Management System (VTMS) kay pinaagi niini malikayan ang disgrasya sama sa bangga sa mga barko kay dunay mga personnel sa VTMS nga mo-control sa pagsulod-gawas sa mga barko gikan sa atong mga pantalan.

Akong nahibaw-an gikan kang Capt. Rodien Paca kinsa kanhi marinero sa mga international vessel nga makatabang gyud kaayo ang pag-establisar ug VTMS sa mga pantalan kay kini maoy magsilbe nga tig-control sa traffic sa mga barko.

Iyang nakita nga epektibo gyud kaayo kini didto sa USA, Canada, Europe ug uban pa kay minus ang disgrasya. Matud niya nga kun may VTMS pa ang pantalanan dinhi sa ato dili unta mahitabo kadtong bangga.

Laing gisugyot ni Paca kinsa presidente sa Naga Port and Shipping Marine Services Inc. nga kinahanglang tanang mga sakyanang pandagat butangan ug Automatic Identification System kon ADS aron mas dali ang pag-ila sa mga operator nga malapason.

Akong nahibaw-an gikan kang Cebu Coast Guard Commander Weniel Azcuna nga dinhi sa Pilipinas duha pa ka mga lugar ang dunay VTMS nga mao ang Manila ug Batangas. Ang nagpahiluna sa VTMS didto sa Batangas ug Manila mao ang Philippine Ports Authority.

Dinhi sa Sugbo nga grabe na ang pagsaka sa ekonomiya ug daghan na’ng mga barko way VTMS nga unta obligasyon kini sa taga Cebu Port Authority (CPA).

Sila si Azcuna ug Capt. Paca miingon nga obligado ang CPA pag-establisar ug VTMS kay gihatagan sila ug gahom pagdumala sa mga pantalan sa Sugbo.

Akong nahibaw-an nga dugay na kining maong sugyot pero ambot kung nganong na-inutil ang taga CPA.

Si Capt. Paca nga suweto niini, miklaro nga kung buot huna-hunaon dili na maka-abot ug 100 million ang gasto sa gobyerno pagtukod ug VTMS sanglit anaa nay communication system, radar ug ubang navigational equipments ang mga barko.

Si Cebu City Councilor Gerry Carillo mipadayag nga andam mosuporta ang kagamhanan sa dakbayan sa Sugbo ug ang Provincial Government pag-establisar sa VTMS.

Ang Coast Guard motabang sab niini pinaagi kang Commander Azcuna kay puwede sab ilang mga tawo maoy controller.

Pero akong nakita nga medyo problemado ang taga Coast Guard karon kay giimbistigahan sila sa kongreso sa paggahin ug 800 milyones ka pesos alang sa pag-upgrade sa mga kahimanan apan way agi.