Kun wa duphi ni Asst. Regional State Prosecutor Llena Ipong-Avila si code name Billy, usa sa iyang marshal nga gi-akusahan nga nanglugos sa 21-anyos nga witness ug biktima sa “gang rape” nga migawas sa ilang programa, nganong wa man niya ihatag sa kapolisan ang full name ni Billy?
Nakit-an si Ipong-Avila sa kabanay sa biktima niadtong Lunes nga miadto sa Guadalupe Police Station samtang gi-kuhaan og sworn statement ang biktima.
Ang hepe nga si Chief Insp. Andres Bayarcal, miangkon sa akong interview nga naglisod sila pagkuha sa full name ni Billy ug way gihatag si Ipong-Avila sa ilang buhatan.
Miingon si Bayarcal nga mapugos siya sa pagpa-line-up sa tanang 18 ka mga marshal kun di mo-hatag si Ipong-Avila sa full name ni Billy.
Si Ma’am Thelma Chiong, chairperson sa Crusade Against Violence nga andam motabang sa biktima ug sa pamilya, nagkanayon nga motuo gyud siya sa alegasyon sa 21-anyos tungod kay biktima usab siya.
Matud niya, way biktima nga makaako sa pagpakaulaw ug modaot sa kinatibuk-ang programa sa Witness Protection Program sa Department of Justice.
Gi-klaro usab ni Chiong nga ang insaktong paagi unta, adto ipa-kustodiya sa Department of Social Welfare and Development kon DSWD ang tanang biktima sa rape.
Nakasabot ko sa punto ni Ma’am Thelma nga adto sa DSWD kay way capability sila si Ipong-Avila nga mo-handle sa mga problema nga ingon ani.
Si Chiong natingala usab sa pagduma nila ni Ipong-Avila sa maong programa kay ang mga testigo daw sama na og mga piniriso nga papuy-on gyud sa “safe house” nga ang resulta, dili na maduaw sa kabanay.
Matud niya, niadtong panahon nila ni late Regional State Prosecutor (RSP) Hernando Masangkay ug RSP Antonio Arellano, gitugot sa maong programa nga ang mga testigo maka-buot kun asa puyo ug hinatagan lang og allowance sa DOJ ug nga kadtong maong paagi maoy epektibo kay ang allowance sarang na kaayo nga makatago ang tibuok pamilya nga di kahilabot ang mga tawo nga dunay interest pagkuot.
Kinsa man kining paagi nga papuy-on gyud sa “safe house” ang mga testigo ug mga biktima?
Sa kaso sa 21-anyos, duna bay kasigurohan nga safe gyud ang mga testigo ubos sa witness protection program?
* * *
Nag-alboroto man si dismissed Metropolitan Trial Court in Cities Judge Rosabella Tormis niadtong miaging Miyerkules sa buntag (July 24) human nakabasa sa akong article nga napublikar dinhi sa akong lindog.
Mitawag siya sa akong mobile phone apan wa lang ko katubag kay na-busy ko sa akong mga gimbuhaton.
Daghan siyang gipang-text kanako agig reaction sa akong lindog nga na-publikar.
Tugoti nga akong i-publikar ug balik ang isyu ug mao kini: “Niadtong Lunes sa hapon samtang duna koy gi-follow-up nga kaso, akong nataymingan sila si dismissed MTCC Judge Rosabella Tormis ug iyang anak nga si Jill nga nanaglingkod ug medyo busy ug dunay gipang-kuri-kuri didto sa branch 4. Ni-timbaya ko ni Judge Tormis apan medyo wa kaayo makaharong nako. Tingali duna silay gidalian Si Jill nag-operate sa computer. Wa nalang sab ko manumbaling ug mi-disturbo kanila kay in fairness ni Judge Tormis duna pa siguro siya’y mga personal files sa maong computer nga gi-trabaho ni Jill”.
Wa ko mag-expect sa mga reaction ni Tormis nga gipaagi ug text.
Miingon siya: “U could hav askd me wat we were at br. 4 wen u saw us there. Then I would have told u. Then there would hav no need for u to state that in ur lousy column. I would hav answered u right then and there”.
“In case u do not know, I still hav personal things at branch 4, d printer, aircon, & etc. I was planning 2 take it but bcoz dey r stil using 8. Well, consider dos as my donation 2 branch 4. Anyway d decision did not state dat I shud not enter br 4 anymor. Ngano magsakit mn imo dughan nga moad2 ko br 4? Wala mn gani reklamo Judge Pita”
“Take note: whatever business we hav in d palace of justice is definitely non of ur business”.
Alang nako, simply ra man ni kaayo ba, nganong wa man kuhaa ni Judge Tormis ang iyang mga personal nga butang dihang gitangtang siya sa Supreme Court sa isyu sa marriage scam ug sa ubang kaso?
Ang laing punto nako syarog wa sab maghuna-huna si judge Tormis nga maglikay na lang samtang gipa-imbistigahan karon ni Executive Judge Francisco Seville ang pagkawagtang sa mga armas nga mga ebidensiya sa mga kaso sa branch 4.
Gingisli-an lang sab ko sa iyang punto nga di ko makapanghilabot sa bisan unsay ilang business sa Palace of Justice. Unsang klase ni nga nangayo og reconsideration sa iyang dismissal sa Korte Suprema?
Bisag gitangtang na, arogante gihapon? Pastilan!
Unsa may buot ipasabot niya? Motak-om nalang ang mga sakop sa media?
* * *
Niadtong Sabado sa hapon sa among programa’ng “Dialogue on the Air” sa dySS Super Radyo, giklaro sa mga tinugyanan sa gobyerno ug mga taxi operators nga di gyud intawn makadaut sa lawas ngadto sa mga taxi drivers ang padayong paggamit karon sa LPG kon Liquefied Petroleum Gas isip gasolina sa mga taxi units.
Sila si Dr. Judita Tawatao sa Department of Health in Central Visayas, Eddie Llamedo sa Department of Environment and Natural Resources, Dondon Ibo sa Land Transportation Franchising and Regulatory Board, Macario “Macky” Getaruelas sa Land Transportation Office miingon nga mas maka-ayo pa sa kalikupan ang paggamit sa LPG ug makaprotehir pa sa atong ozone layer.
Sila si Richard Corominas, taxi operator ug presidente sa Cebu Provincial Bus Operators Association, Chiquito “Kito” Obeso operator sa King Spider Taxi, Terence Blanco operator sa Wordwide Taxi ug Billy Nacario operator sa Van System ug Tres Mojeres Taxi, nagtuo nga ang sakit sa mga driver na-gumikan sa bisyo sa inom ug panabako dili intawon sa LPG.
Gani matud nila nga daghan na gyud kaayong mga taxi drivers ang mogamit og shabu unya ibilin pa ang driver’s license didto sa suyopanan isip garantiya nga maka-suyop unya balikan na lang kun may kita na sa pamasada.
Pastilan gyud kun mao kining kalakiha.
Maglaum ko nga mohimog on the spot drug test ang taga LTO ngadto sa mga drivers ug parahon gyud kun duna bay mga lisensiya ning uban kay basig gi-prenda na sa suyopanan.