Mokatawa nalang ko sa pangangkon sa taga-Philippine Coast Guard (PCG) nga sila kuno maoy unang nakapa-higayon ug search and rescue operations pagka-lunod sa MV St. Thomas Aquinas human nabanggaan sa Sulpicio Express Siete niadtong Biyernes sa gabii diin daghan ang nangamatay.
Ambot lang sa taga-PCG kung nganong ilang gi-insister nga sila maoy nakauna pag-responde nga gani uwahi ra kaayo sila sa mga mananagat nga taga-Talisay ilabina sa duol niadtong mga orasa sa Lawis Ledge.
Kun mangangkon tingali sila nga maoy unang nakakuha og video footage atol sa actual search and rescue, di na ko mo-lalis kay ilang giapas niadtong higayona nga matabunan ang ilang kaulaw nga kami pa sa dySS ang nagpahibawo kanila sa trahedya.
Dihang among gitawgan ang Coast Guard mibalibad nga i-on the air ang nakatubag kay zero info pa sila human gibuak ni Super Aljin Abaquita ang dakung balita.
Dihang inutil ang Coast Guard sa balita, didto mi nanawag sa Cebu Harbor Pilot Station ug pinaagi kang Captain Moralde mikompirmar sa pagka-lunod sa MV St. Thomas Aquinas kay naka-dawat sila og “distress call” mga alas-8:45 niadtong gabhiona ug gawas pa sa tanto niyang pinaabot sa pantalan wa gyud mopatim-aw ang barko.
Pinaagi usab sa opisyal napaguwa ang mga initial information bahin sa gidaghanon sa mga pasahero ug uban pang mga detalye.
Ug tungod sa kompirmasyon way langay ang mgaTalisaynon nga mga mananagat nga naglumba og bira sa ilang mga bugsay ug sakayan ug mga pump boat alang sa pag-rescue sa mga pasahero.
Unya kining burit sa taga-Coast Guard nalupigan kini sa usa sa mga opisyal nga mitunga sa usa sa mga briefing diha sa Command Center sa Talisay Fish Port nianang mga alas-2 pasado sa kadlawn sa Sabado kay nangangkon sab nga wa sila maglangay og responde.
Matud sa akong amigo nga akong tagoon sa pangan nga Alvin Santillana nga sayo silang nahibaw sa disgrasya mga alas 7:45 sa gabii ug matud niya nga “as early as 8 p.m.,” naka- stand by na iyang mga tawo sa Talisay.
Hahay pagkapait sa mga hambug. Pero sige na lang basta ang importante nga nagtinabangay kitang mga Sugbuanon ug ako na lang isipon nga bunga kadto sa way tulog ug aron pawala sa laay. Hehehe.
Nasayod man ko nga luyo nining tanan ang Coast Guard maoy Super Hero. Pero mauwaw sab mo oy, nga inyong angkonon bisag nangiwit mo sa mga “unsung heroes” nga mga mananagat sa Talisay.
Maglaum ko nga dili maulahi ang atong mga mananagat sa Talisay kun dunay ikadalit nga tabang ang gobyerno kay bisan unsaon apektado gyud sila karon ilabina tungod sa oil spill.
Mangambot lang ko kun halinon ba ang mga isda nga makuha diha sa kadagatan sa Talisay samtang naa pay daghang patay didto sa ilawom sa barko.
Gani akong amiga nga taga-Talisay didto sa Catmon namalit og isda bisan mipasabot ang taga-Bureau of Fisheries and Aquatic Resources ug Department of Health nga dili makadaut ang mga isda nga nakakaon og karne sa tawo.
Sa tanang kapungot, kahasol ug danyos, duha ra gyud ka tawo ang angayng pangsilotan ug kinahanglang kasohan nga mao sila si ship captains Reynan Bermejo sa MV St. Thomas Aquinas ug si Rolito Gilo sa Sulpicio Expres Siete.
Nagparehas ning duha ka kapitan, pulos mga danghag!
* * *
Moapil ko sa panawagan nga motabang kita pinaagi sa pagsalmot sa ipahigayong “fun run” sa Cebu city government karong Domingo (August 25) alang sa fund raising kang former Cebu City councilor Sylvan “Jack” Jakosalem kinsa padayong nanlimbasog sa iyang panglawas.
Si Sir Jack nga kanhi chairman sa City Traffic Operations Management anaa pa sa talandugong kahimtang tungod sa presensya sa “parasites” nga anaa sa iyang utok.
Akong nahibaw-an nga dunay laing kalihokan nga “radiothon” ang mga kanhi disc jockey sa Y101 FM nga sila si Mike Solon ug Chad Songalia alang gihapon sa fund raising para ni Sir Jack.
Mas nindot sab tingali nga niining umaabot namong selebrasyon sa Cebu Press Freedom Week, dunay ipahigayon nga “variety show” or konsierto nga pasiugdahan sa Cebu Federation of Beat Journalists (CFBJ) pinangulohan ni Sir Elias Baquero ug abagan sa Kapisanan ng mga Broadkaster ng Pilipinas.