Pied piper now

Kaming mga maniniyot nga way lingaw nagkatapok sa Facebook. Gani duna kami lima ka “group” nga kami ra sad tanan sakop. Ang kasagaran kanamo nia ras dakbayan apan ang uban tuas kalungsuran, ang uban sa Manila ug dunay uban nga tuas gawas sa nasud.

Nahimuot ang akong amigong si Bob Lim ug nga buot siya mosuwat ning maong kaguliyang sa laing pamantalaan. Ug kay ako may gapasi-ugda ning maong hinangaw gi-angaan ko niyag “pied piper.” Apan kalit lang siyang mitawag kanako og mihisgut sa iyang kabalaka kabahin sa allusion sa pied piper nga matud pa niya, usa man diay ka makahadluk nga sugilanon. Ug gani ang mao kunong kahadlukang sugilanon mipasumbingay man sa usa ka tinuoray nga ngil-ad nga hitabo.

Unsa man diay kabahin ang sugilanon sa pied piper?

Ang sugilanon miagi nag daghang kausaban gikan sa unang asoy niini. Gani tulo ka manunulat –sila ni Johann Wolfgang von Goethe, ang Brothers Grimm ug si Robert Browning ang may lain-laing version niini.

Apan ang gidawat nga pag-asoy nagkanayon nga dunay usa ka lungsod sa Germany nga gidagsaag mga ilaga. Midalit ang mayor sa maong lungsod og dakong ganti sa makapahawa ning maong ilaga. Tungod sa ganti, miabot ang usa ka musikero nga may dalang pipe, usa ka musical wind instrument nga susama sa flute.

Pagtukar sa piper sa iyang pipe nanggawas tanang ilaga ug misunod kaniya. Iya kining gidala sa sapa diin kini nangalumos. Usa ra kuno ka ilaga ang nakalingkawas. Human nangawa ang mga ilaga, giadto dayon sa piper ang mayor para pagkuha sa iyang ganti. Apan ang mayor wa motuman sa iyang saad.

Mao nga, matud pa sa Wikipedia, nanimawos ang piper. Atol sa misa sa usa ka pista, mitukar ang piper sa iyang pipe ug ang tanang mga bata sa lungsod misunod kaniya ngadto sa usa ka langub ug wa na gyud makit-i.

Tulo ra ka mga bata ang naka-iskapo sa piper: ang bakol nga wa maka apas sa panon; ang bungol nga wa kadungog sa tukar ug nga wa na lang mopadayun pagsunod sa iyang mga kaduwa ug ang buta nga nasaag kay wa maka kita sa agi-anan.

Daghang miingon nga ang pied piper simbulo lang sa kamatayon sa panahon sa pisti ug atay (plague/epidemic). Dunay miingon nga ang maong musikero mao si Nicholas of Cologne nga nagpasiuda sa Children’s crusade diin may pipila ka libo ka mga bata mikuyog kaniya para pag convert sa mga Muslim ngadto sa pagka Kristiano. May uban sang miingon nga ang maong character usa ka pedophile.

Apan kon subayon ta ang asoy maka-ingon kita nga ang pied piper usa ka manablahay nga hussler nga gi-T.Y.