Taga-BOC ray nagpalusot sa mga bugas

Haskang buanga gyud kun madala pa sa ilad ug malingla pa ang mga nag-imbestigar sa pagkawagtang sa 500 ka sakong smuggled rice nga gikan sa Vietnam diha sa Cebu International Port (CIP) nga unta hugot man kaayong gipabantayan sa taga-Bureau of Customs (BOC) ug Cebu Port Authority (CPA).

Klaro kaayo nga dunay panagkonsabo sa mga opisyal sa BOC, CPA ug CIP pagpagawas sa mga sinakong bugas nga gisulod sa mga selyado ug de kandado nga mga container vans.

Pila kaha ang gidawat sa mga kurakot nga opisyal gikan sa negosyante nga tag-iya nga ila rang padrino?

Mao ni ang nakapait sa liderato karon ni Presidente Benigno Aquino III kay samtang nakig-away sa grabeng corruption sa nasud, nagpabilin ang mga kawatan sa gobyerno.

May untag usa ra ka kumkom sa bugas nga sayon rang ipalusot apan 500 ka sako ug wa gyuy nakapindot? Ingna lang nga maayo gyud kaayong pagkaplano ug pagkatingal sa mga nagbantay. Bureau of Customs pay imo. Kaniadto pa ni!

* * *

Salamat nga giuli na ni dismissed Provincial Budget Officer Emme Gingoyon ang service vehicle nga Kia Carens nga gipa-service sa iyaha kaniadto isip opisyal sa Kapitolyo.

Paita gyud! Kun dili pikhan ug sawayon di man makasabot sa pulong nga “delicadeza” ug pagpakaulaw sa pamilya sa iyang gihimo nga pagmagahi sa pag-uli sa sakyanan sa gobyerno.

Again, with all due respect ngadto ni Gingoyon nga mikuwestiyon sa iyang dismissal order sa higher court, wa ko makasabot dihang mi-insister sa iyang suwat kang Provincial General Service Officer Eva Encabo nga illegal, sub-judice ug ultra vires nga kuhaon ang sakyanan sa iyang possession.

Pero ambot lang kun kinsay naghatag og sayop nga tambag ni Gingoyon nga di gyud unta ipauli ang sakyanan hangtud nga ma-final ug ma-executory ang iyang dismissal from the service nga gipatuman sa Ombudsman.

Kun nagmagahi pa si Gingoyon sa pag-uli sa service vehicle sigurado ko nga mohimog drastic action si Gov. Hilario Davide III ngan nga may gahum siya sa pagpa-recall sa tanang government properties nga gi-isyu sa mga kawani ug opisyal sa Kapitolyo.

Unya gawas niini, ang pagtiner sa butang sa gobyerno dili gyud intawn katungod kun dili usa lang ka pribilehiyo.

Hinuon, bisan uwahi ang pag-turn-over ako gihapong daygon ug pasalamatan si Gingoyon kay makamao nga maminaw sa sugyot gikan sa mga yanong magbubuhis.

* * *

Dunay part 2 sa nahitabong verbal tussle kaniadtong 1990s tali nilang Cebu City Comission on Elections (Comelec) Officer Reynaldo Ferrenal ug dyMF Bombo Radyo Anchorman Jessie Villarba.

Karong bag-o, sila na sab si Cebu City South COMELEC Officer Edwin Cadungog ug dySS Super Radyo reporter Allan Majait.

Amigo man nako ni si Cadungog pero ako lang tambag nga di siya magpasulabi sa iyang gibati ug di magpasulabi sa pagka-emotional niadtong migawas nga isyu sa wa pa ang eleksiyon nga giintriga siya nga miadto sa panimay ni Kongresista Tomas Osmeña.

Ang maayong i-confront ni Cadungog mao si Dino Faelnar nga maoy nag-text sa impormasyon ngadto ni Sir Bobby Nalzaro ug dili si Super Alan nga igo rang gipa-follow-up.

Abi na man tuod nga konsehal si Super Alan sa Apas insultohon nalang ni Cadungog kay under de bunal nila ang mga kandidato sa panahon sa eleksiyon.

Maayo gani nga wa magsipok ang ulo ni Alan niadtong Lunes sa udto nga gikonprontasi ni Cadungog kay magka-lamok-lamok unta to.

Kalma, attorney Edwin. Taudtaud na to ang eleksiyon, kalimti na kay nalimpyo na baya ang tanan kay si Tejero barangay captain Jessielou Cadungog ang didto sa bay ni Tomas ug dili ikaw.

Nakatilaw ko og ingon ani nga sitwasyon sa panahon ni Director Rene Buac, apan in fairness sa namatay na intawn nga regional director sa Comelec, ang asawa maoy isog kaayo ug kahamagon ug kakawrason kanako human akong gikomentaryohan pag-ayo ang iyang bana nga opisyal.

Pero way nahimo ang asawa kay akong gipaalarma sa laing unit sa kapolisan ang nahitabo sulod sa Comelec Regional Office diin didto ang padayong eskotenyo sa mga ballot boxes gikan sa Bogo.

* * *

Niadtong Lunes sa hapon samtang duna koy gipa-follow-up nga kaso, akong nataymingan sila si dismissed Metropolitan Trial Court in Cities judge Rosabella Tormis ug iyang anak nga si Jill nga nanglingkod ug medyo busy ug dunay gipangkuri-kuri didto sa branch 4.

Nitimbaya ko ni Judge Tormis apan medyo wa kaayo makaharong nako.

Tingali duna silay gidalian. Si Jill nag-operate sa computer.

Wa na lang sab ko manumbaling ug midisturbo kanila kay in fairness ni Judge Tormis duna pa siguro siyay mga personal file sa maong computer nga gitrabaho ni Jill.

* * *

Kagahapon, nakatambong ko sa burial Mass diha sa Saint Peter Imus sa wa pa ang lubong sa akong professor kaniadto sa political science nga si manlalaban Efren Ramirez.

Gawas sa mga igsoon, mga anak ug mga kabanay ni Ramirez, didto usab ang suod kaayo sa pamilya nga si George Bragat ug mga personnel sa University of San Jose Recoletos.

Akong nadunggan sa pamilya kun unsa gyud ka kugihan, kabuotan nga bana ug amahan, pagka manggihuna-hunaon gawas sa iyang pagka-bright nga tawo.

Bisan ang mga apo nanaglumbag dangoy-ngoy kagahapon kay wa na silay lolo nga kanunayng kasandigan panahon nga dunay problema nga mohapak sa pamilya.

Ingon ani gyud kining kinabuhi, wa gyuy mogamot nato. Ang mga maayong binuhatan ra gyud maoy magpabilin.