Bisag gitaktak na, pahimulos gihapon sa sakyanan sa Kapitolyo

Unsay nahitabo kang dismissed Cebu Provincial Budget Officer Emme Gingoyon?

Bisan gitangtang na sa trabaho, nagsige gihapon og gamit sa sakyanan sa gobyerno nga dili iya?

Wa na gyud siyay plano nga mouli sa government issued service vehicle nga Carens Kia? Dili ni pabaga sa nawong?

Kun nagtuo si Gingoyon nga opisyal gihapon siya sa Kapitolyo ug moinsister nga dili pa final ang iyang dismissal order sa Ombudsman human nga ila kining gikuwestiyon sa Court of Appeals nganong nibiya man siya sa opisina sama sa iyang pagpaugat sa sakyanan?

Matud sa tipik sa iyang suwat ngadto kang Provincial General Service Officer Eva Encabo nga: “With due respect, please be informed that the requested subject-matter involves the merit of the case pending before the Court of Appeals, thus, sub judice which you may be subpoenaed and cited for indirect contempt.”

Dugang niya: “Further, with due respect to your good office, please be informed and guided or clarified that the PGSO is without the office of the Ombudsman’s authority nor legal sanction under its joint decision’s implementation on my dismissal from service, hence, the afore-cited requests are unauthorized and illegal.”

Iya pa’ng gi-insulto si Encabo sa pag-ingon nga “Finally, with due respect to your good self, the cited requests on the subject-matter are not among nor within the purview in the performance of duties and functions vested under the pertinent provisions of existing applicable laws and issuances on the position of Provincial General Services Officer. Ultra Vires!”

Makatawa lang ko sa iyang mga arguments nga kining aksiyon ni Encabo pagkuha sa sakyanan mahug nga sub-judice, contemptuous, illegal ug ultra vires. Nag-inabogado si Gingoyon.

Simple ra man ning ako Gingoyon nga kung di makaya ninyo og tulon tungod sa garbo, delicadeza lang unta.

Wa ka mabalaka nga mograbe ang inyong tulubagon sa padayong pagpahimulos sa sakyanan sa gobyerno?

Pagklaro! Basig inyo nang gihimulbolan ang sakyanan sa Kapitoyo!

* * *

Naalarma na ko sa akong nasaksihan niadtong miaging semana nga bisag gitangtang na sa serbisyo ang usa ka kawani sa korte tungod sa marriage scam apan mihimo man gihapon og transaksiyon sa usa ka langyaw.

Hinoon in fairness niya dili ko makasiguro kun unsa kadto ang matang sa transaksiyon sulod sa opisina sa Regional Trial Court Central Clerk of Court niadtong miaging simana.

Apan dihang nakabantay ang natangtang nga kawani nga si Rhona Rodriquez sa akong presensiya dali niyang gipalakaw ang langyaw ug miesplikar siya kanako nga dili intawon magpakasal ang foreigner nga iyang gika-transact.

Iyang gipasabot nga dugay na kadto nakasal, unya ang gi-follow-up mao ang authentication sa dokumento sa kasal sa buhatan sa National Statistics Office.

Mangambot nalang ko ni Rodriquez kun magpadayon siya. Wa gyud siya maglikay nga unta nangayo siya og reconsideration sa Korte Suprema sa iyang dismissal.

Kung tinuod ang iyang giingon nga dugay na nakasal, unsa man usa to sa mga nakapahimulos sa marriage scam?

Kun authentication sa NSO ang problema, adto unta moduol ang langyaw sa NSO ug dili kang Mrs. Rodriguez.

Sa iyang presensiya, nagpasabot ba nga nagpadayon ang marriage scam sa korte?

* * *

Sugod karong adlawa bag-o na sab ang molingkod pagka-Cebu City Fire Marshal ug gani dunay formal turnover of command karong buntag atol sa ilang flag raising sumaa pa ni FO2 Wendel Villanueva.

Si out-going Cebu City Fire Marshall, Chief Insp. William Tacaldo hulipan ni Chief Insp. Vonrad Fernando Dobluis.

Si Tacaldo maoy himoong Provincial Fire Marshal sa Negros Oriental.

Si kanhi Cebu City Fire Marshal Esmael Codilla kinsa maoy Provincial Director sa Bohol ibalik pagka Cebu Provincial Fire Marshal unya ibalik usab sa Bohol si Supt. Nepomuceno Danggoy.

* * *

Gipa-imbestigar karon ni Dr. Cynthia Genosolango, officer-in-charge sa Integrated Provincial Health Office-Capitol nga dunay usa ka botelya nga dextrose didto sa Sogod nga medyo lubog na nga makadaot kini ngadto sa pasyente.

In fairness hinuon ni Dra. Cristina Giango nga maoy nagdala sa IPHO, wa gisalikway ni Dra. Genosolango nga posibleng gisudlan og kemikal ang dextrose aron lang pagpaukay sa ilang buhatan.

Pero wa kaha magtugtog sa pansitan ang personnel nga in-charge sa pagdawat didto sa Sogod District Hospital nga gipangolohan ni Dra. Ellen Dela Cruz?

Samtang nagtinguha karon si Gov. Hilario Davide III nga mabutangan gyud og dialysis machine ang upat ka mga provincial district hospitals diha sa Carcar, Danao, Balamban ug Bogo tungod kay daghan nang pasyente ang nangadaut sa kidney.

Samtang gipasalig karon ni Dra. Genosolango nga dili maapektahan ang pag-serbisyo sa mga district hospitals ngadto sa katawhan bisan nalangay ang suweldo sa mga trabahante nga outsourced.

Matud niya nga gilihok na kini karon ang mga papeles nga maoy nakapakuwang nga basehanan sa pag-suweldo.

Nahibaw-an nga ang ubang kawani wa na makadawat sa ilang suweldo sud sa duha ka buwan. Dunay uban usa ka buwan.

Samtang bahin sa membership sa Philheatlh ipabilin kini nga proyekto ni Governor Junjun.

* * *

Sayang gyud kaayo nga na-forfeit kagahapon ang combined team sa Sun.star/Bombo Radyo sa Newsmen Basketball Association of Cebu (NBAC) nga maoy naka-ingon nga ang Cebu Daily News/The Freeman maoy magkigharong kanamo sa GMA-7/DYSS sa best-of-three championship series nga sugdan karong Domingo.

Wa makatunga ang taga-Bombo kay duna silay dako kaayong kalihokan kagahapon sa buntag nga gitatawag ug “Bombo Medico.” Mao ni ang giingon nga unahon gyud ang trabaho kay sa lingaw-lingaw.

Ang magtigi alang sa 3rd mao ang CCTN 47 versus Sun.star/Bombo.