Angay na ba nga pasidunggan ang mga tinugyanan?
Alang nako kuwang pa kaayo kining effort sa mga elemento sa National Bureau of Investigation (NBI) pagpahigayon og ronda ug dakop sa mga drug pushers tungod kay dako na kaayo kining problema.
Pero may na lang kining gipakita karon sa NBI ug Cebu City Police Office City Intelligence Branch kay dunay mga dagkung isda ang nakuha.
Pero dunay Philippine Drug Enforcement Agency hinay pa sa kagang. Ambot kun unsay nahitabo ani nila? Sila man untay front liner pagsulbad sa problema sa drugas!
* * *
Niadtong Sabado sa hapon atol sa among programang “Dialogue on the Air” sa dySS Super Radyo wa na gyud mapugngi ni Cebu City Councilor Gerardo “Gerry” Carillo ang iyang pagpadayag og kapungot ug kasagmuyo ngadto sa taga-Homicide Section sa Cebu City Police Office ug sa kinatibuk-ang mga sakop sa media.
Kay alang sa konsehal gikonbikto na gyud siya sa publiko pinaagi sa media tungod sa pasagad sa kapolisan nga mihimo dayon og konklusyon nga siya gyud ang responsable sa paghapak og bato sa ulo ni Jan Niño Pogoy.
Ang konsehal miklaro nga wa gyud siya mohatag og kuwarta ngadto sa pamilyang Pogoy ug dili tinuod ang istorya nga duna silay giandam nga P200 mil kay wa siyay ingon ani kadako nga salapi pagkakaron.
Pero with all due respect, kun tinuod man kining version ni Carillo morag nasipyat siya pagkuha ni Noel Archival isip abogado kay kini maoy gara kaayo ug matud pa dunay insaktong kantidad ang ilang giandam aron ihatag bisan unsang orasa ngadto sa kabanay sa biktima.
Wa gyud hunahunaa ni Achival ang consequences sa iyang pagkapagarpar nga makadaut kaayo sa iyang kliyente nga nabutang sa alanganin.
Bisan karon nga ang NBI na maoy nag-imbestigar, wa gyud mawala ang mga pagduda nga binayran sa konsehal ang mga mitestigo pabor kaniya kay ang iyang ka-associate maoy midala sa mga testigo sa buhatan sa NBI.
In fairness hinuon ni konsehal Carillo mipasalig nga siya maoy mangunay pag-amendar sa liquor ordinance ning dakbayan nga maoy gisugyot ni Msgr. Achilles Dakay ilabina ang pagwagtang na sa gahum
sa mayor paghatag og special permit niadtong maninda og ilimnong makahubog human maka-comply sa mga requirements.
Sila si Fr. Boboy Sarabia ug Boy Alingasa sa University of San Carlos wa gyud matagbaw kun nganong duna pay “special permit” nga iisyu nga unta duna may ordinansa nga nagdili pagbaligya ug liquor sud sa 100 meter radius nga distansiya sa eskuwelahan, simbahan ug ospital.
Si Emma Villarete sa Cebu City Treasurer’s Office miklaro nga kun estriktohon gyud daghan kaayong establismento ang nakalapas.
Sa akong basa. kining paghatag og “special permit” sa mga establismento maoy naghatag og kiko niining ordinansa ug subject kini sa abuso sa discretion.
Kun seryoso gyud si Cebu City Mayor Michael Rama sa kampanya ug kun tinuod nga duna siyay “political will,” puwede niyang ipa-recall ang naisyu nga special permit sa tanang nahatagan.
Di na kinahanglang paaboton pa karong hinapos sa Disyembre ang pag-expire sa special permit.
* * *
Nakalitan ko niadtong Biyernes sa gabii sa Saint Peter Imus dihang akong nabasahan ang pangan ni manlalaban Efren Ramirez akong maestro kaniadto sa Political Science sa University of San Jose Recoletos kon USJ-R kinsa usa sa gibilaran sa maong funeral parlor.
Akong tuyo didto sa Saint Peter uban sa akong kapikas mao ang pagduaw sa haya ni Francesca Abanilla Badayos, inahan nila ni Ma’am Carmelita Badayos Miguel, principal sa Lahug Christian School ug kang Alex Badayos photographer sa Sun.star Daily Cebu.
Ang ikatulong anak sa akong professor nga si Ma’am Rosalie maoy mi-abi-abi kanamo ug mitug-an nga didto namatay iyang amahan sa usa sa mga kaligo-nan nga dagat diha sa dakbayan sa Talisay pagka Biyernes sa udto.
Matud sa anak nga gikan nang naligo sa dagat ug mihaw-as sa tubig si Ramirez ug naglakaw na kini sa bas paingon sa iyang wheelchair apan kalit lang giataki sa iyang complicated nga sakit nga “diabetes” ug bisan gitabang ug gidala sa ambulance sa Talisay District Hospital apan dead on arrival kini.
Isip usa sa mga tinun-an, di nako makalimtan ang expertise ni Ramirez sa “Philippine Constitution,” “Parliamentary Procedure” ug ang iyang pagpahigayon ug mga healing sessions namong mga tinun-an.
Unya nabatasan gyud to ni Ramirez nga mopasiugda og tapok-tapok alang sa mga 4th year students sa Political Science sa iyang panimay sa Punta Princesa.
Ang mga anak nakahukom nga ugma Martes maoy lubong ni Sir Ramirez diha sa Cebu Memorial Park.
Hisgot naman gyud ko ug mga minatay, akong mga pahasubo sa kabanay ni BomboTatay Bert Palang kinsa among kauban kaniadto sa dyMF Bombo Radyo nga mitaliwan na sab niadtong miaging semana.
Sa lubong kagahapon diha sa Carreta, nag-abot-abot mi nila ni Sir Manny Delos Santos Rabacal, Sir Bobby Nalzaro, manlalaban Ruphil Banoc ug ni Bombo Pina Arcillas.
Si Tatay Bert maoy nagpauso sa mga lingguwahe sa radyo nga “wa kaugpo” ug agwa de kularaw”.
Ang di nako malimtan sa tipik sa iyang mga reports kaniadto nga moingon siya nga “Ang suspetsado sa krimen nakahimo sa salaud tungod kay nakainom sa agwa de kularaw (bino) ug wa makaugpo (maka-eskapo) dihang gidakop sa kapolisan.”
Bilib sab ko ato ni Tatay/Bombo Bert kay bisag dili siya maoy tag-iya og barko makapasakay kadto sa mga way ika-plete.
Mo-apil na lang ko og panawagan sa paglitok og mga pulong sa pag-ampo sa mga kalag sa tulo nga nag-una kanato alang sa ilang kapahulayang dayon.
* * *
Midaug man tuod ming taga-GMA-7/dySS kagahapon sa game 1 sa best-of-three championship series batok sa Cebu Daily News ug The Freeman apan naglisod gyud mi ug nagkagidlay diha sa New Cebu Coliseum.
Congratulations sa taga CCTN- 47 kay sila maoy automatic 3rd placer niining among torneyo sa Newsmen Basketball Association kon NBAC kay wa makompleto ang team sa Sun.star/Bombo Radyo.
Sa ngan sa NBAC ug isip presidente magpasalamat gyud mi og dako sa tanang mga nakatabang sa among liga sama sa Cokaliong Shipping Lines, Cebu Eastern College ug sa Cebu Federation of Beat Journalists.
