Nakitang Gilas

Nyor Gamay (NG): Kita kas Gilas, Nyor?

Nyor Daku (ND): O. Ikaw?

NG: O, uy. Kita kos tanang duwa nila.

ND: Wa gyud diay kay absent?

NG: Wa lagi. Ang duha nila ka pildi ug ang pito nilang daug, nakit-an nako. Ang ilang pag-ihaw sa Kazakhstan ug ang ilang panghupaw batok sa Chinese Taipei. Ang pagka-injured ni Douthit ug ang pag-dominar kanila ni Haddadi.

ND: Unsa may imong nakit-an?

NG: Ha? Unsa gud nang pangutanaha? Nakit-an lagi nakong tanan.

ND: Ang buot kong ipa-ibot kanimo kun unsay imong na-obserbahan? Unsay assessment nimo sa duwa sa Pilipinas kun itandi sa ilang mga ka-atbang? Unsay kalahian ning Philippine team karon kun itandi sa ubang Philippine team.

NG: Duna koy pipila ka obserbasyon, Nyor. Una, maayo na kaayo ang atong mga point guard. Si Castro, Alapag ug Tenorio kamao molipat, lusot, pasa ilawm sa mga higanti nga mo-payong kanila.

ND: Mao ba? Unsa pa?

NG: Dili predictable kun kinsa sa mga sakop sa team ang mo-shoot. Puros sila mga hingigo. Kay gawas sa mga point guard duna pa gyuy pipila nga andam mo-pauwan og tres sama kang Chan, nga murag bag-o nga Caidic, ug Fonacier. Gani maka-ingon ka nga team na gyud kining maong pundok.

ND: Mao ba? Unsa pa?

NG: Nakabantay sab ko nga mas international na ilang duwa. Dili na sila NBA wannabe. Murag naka-bantay na sila nga dili ra pina-NBA ang duwa sa basketball. Labi na kay dili tanan power player. Bisan tuod og dunay power moves si Aguilar.

ND: Mao ba? Unsa pa?

NG: Nga kun diha pa unta ang naturalized player nga si Marcus Douthit, basig mababagan pa ang panghasi ni Haddadi sa Iran. Mao nga nakaingon ko nga mas maayo tingali kun duhaon nato ang naturalized player sa Philippine team para kun ma-piang ang usa, duna pay back-up.

ND: Mao ba? Unsa pa?

NG: Nyor. Morag naka-bantay ko nga ganiha ra ka ga sige lag “Mao ba? Unsa pa?”

ND: Unsa man diay gusto nimong isulti nako, Nyor?

NG: Ako na sab tingali mangayo sa imong panan-aw sa bag-o lang nahumang FIBA Asia.

ND: Usa ra may akong namat-ngunan.

NG: Unsa man, Nyor?

ND: Kun mas mugbo mo sa inyong kontra, kinahanglan masulod inyong tres kay kun dili, Goodbye.