Dunay exhibit karon sa Qube Gallery sa The Persimmon sa Mabolo ang among pundok nga “Monochrome Magick.” Puros mga black and white o matawag tang monochromatic (o usa ra ka color/bulok) nga picture ang gipang display didto. Nagsugod kini niadtong July 11 ug matapos kini karong July 25.
Na porma ang maong pundok pinaagi sa Facebook ug mo kapin na sa 200 ang sakop niani. Hinuon mga 30 ra ngadto sa 40 kanamo ang aktibo sa pag post. Sagol-sagol ang mga maniniyot nga mga miyembro. Dunay taga media, dunay wedding photographers. Dunay enthusiast, duna say neophyte. Dunay estudyante, duna say senior citizens. Lakig babaye apil niani. Lain-lain among panahum ug ingon man ang panan-aw.
Duna nay familiar nga mga ngan apan dunay uban nga medyo low profile. Ang mga nangapil sa exhibit galakip kanila ni James Morrel, Clayton Tugonon, Aldo Nelbert Banaynal, Boy Toting, Allan Restauro, Michael Jo, Michelle Alvarez, Marque Luzano, Harold Ong, Maria Gigante, Paul Gotiong, Victor Kintanar, Charles Gacasan (a.k.a Teo Phylus), Kimberly Mendero, Homer Anthony Medici, Tian Enricuso, Juan Carlo de Vela, Jarold Badilles, Joseph Ong ug uban pa.
Sobra sa 20 ka maniniyot ang nangintra og mga 100 ka hulagway ang gikatag sa mga bungbong sulod sa Qube Gallery. Ambot kun may record ba nga na set ning maong exhibit apan ako nga usa sa ga-organize niini na kurat sa kadaghan og sa ka lahi sa matag entry.
Daw slides kon tan-awon sa buntag (kay ma backlighted man kini sa bintana) ang canvass printed architectural blow-ups ni Medici. Murag mo hypnotize ang kang Morrell nga mga infra-red landscapes. Sensual kaayo ang lighting sa mga hubo nga abstract ni Restauro. Tingali matawag na nato og Classic ang mga topless portrait ni Tugonon sa mga tiguwang nga nitibo sa bukiran sa Luzon. Usa ning mga nitibo, inila nga tattoo artist sa kinaraan nga pamaagi sa pagpatik.
Apan nganong black and white man? Tingali kay ang black and white nga hulagway susama man sa kasagarang damgo nga walay kolor. Ug ang tanang sakop ni Monochrome Magick, may sports car man o mag-baklay lang, May Leica man o mag cellphone camera lang puros man buot mosulod sa kalibutan sa damgo. Ug ang black and white photograph nga ilang gisalmot susama sa usa ka souvenir sa damgo. Kay kun buot huna-hunaon ang kinabuhi susama sa damgo nga siging ga usab-usab, dili matag-an ug lumalabay lamang.